Wẽnnaam Gomdã yaa sɩda
1. Kɩba-bʋs sẽn tar yõod la Biiblã tara?
1 Yɩɩl gʋlsdã gʋlsame tɩ “yãmb goama gill yaa sɩda.” (Yɩɩl 119:160) A Zeova kõta sogsg nins sẽn yaa kãsems n yɩɩd vɩɩmã zugã leoor sẽn yaa vẽeneg ne a Gomdã vʋʋsem sõng sẽn vẽnegã maasem. A kãabda neb nins fãa sẽn be zu-loees pʋgẽ wã belsg la saagre, la a wilgd tõnd d sẽn tõe n maan to-to n pẽneg-a. Pag a yembr sẽn tar mi-beoog yeela woto: “F sã n bãng sɩdã sẽn be Biiblã pʋgẽ wã, yaa wala f sẽn na n yit zĩig sẽn yaa libsg la sẽn sãamd sũur wʋsg pʋgẽ n kẽed roog sẽn tar vẽenem wʋsgo, la sẽn be yamleoog pʋgẽ.” Yãmb modgdame n tũnugd ne sor buud fãa y sẽn paam n taasd neb a taabã sɩd ning sẽn be Wẽnnaam Gomdã pʋgẽ wã bɩ?
2. Wãn to la Biiblã manegd neb vɩɩm?
2 Biiblã tõe n toeema neba, la a zĩnd yamleoog ne neb buud fãa: Biiblã sɩd tara pãng n tõe n kẽ ned sũuri, la a toeem a vɩɩmã. (Heb. 4:12) Pʋg-bɩɩg yʋʋr sẽn boond t’a Rosa ra kẽe tutuulum, rã-yũur la dorg rɩkr pʋgẽ. A yeelame: “Vugri, mam sũurã sẽn da sãam hal wʋsgo, a Zeova Kaset soab ne a pag n wa n wilg maam Biiblã sẽn tõe n sõng-d to-to tɩ d welg d zu-loeesã. Mam sɩnga Wẽnnaam Gomdã zãmsgo, n yã t’a bee yamleoog wʋsgo. Kiuug a ye pʋgẽ bala, mam paama pãng n tõog n lebs n tall vɩɩm manesem sẽn yaa yɩlemde. Kɩtame tɩ mam vɩɩmã paam võore, tɩ m da ka le baood n na n teeg rãam bɩ dorg ye. La m sẽn sɩd da rat n yɩ a Zeova zoa wã yĩng kɩtame tɩ m da rɩk sard n na n tũ a noyã m vɩɩmã pʋgẽ. Mam sã n da ka paamẽ yam ning sẽn be Wẽnnaam Gomdã pʋgẽ wã, sãmbg kae tɩ masã m da zoe n yãkẽ-la m meng yõore.”—Yɩɩl 119:92.
3. Bõe yĩng tɩ d segd n taas neb a taabã Biiblã koɛɛg n da maan yam-yoogo?
3 Sẽn yaa lebend ne rũndã sɛb wʋsgo, Biiblã bee yamleoog ne ‘neb sẽn yit soolem fãa, buud fãa, la ne neb sẽn gomd goam toɛy-toɛy fãa.’ (Wil. 7:9) Wẽnnaam datame tɩ “neba fãa paam fãagre la b bãng sẽn yaa sɩda.” (1 Tɩm. 2:4) Rẽ n so, tɩ d pa na n kʋmb bal n yeel tɩ ned ka na n sak koe-noogã a sẽn yitẽ yĩng bal ye. Sẽn yaa lebend ne rẽ, taas-y neba fãa Rĩungã koɛɛga, tɩ sã n tõe fãa, bɩ y kɩt t’a soabã kell n karm-a Biiblã pʋgẽ.
4. D sã n wa kõt kaseto, wãn-wãn la d tõe n tʋm ne Biiblã?
4 Tik-y verse rãmbã zutu: D tara soay wʋsg n tõe n tʋm ne Biiblã koe-moonegã wakate. Y sã n wa kãabd ned zʋrnalle, mak-y n karem verse ning sẽn be zʋrno rãmbã kãabg goamã pʋgẽ wã. Koe-moondb kẽer sã n wa kãabd sebr ning b sẽn segd n kãab kiuugã pʋgẽ wã, b yãtame tɩ tara yõod tɩ b sɩngr goamã pʋgẽ bɩ b karem verse b sẽn deng n maag b yĩng n yãke. Lebg-n-tɩ-ges wakate, wakat fãa bɩ y karem verse a ye bɩ sẽn yɩɩd woto sẽn na yɩl n sõng y sõsd-n-taagã t’a paamd bãngr sẽn yaa takɩ wã n paasdẽ. Y sã n zãmsda Biiblã ne neda, bɩ y tik sõasgã verse yẽg zutu. Baa sã n ka koe-mooneg sẽn sigl wakat me, bɩ y zãad Biibl yambẽ n tʋm ne-a sor sẽn paam fãa n kõ kaset sẽn pa yãk wakate.—2 Tɩm. 2:15.
5. Bõe yĩng tɩ d segd n modg n tʋm ne Biiblã koe-moonegã sasa?
5 Bɩ d sõng neb a taabã tɩ b rɩ sɩd ning sẽn be Wẽnnaam Gomdã pʋgẽ n tõe n kɩt tɩ ned toeema yõodo, n tʋmd ne Biiblã wakat sẽn zems buud fãa tõnd koe-moonegã sasa.—1 Tes. 2:13.