Babg a tãab soaba: D sẽn na n zãms nebã Biiblã to-to tɩ b bɩ tẽebã pʋgẽ
D tʋm ne verse rãmbã sõma
1. Bõe yĩng tɩ d segd n gom n tadg verse rãmbã zutu, d sã n wa zãmsd Biiblã ne nebã?
1 Tõnd zãmsda Biiblã ne nebã sẽn na yɩl n ‘maan karen-biisi,’ d sẽn na n sõngd nin-kãensã tɩ b wʋmdẽ la b sakd Wẽnnaam Gomdã zãmsgo, la b tũud-a b vɩɩmã pʋgẽ wã. (Mat. 28:19, 20; 1 Tes. 2:13) Woto yĩnga, zãmsgã segd n tika Gʋlsg Sõamyã zugu. Sɩngrẽ wã, yɩta sõma tɩ b sõng Biibl zãmsdbã tɩ b bãng b sẽn tõe n maan to-to n yã verse rãmb takɩ b mengã Biibl pʋgẽ. Wãn to masã la d tõe n tũnug ne verse rãmbã n sõng nin-kãensã tɩ b bɩ tẽebã pʋgẽ?
2. Wãn to la d tõe n yãk Biiblã verse nins d sẽn na n karem la d sõs b zutã?
2 Tũus-y verse nins y sẽn na n wa karmã: Y zãmsgã seglg wakate, bɩ y bao n bãng verse rãmbã sẽn tar loees ning ne bũmb ning zug y sẽn sõsd zãmsgã pʋgẽ wã, n yãk verse nins y sẽn na n karem ne Biibl zãmsdã zãmsgã wakate. Naoor wʋsgo, yɩta sõma tɩ d karem verse nins sẽn wilgd tõnd tẽebã zãmsg tikr Biiblã pʋgẽ wã. D tõeeme n pa karem verse nins sẽn wilgd kɩbay sẽn tɩ loe ne zãmsgã bal ye. Ges-y Biibl zãmsd fãa raab la a yɛlã sẽn yaa to-to.
3. Sogsgã yõod yaa bõe, la wãn to la d tõe n maan dẽ?
3 Tũnug-y ne sogsgo: Ra wilg-y Biibl zãmsdã verse rãmbã võor y toor ye, kɩt-y tɩ yẽ mengã wilg b võore. Y tõe n maana sogsg ne yam n kɩt t’a maan dẽ. Verse võor sã n yaa vẽenega, y tõeeme bal n sok Biibl zãmsdã t’a wilg verse wã sẽn teend bũmb ning b sẽn yeel sullã pʋgẽ wã to-to. Wakat kẽere, tõe n yaa tɩlae tɩ y maan sokr bɩ sogsg takɩ sẽn na yɩl n togl Biibl zãmsdã t’a wa wilg leoor ning sẽn zemsã. Sã n yaa tɩlae tɩ y wilg yɛl kẽer võor n paase, bɩ y maan dẽ Biibl zãmsdã leokr poore.
4. Hal sẽn ta zĩ-bʋg la d segd n wilg verse rãmbã d sẽn karmã võore?
4 Kɩt-y tɩ zãmsgã yɩ nana: Naoor wʋsgo, tãp soab nug sẽn noom tãooda ne peem-yɛng bal la a ka yõsgd ye. Woto me, ka tɩlae tɩ karen-saamb sẽn mi neb zãmsg gom wʋsg n yaool n tõog tɩ ned wʋm zãmsg võor ye. A tõe n taasa zãmsgã nana-nana, vẽenega, la takɩ. Wakat ninga tõe n yaa tɩlae tɩ y maan vaeesg Sosiete wã sɛb pʋsẽ n tõog n wʋm verse võor la y wilg a võorã tɩ zemse. (2 Tɩm. 2:15) Ra bao-y n na n wilg verse wã babs fãa võor zãmsgã pʋgẽ ye. Wilg-y babg ning bal sẽn tɩ loe ne tagsg ning b sẽn zãmsdã võore.
5, 6. Wãn to la d tõe n sõng Biibl zãmsdbã tɩ b tũ Wẽnnaam Gomdã b vɩɩmã pʋgẽ, la bõe la d ka segd n maane?
5 Wilg-y b sẽn tõe n tũ verse rãmbã to-to: Zĩig ning sẽn zemsã, sõng-y karen-biigã t’a bãng a sẽn tõe n tũ verse wã a vɩɩmã pʋgẽ to-to. Wala makre, y sã n sõsd Hebre dãmb 10:24, 25 zug ne Biibl zãmsd sẽn nan ka wat tigissã, y tõe n sõsa ne-a tigsg a yembr zugu, la y bool-a t’a wa tigis-kãnga. Ra kɩt-y t’a tags tɩ y modgd-a lame ye. Bas-y tɩ Wẽnnaam Gomdã kɩt t’a tʋlg n maan a sẽn segd n maanã n ta a Zeova yam.—Heb. 4:12.
6 D sã n wa tʋmd karen-biisã maaneg tʋʋmde, bɩ d tũnug ne verse rãmbã sõma n kɩt tɩ Biibl zãmsdbã “sak [ne] tẽebo.”—Rom 16:26.