Tʋʋmd sẽn kengd pɛlga
1 Biiblã koɛɛg kengda neb nins fãa sẽn sakd-a la b tũud-a b vɩɩmã pʋgẽ wã pelse. (Yɩɩl 19:8, 9) A sõngd-b lame tɩ b paamd b mens ne ziri zãmsg la minim wẽnse, la a kõt saagr b sẽn tõe n tall bas-m-yam ne beoog-daar yĩnga. La koe-noogã ka nafd neb nins sẽn deegd-a wã bal ye. Koe-noogã leb n kengda neb nins sẽn taasd neb a taabã sɩd ning sẽn be Biiblã pʋgẽ wã pelse.—Yel. 11:25.
2 Koe-moonegã kengda tõnd pelse: A Zezi yeelame tɩ neb nins sẽn na n sak n dɩk a nao n maan yẽ karen-biig sẽn segd n maan bũmb ningã, wala moonegã la karen-biisã maaneg tʋʋmdã na n paama “b pels kengre.” (Mat. 11:29, NW ) Yẽ mengã yãame t’a sã n da kõ neb a taabã kasetã, kengda a pɛlga. A ra geta rẽ wala a rɩɩbo. (Zã 4:34) A sẽn da wa n tʋm a karen-biis 70 wã tɩ b tɩ moonã, b kɩdmame, b sẽn mik t’a Zeova ra sõngd-b lame wã.—Luk 10:17.
3 Woto me rũndã-rũndã, kiris-neb wʋsg sẽn moond koe-noogã, kengda b pelse. Saam-bi-poak a yembr yeela woto: “Koe-moonegã kengda mam pɛlga, bala a kɩtdame tɩ mam vɩɩmã tar võore. Mam sã n moond koe-noogã, mam yĩmda m mengã zu-loees la m daar fãa yɩɩrã.” Koe-moond a to sẽn tar yẽesem yeelame: “Koe-moonegã . . . kɩtdame t’a Zeova lebg vẽeneg ne maam daar fãa la kõt maam bãan ne sũ-noog m sẽn da ka tõe n paam ne manesem a to ye.” Ad sɩd yaa waoogr meng n kõ-do, d sẽn paam n yaa ‘tʋmd-n-taas ne Wẽnnaamã’!—1 Kor. 3:9.
4 Kirist zɩɩbã yaa faasga: Ba a Zezi sẽn sagl a karen-biisã tɩ b “mao” sõma wã, a pa kot-b tɩ b maan sẽn yɩɩd b pãng ye. (Luk 13:24) Sɩda, ne nonglem a yetame tɩ tõnd wa naag n tʋk yẽ zɩɩbã. (Mat. 11:29) B rãmb nins sẽn maood ne zu-loeesã tõe n talla bas-m-yam tɩ b sẽn maand tʋʋmd ning ne b sũy fãa a Zeova balengã pʋgẽ wã, baa paooda, a Zeova sũur nooma ne rẽ.—Mark 14:6-8; Kol. 3:23.
5 Ad sɩd yaa bũmb sẽn kengd pɛlga, tɩ d balem Wẽnnaam, sẽn nand bũmb ning fãa d sẽn maand a yʋʋrã waoogr yĩngã! (Heb. 6:10) Bɩ d modg wakat fãa n maan a Zeova raabã wa d sẽn tõe tɛka.