Tall-y Biiblã n tʋm sõma
1. Bõe la y tõe n maan n segl y meng koe-moonegã yĩnga?
1 Baa sẽn yaa sɛb nins la y rat n kãab koe-moonegã wakate, yaa sõma tɩ y karem verse sẽn na n kɩt tɩ neb nins sẽn kelgda tagse. (Heb. 4:12) Y sã n yãk verse sebr ning y sẽn na n kãabã pʋgẽ, rẽ na n sõng-y lame tɩ y tõog n kell n kãab sebrã nana-nana. Zĩis kẽere, koe-moondbã mikame tɩ b sã n wa sõsd ne ned bɩ b sã n wa moond zak-zaka, tara yõod tɩ b zãad Biiblã b nusẽ.
2. a) Wãn to la d tõe n sɩng sõasg ne verse? b) Gom-zu-bʋs sẽn tik Gʋlsg Sõamyã zug n pak nebã yãmb moonegã zĩigẽ?
2 Sɩng-y ne verse: Koe-moondb kẽer sã n wa rat n sɩng sõasg ne neda, b rengd n soka a soaba sẽn tagsd bũmb ning Biiblã verse a ye zugu, n yaool n karem t’a kelge. Rẽ na n kɩtame t’a soabã kell n tik a yamã Wẽnnaam Gomdã zugu. Rẽ yĩnga sõasg tʋɩɩsg goam nins sẽn pʋgdã zemsa ne yãmb moonegã zĩig bɩ?
◼ “Rẽ yĩnga yãmb sã n da tarẽ pãn-tõogo, y kõn toeem yɛlã tɩ lebg woto sɩda?” Karm-y Wilgri 21:4.
◼ “Bõe yĩng tɩ d vɩ wakat sẽn yaa toog woto pʋgẽ?” Karm-y 2 Tɩmoty 3:1-5.
◼ “Rẽ yĩnga yãmb tagsdame tɩ nebã sã n da tũudẽ sagl-kãngã, tõnd tẽngã ra na n yɩɩ noog n yɩɩd bɩ?” Karm-y Matɩe 7:12.
◼ “Yãmb tagsdame tɩ yãmb kambã na n paama bõn-sõma nins b sẽn bilg ka wã bɩ?” Karm-y Yɩɩl Sõamyã 37:10, 11.
◼ “Yãmb tagsdame tɩ wakat n wat tɩ gom-kãensã na n paam pidsg bɩ?” Karm-y Ezai 33:24.
◼ “Yãmb wʋma goosneemã toeengã yell b sẽn gomd ka wã kɩbar bɩ?” Karm-y Daniɛll 2:44.
◼ “Rẽ yĩnga yãmb zoe n tʋlgame n na n sok Wẽnnaam sok-kãngã bɩ?” Karm-y Zoob 21:7.
◼ “Rẽ yĩnga d tõe n leb n yãa tõnd nin-nongds nins sẽn ki wã bɩ?” Karm-y Zã 5:28, 29.
◼ “Rẽ yĩnga sẽn ki-bã mii sẽn vɩ-bã sẽn maand bũmb ning bɩ?” Karm-y Koɛɛg Soaba 9:5 wã.
3. Wãn to la d tõe n sõng nebã tɩ b wʋm Biiblã verse rãmb d sẽn karemdã võore?
3 Wilg-y verse rãmbã võore, rɩk-y makr n bilg-ba, la y wilg b yõodo: Ned sã n sak n na n sõs ne-y bɩ y ra maan yãg-yãg ye. Rɩk-y sẽk n wilg verse wã võore, n dɩk makr n bilg-a, la y wilg a yõodo. (Neh. 8:8) Nebã sã n wʋm Wẽnnaam Gomdã zãmsg võor la b sak-a, rẽ tõe n toeema b vɩɩmã wʋsgo.—1 Tes. 2:13.
4. Wãn-wãn la y tõe n tall Biiblã n tʋm sõma lebg-n-tɩ-ges rãmbã wakate?
4 Wakat ning y sẽn gʋʋnd nedã ratmã bɩ y ket n talld Biiblã n tʋmd sõma. Yãmb me sã n maand lebg-n-tɩ-ges rãmbã y tõe n maana woto: 1) Yãk-y verse sẽn zemse. 2) Sok-y a soabã sokr sẽn yaa nana sẽn na yɩl n bãng a tagsg verse wã zugu. Rẽ poor bɩ y karem verse wã. 3) Wilg-y verse wã võore, rɩk-y makr n bilg-a, la y wilg a yõodo. Wakat fãa y sã n lebg n tɩ ges a soabã fãa bɩ y modg n kɩt t’a bãng Wẽnnaam Gomdã n paase. Tõeeme tɩ pa kaoos la y sɩng Biiblã zãmsg ne-a ye.