Tʋʋmda will lɛtr
Rĩungã koe-moondba:
“Wẽnnaam n kɩt tɩ bɩ.” (1 Kor. 3:6) Ad yaa bũmb sẽn sɩd kõt sũ-noogo, d sẽn ne tɩ koe-moonegã kẽngda taoor Afirik nin-taoor la a tẽn-sʋk tẽnsã pʋsẽ wã! Yʋʋmd 2003 tʋʋmd yʋʋmdã sasa, tẽng fãa la bal paama koe-moondb sõor sẽn yɩɩd sõor nins b sẽn paam pĩndã. D rɩk makr a wãna: Tʋʋl-nif kiuugã, Benẽ paama koe-moondb sõor sẽn yɩɩd sõor nins b sẽn paam pĩndã. Yaa pipi b sẽn yɩɩg koe-moondb 7 000. Ki-kãng pʋgẽ, Kamerun paama koe-moondb sõor sẽn yɩɩd pĩnda, sẽn yaa koe-moondb 28 931, tɩ Burkĩna Faso paam koe-moondb 1 059 sig-noy kiuugã, tɩ yaa sõor sẽn yɩɩd pĩnd dẽndã. Woto zemsa pẽgre.
A Zeova leb n barka Biibl zãmsgã d sẽn maand ne nebã la so-pakrã tʋʋmde. Afirik tẽn-kãensã pʋsẽ, b sã n pʋɩ tɩ zemse, koe-moond fãa maanda Biibl zãmsg a yembr bɩ sẽn yɩɩd woto. Woto wilgdame tɩ wakat sẽn wat pʋgẽ, koe-moondbã sõor tõe n fɩɩgame n paase, wala a Zezi sẽn yeelã: “Bɩ y zẽk y nens n ges pʋtã, tɩ bõe, bãmb pelgame n ta tigsg masã.” (Zã 4:35) Wala moonegã tʋʋmd kɩbay sẽn wilgdã, “d kell n kẽn wa sẽn zemse.” (Fil. 3:16) Sẽn yɩɩd fãa yaa bũmb sẽn kengd raoodo, d sẽn ne tɩ saam-biis la saam-bi-pogs wʋsg kẽeda so-pakrã tʋʋmd pʋgẽ wã. Rẽ wɛɛngẽ, tʋʋlg kiuugã Kamerun paama wakat fãa so-pakdb sõor sẽn yɩɩd pĩnd rãmbã, sẽn yaa bãmb 1 540. Ki-kãng pʋgẽ, Togo paama so-pakdb sõor sẽn ta 777. So-pakdb kãensã wʋsg yaa kom-bɩɩse, tɩ kẽer ket n be lekolle. Bɩ b mak-sõngã sõng neb a taab tɩ b wa naag n maan tʋʋm-kãngã b sẽn ka na n le maan n yɩlmã.—Koɛ. 12:1; 2 Pɩɛ. 3:11.
Tõnd rɩẽ tʋʋmd yʋʋmdã sasa, d tʋma ne d sɛbã sõma. D pʋɩɩ neb nins sɩdã kom la a ko-yũud sẽn tarã zʋrno rãmb wʋsgo. Kamerunni, b basa ne nebã zʋrno rãmb 350 849, tɩ Senegalle koe-moond fãa bas zʋrno rãmb a 8, b sã n pʋɩ tɩ zemse, tɩ yaa sõor sẽn yɩɩd pĩnd dẽndã. Sẽn paase, tʋʋmd yʋʋmdã baasgẽ, d wɩnga wʋsg ne Vɩɩm sẽn pa sata sor seb-bilã pʋɩɩbo. Kamerun tẽngẽ wã yen-yen bala, b pʋɩɩ seb-bi 548 130 tigims toɛy-toɛy pʋsẽ sigr kiuugã. Neb wʋsg wilgame tɩ b rat n bãng n paasame, sẽn paase b sɩnga Biibl zãmsg ne neb wʋsgo. Dẽ, tẽeb bõn-buud bʋdb la b koom zãgsg n sɩd maan yʋʋmd 2003 tʋʋmd yʋʋmdã pʋgẽ.—1 Kor. 3:6.
D sẽn sɩngd yʋʋmd 2004 tʋʋmd yʋʋmdã, d lagemda ne yãmb n pʋʋsdẽ t’a Zeova na ‘kell n kɩt tɩ bɩtẽ.’
Yãmb saam-biisi,
Lagem-taabã tʋʋmd willi