“Mam pa le mikd-a yir ye!”

Tõe tɩ yãmb me zoe n sõsa ne ned t’a kelg koɛɛgã sõma, tɩ yɩl n paam-a yir n sõs n paas lebg toogo. Baa y sẽn kẽng naoor ka tɛk n na n sõng-a t’a bãng koɛɛgã n paasã, y pa mikd-a yir ye. (1 Kor. 3:6) Wakat ninga, koe-moondb kẽer sẽn tar minim gʋlsda a soabã lɛtre, wall b gʋls bũmb n sẽgemd a rig-noorẽ wã. Sãnda sẽn mi tɩ tõe n wa lebga toog tɩ b mik b kɛlgdã yirã mi n kosa a telefõnn nimero, la b sok-a a sã n tõe n karma mesaaz. Y sã n tõog n gʋls ned y sẽn da zoe n taas koɛɛgã lɛtre, wall y tũnuga ne ẽntɛrnetã pa rẽ bɩ portaabl n tool-a mesaaze, y tõe n gʋlsa y rapoorã zug tɩ y lebg n tɩ gesa neda. Y sã n gʋlsa sebr n sẽgemd a rig-noorẽ wã me, pa rẽ bɩ y bool-a-la ne telefõnne, y ket n tõe n gʋlsa rapoorã zugu. Baa d sã n pa mikd d kɛlgd yiri, d tõe n kell n sõng-a lame t’a wʋm koɛɛgã n paase.