Siglgã taoor lʋɩtb Sull lɛtre
D SẼN kolg dũni paalg ninga sẽn watã pʋgẽ kõomã, d segd n gũuda a Zeova ne d sũur fãa. (Sof. 3:8) No-rɛɛs a Daniɛll yeelame tɩ yaa “Wẽnnaam . . . n pukd sãmbdo. La yaa [yẽ] n wilg . . . bũmb nins sẽn na n wa zĩnd yaoolem wakatã.” (Dan. 2:28) D sẽn vɩ yaoolem wakat kãng b sẽn da reng n togsã saabẽ t’a Zeova vẽnegd tõnd a yel-solgdsã võor masã wã, sɩd yaa zu-no-kãseng tɛkẽ n kõ-do!
Ne a ‘tʋm-tʋmd sẽn tũud sɩd la sẽn tar yamã’ maasem, a Zeova vẽnegda tõnd a raabã bilf-bilfu. Raab kãng yaa tigim ‘kʋʋn-kãseng’ neb sẽn yit soolem fãa tɩ b balm-a yaoolem dayã sẽn yaa toodã pʋgẽ wã. (Mat. 24:45; Wil. 7:9; 2 Tɩm. 3:1) Ezai 2:2, 3 wilgdame tɩ kʋʋn-kãngã tigisgã na n zĩnda yaoolem dayã. Yʋʋmd fãa, b ket n tigimda nebã dũni kãngã toogã la nen-kɛglmã sẽn wɛ wã pʋgẽ.
Yʋʋmd 2004, b sagl-d-la neer tɩ d segd n saka a Zezi gom-kãensã: ‘Bɩ y gũusi . . . Bɩ y segle.’ (Mat. 24:42, 44) Sɩd-sɩda, yɛl nins sẽn maand dũniyã zugã tara võor wʋsg ne kiris-nebã sẽn ne ‘bãnã sẽn wilgd wakatã,’ la b tʋmdame tɩ zemsd ne rẽ. (Mat. 16:1-3) Sẽn na yɩl n pids a Gomdã, kɩɩsg buud fãa taoore, a Zeova na n kell n zĩnda ne a nin-buiidã sẽn tʋmd a tʋʋmdã.
Baa ne neb kẽer sẽn maood n gɩdgdẽ bɩ n dat n kɩt tɩ d bas Wẽnnaam Rĩungã moonegã, d saam-biisã ket n togsda sɩd koɛɛgã la b tigimd taaba. (Tʋʋ. 5:19, 20; Heb. 10:24, 25) Yʋʋmd 2004 sigr kiuugã pʋgẽ, Risi tẽngã bʋ-kaoodb sẽn be Mosku wã zemsa taab n dɩk noor n gɩdg a Zeova Kaset rãmba tʋʋm n pag b tʋʋmdã biru sẽn be galʋ-tẽn-kãng pʋgẽ wã. Baasg zãnga, d saam-biisã pa komsd raood ye, b mii Wẽnnaam sẽn baood tɩ b maan bũmb ningã, la b sakda Wẽnnaam n yɩɩd nebã. (Tʋʋ. 5:29) D kɩsa sɩd tɩ baa ne bʋ-kaoodbã gɩdgr fãa, a Zeova na n kell n wilga a tʋm-tʋmdbã sore.
Yʋʋm sẽn nan pa kaoos pʋgẽ, b piga tõnd saam-biisã sẽn be Repiblik de Zorzi wã n dees b teedo, tɩ neb sũ taab n pãb-b n yõog b sɛbã bugum. Baasg zãnga, zab-teoog ning fãa b sẽn maan n na n zab ne tõnd saam-biisã pa tõog ye. (Ezai 54:17) Yʋʋmd 2004 tʋʋmd yʋʋmdã pʋgẽ, Zorzi bʋ-kaoodbã lebs n saka a Zeova Kaset rãmbã tʋʋmd b tẽngẽ wã. D saam-biisã maana tigis-kãsems be tɩ tiisg pa zĩndi, la d sɛbã kẽeda tẽngã pʋgẽ masã tɩ gɩdgr kaẽ ye. Koe-moondbã la Tẽegrã watb sõor paasame.
Armeni, Eritre, Repiblik de Kore, Ruwãnda la Tirkemenistã, b paga tõnd saam-biis bãens rotẽ b tẽebã yĩnga. Baasg zãnga, sẽn zems ne Gʋlsg Sõamyã, b mii bũmb ning sẽn kɩt tɩ b namsd-bã, tɩ sõngd-b tɩ b ket n sakd a Zeova n gũudẽ t’a fãag-ba.—1 Pɩɛ. 1:6; 2 Pɩɛ. 2:9.
Y sã n vaees yʋʋmd 2004 tʋʋmd yʋʋmdã kibay sẽn be yʋʋmd 2005 wao-fugdg kiuug 1 daar Gũusg Gasgã pʋgẽ wã, y sũur na n yɩɩ noog wʋsg bõn-sõma nins a Zeova sẽn maanã yĩnga. (Yɩɩl 31:20; 65:12) D saagdame tɩ kiba-kãensã na n kenga y raood tɩ y ket n kẽnd tɩ tat Wẽnnaam yam.—1 Tes. 4:1.
D ket n maooda wʋsg sẽn na yɩl n taas sɩdã neba buud fãa. Wala makre, d yiisa kasɛt video rãmba, DVD rãmb la teed a taab ne mugsã goam la sɛb zoensã yĩnga, sẽn na yɩl n sõng mugsã la zoensã tẽebã wɛɛngẽ. Rĩungã koe-moondb wʋsg zãmsa buud goam a taab sãamb sẽn be b tigingã moonegã zĩigẽ sẽn gomde.
Sẽn paase, b sigla sul-kobs zĩis nins taab sẽn yaẽ toogã. Tʋʋmdã will a yembr tara hal sẽn yɩɩd sul 300 sẽn be zĩ-zãrsẽ tɩ sul-kãens fãa sẽn naag taab tar sẽn yɩɩd koe-moondb 7 000. Woto sɩd yaa sõor sẽn wilgd tɩ tigims paals n na n wa zĩndi! Rɩẽ tʋʋmd yʋʋmdã sasa, neb 16 760 607 wã sẽn wa Tẽegrẽ wã, sẽn yɩɩd bãmb milyõ 10 n pa Kaset rãmba. Woto wilgda vẽeneg tɩ tigisgã ketame.
D pʋʋsda a Zeova barka, a sẽn ning-d bark wʋsgã, la a sẽn get d yell ne nonglem wakat fãa wã. (Yel. 10:22; Mal. 3:10; 1 Pɩɛ. 5:7) D gãda taab nus n kẽngd taoor ‘yaoolem wakat’ kãensã pʋgẽ n teeg a Zeova zãng-zãnga. Yell ning fãa d sẽn wa n seg bɩ d gãd yʋʋmd 2005 verse wã goam d yamẽ. A yetame yaa: ‘Mam sõngr yita a Zeova nengẽ.’ (Yɩɩl 121:2) Bãng-y tɩ d nong-y lame, la tɩ d pʋʋsda y yĩnga.
Yãmb saam-biisã,
A Zeova Kaset rãmbã Siglgã taoor lʋɩtb sulli