Yãmb sogsgã leoore

◼ Biiblã sagl-bʋs n tõe n sõng-d tɩ d zã d selilɛɛr-dãmbã neer tigissã la koe-moonegã sasa?

“Bũmb fãa tara a wakate.” (Koɛ. 3:1): Wakat buud fãa, d tõe n talla selilɛɛr n sõs ne ned bɩ n tool mesaaze. La wakat n be tɩ d pa segd n bas tɩ d selilɛɛr-dãmbã tiis-d ye. Wala makre, tigissã sasa, d waoogda a Zeova, d paamdame t’a zãmsd-do, la d kengd taab raoodo. (Tõo. 31:12; Yɩɩl 22:23; Rom 1:11, 12) Woto wã, yɩta sõma tɩ d kiis d selilɛɛr-dãmbã tigissã sasa, tɩ sã n sa bɩ d widgi. La sã n mikame tɩ y pa segd n kiis y selilɛɛrã, bɩ y tõg-a tɩ ned sã n bool-y bɩ a ra tiis neb a taabã ye.

‘Maan-y bũmb fãa koe-noogã yĩnga.’ (1 Kor. 9:23): Wakat kẽere, selilɛɛr-dãmbã sõng-d-la koe-moonegã pʋgẽ. Makre, sẽn lʋɩt-a taoor koe-moonegã sasa wã tõe n tũnuga ne selilɛɛr n bãng koe-moondb a taabã sẽn beẽ. Koe-moondb kẽer mi n tall-a lame n bool ned sẽn wilg t’a rat n bãng n paasame, bɩ n bool b Biibl karen-biig nand tɩ b kẽng a nengẽ, sẽn yɩɩd fãa, a sã n bee zĩig sẽn zãre. D sã n wa sõsd ne ned bɩ d gũus tɩ d selilɛɛrã ra tiis-d ye. (2 Kor. 6:3) Moonegã sasa, d sã n wa gũud d taabã, yɩta sõma tɩ d tags koe-moonegã yell la sẽn moond-b ne tõndã yelle, la d ra boond neb bɩ n toond mesaaz-rãmb ye.

D wilg tɩ d nanda d taabã. (1 Kor. 10:24; Fil. 2:4): Pa zems tɩ d tags tɩ baa d sã n pa yi pĩnda, d tõe n boola saam-biig ning wall d tool-a mesaaz n bãng sullã sẽn beẽ n moondẽ wã ye. D sã n pa kẽnd koe-moonegã pĩnda, d tʋdg n mikame tɩ b zoe n pʋɩya nebã, tɩ lebg tɩlae tɩ b toeeme. Yaa sɩd tɩ wakat ninga, d tõeeme n pa ta pĩnd ye. Baasgo, d sã n minim n kẽnd pĩnda, wilgdame tɩ d nanda koe-moonegã yiib tigsgã a Zeova sẽn kɩt tɩ b siglã, saam-biig ning sẽn lʋɩ-a taoorã, la koe-moondb a taabã.