“Wẽnnaam goama . . . tara pãnga”
1 Tʋm-tʋmd a Poll gʋlsa woto: “Wẽnnaam goama vɩɩme la a tara pãnga.” (Heb. 4:12) A rat n yeelame tɩ bõe? Wẽnnaam gomdã, bɩ a koɛɛgã, tara pãn-kãseng sẽn toeemd neda. Yam ning sẽn be Biiblã pʋgẽ wã tara pãng sẽn tõe n toeem ned vɩɩm tɩ lebg sõma. A sẽn kãabd belsg la saagr ningã pẽnegda ninsaalbã ne Wẽnnaam a Zeova sẽn yaa Vɩɩmã Kõatã. A koɛɛgã tõe n sõnga pʋ-peelem dãmba tɩ b sɩng sor ning sẽn tar n debd vɩɩm sẽn kõn sa wã zug tũubu. La tõnd tog n dɩka Biiblã n tʋme, d sã n wa kõt nebã kaseto, sẽn na yɩl n tõog tɩ woto yɩ.
2 Y sã n na n kõ kaset fãa bɩ y karem verse: Wõnda zak-zak moonegã pʋgẽ, koe-moondb wʋsg ka le minim n tũnugd ne Biiblã ye. Yaa woto ne yãmb bɩ? Pa wõnd neb wʋsg le tara sẽk n na n sõs n kaoos ye. Tõe tɩ woto kɩtame tɩ bilf-bilfã y wa minim n kãabd sɛbã bal bɩ y togsd verse rãmbã goam ne noor bala. D raoonda koe-moondba fãa tɩ b maan modgr sõma n karem baa yaa verse a yembr Biiblã pʋgẽ koe-noogã mooneg wakate. Woto na n kɩtame tɩ nedã bãng tɩ tõnd koɛɛgã yita Wẽnnaam Gomdã pʋgẽ.
3 Neb sõor sẽn paood bal n dɩk Biiblã kareng tɩ lebg b minungu, la naoor wʋsgo neba waoogda Biiblã. Naoor wʋsgo, baa neb sẽn ka tar sẽk na n sakame n kõ-d minit a wãn tɩ d karem verse rãmb Wẽnnaam Gomdã pʋgẽ tɩ b kelge. Tõnd sã n karem verse sẽn zems ne manesem sẽn be yamleoogo, la d wilg a võor koɛɛg-koɛɛga, a Zeova gomdã pãng tõe n maana a soabã neere. La sɩngr goama poore, wãn to la y na n maan n wa tõog n karem verse Biiblã pʋgẽ?
4 Mak-y rẽ maaneg zʋrno rãmbã pʋɩɩb wakate: Kaagr yel-gɛt a yembr n tʋmd ne Biiblã sõma a sã n wa pʋɩt zʋrno rãmbã. A suiida Biibl bilfã a gɩfẽ wã. A wilgda zʋrnallã la a gom n tadg sõsg a yembr zugu. Rẽ poore, zĩig pʋgẽ bala a lakda Biiblã n karem verse sẽn tar loees ne sõsgã. Sẽn na yɩl n maan dẽ, d tõe n sʋka woto: “Yãmb tagsda wãn-wãn ne Biiblã kãab kãngã sẽn kengd pɛlgã?” Y sã n maan dẽ n sa bɩ y yãk verse n karem.
5 Modg-y n tõog n karem verse a yembr bɩ a yiib Biiblã pʋgẽ n wilgd ned fãa y sẽn kõt kasetã. Biiblã pãng sẽn kengd raoodã tõe n paka sor n kõ neb wʋsg sẽn yɩɩd tɩ b pẽneg Wẽnnaam.—Zã 6:44.