Sõngr b sẽn dat sõngr wakate
1 Tʋm-tʋmd a Pɩɛɛr sẽn yã t’a tẽed-n-taasã pels ra rata kengrã, tɩ b yellã da pak-a wã kɩtame t’a tẽeg-b yɛl la a keng b raoodo. (2 Pɩɛ. 1:12, 13; 3:1) A sagla ‘neb nins sẽn paam tẽebã’ tɩ b ket n bɩt tẽeb zʋg-sõma wã pʋsẽ, sẽn na yɩl tɩ b ‘ra yɩ kʋɩɩmb walla neb sẽn ka womd biis’ d Zusoab a Zezi Kirist bãngrã wɛɛngẽ ye. (2 Pɩɛ. 1:1, 5-8) A Pɩɛɛr da ratame n sõng-b tɩ b maan b sẽn tõe tɛk n da kong a Zeova boolgã la a tũusgã, sẽn na yɩl tɩ b wa ‘mik tɩ b bee laafɩ pʋgẽ, tɩ dẽgd tosb ne dõdb’ ka be ne-b ye. (2 Pɩɛ. 1:10, 11; 3:14) Ne bãmb wʋsgo, a Pɩɛɛr gom-kãensã sẽn kengd raoodã sɩd yɩɩ sõngr n kõ-b b sẽn dat sõngr wakate.
2 Wẽnnaam nin-buiidã yell paka kiris-neb yel-gɛtbã me rũndã-rũndã. ‘Tood wakat’ kãensã pʋgẽ, a Zeova sõgen dãmb wʋsg segd n maoo ne zu-loees wʋsgo. (2 Tɩm. 3:1) B sẽn tar ligd zu-loeese, zak pʋgẽ zu-loeese, la zu-loees a taab wakat fãa wã tõe n kɩtame tɩ neb kẽer tags wala a Davɩɩd woto: “Tood gũbgda maam tɩ b ka tõe n sõd n sɛ ye. Mam yel-wẽna leb n wata m zugu la mam ka tõe n yã ye. Bãmb sõor yɩɩda m zoobda sẽn be m zugẽ wã. La m sũur sãamame.” (Yɩɩl 40:13) Toodã tõe n yɩɩ kãsems hal tɩ kɩt tɩ b maan yam-kaalg ne b zɩɩb kãsemsã tẽebã wɛɛngẽ, la b bas koe-moonegã. Baasgo, baa ne b sẽn tar zu-loeesã, ‘b ka yĩm a Zeova tõodã yell ye.’ (Yɩɩl 119:176) Masã la wakat ning kãsem dãmbã sẽn segd n kõ nin-kãensã sõngr ning b sẽn datã.—Ezai 32:1, 2.
3 Sẽn na yɩl n pids raab kãngã, b sagenda kãsem dãmbã tɩ b modg sõma n sõng neb nins sẽn ka le moondã. B maanda modgr wʋsg masã sẽn na yɩl n maan dẽ, la b na n kell n maana woto n tãag tʋʋlg kiuugã. B kosa sebr zãmsg yel-gɛtbã tɩ b tɩ ges sẽn ka le moond-bã n sõng-b tẽebã wɛɛngẽ, tɩ b tõog n leb n naag tigingã neb n moone. Sã n yaa tɩlae, b tõe n maana Biibl zãmsg ne sẽn ka le moond-a wã. B tõe n kosa koe-moondb a taab sõngre. Sã n yaa yãmb sõngr la b kos-yã, modgr ning y sẽn na n maanã na n zĩnda nafa wʋsgo, sẽn yɩɩd fãa y sã n kengd a soabã raood ne nonglem la nimbãan-zoeere.
4 Ned sã n leb n naag tigingã n moond koe-noogã, yaa bũmb sẽn noogd tõnd fãa sũyã. (Luk 15:6) Tõnd sã n maan modgr n keng sẽn ka le moond-bã raoodo, sɩd tõe n yɩɩ wa d sẽn ‘togs goam b wakate.’—Yel. 25:11.