Tʋʋmdã will biru

Rĩungã koe-moondba,

Yaa vẽeneg t’a Zeova ninga d rɩẽ tʋʋmdã yʋʋmd barka. So-toak yel-gɛtbã lekoll a ye sẽn be Togo t’a to be Kamerunnã sõnga yel-gɛtbã wʋsg b tʋʋmdã pʋgẽ. So-pakrã lekoll me tʋma ne a seb-paallã rɩẽ. B sẽn bool saam-biis nins sẽn da sɩng n yaa so-pakdb yʋʋm wʋsg pʋgẽ wã tɩ b lebs n maan lekollã, sɩd yɩ-b-la noog wʋsgo. Repiblik Sãntrafrikɛn saam-biis nins sẽn lebgd sɛbã paama zãmsg b tʋʋmdã wɛɛngẽ la ordinatɛɛr paala. Sãmbg sẽn ka be, neb nins fãa sẽn deeg zãms-kãensã wã tʋʋm sõmblem na n paasame, tɩ rẽ na n naf tigimsã.—Ezai 54:13.

Yʋʋm-vẽkr kiuugã kũumẽ, Togo paama koe-moondb 13405. La kiuug ning sẽn pʋglã, politikã yɛl waa ne tẽn-dãmbg tɩ zab zĩnd zĩis wʋsg pʋsẽ. Rẽ yɩɩ sabab tɩ tõnd saam-biis kẽer ges tɩ yaa yam tʋʋmd tɩ b zoe n kẽng tẽn-yagsẽ, la bãmb sʋkã, wʋsg lebg n waa b yiya. D tagsdame tɩ lɛt-kãngã ne a na n ta-y tɩ misioneer dãmbã sẽn da yi be wã zoe n lebame. Baa ne zu-loe-kãensã fãa, tʋʋlg la tʋʋl-nif kiisã pʋgẽ, sõngr so-pakdbã sõor zãng yɩɩ neb 3800.

D yãame t’a Zezi kũumã Tẽegr wakate, zĩig fãa, tʋʋmdã paasame. Tʋʋlg kiuugã pʋgẽ, Gãmbi koe-moondbã maana modgr wʋsg n paam lɛɛr 13,6 b sẽn pʋɩ tɩ zemse, Senegall saam-biisã me paama lɛɛr 13,7 b sẽn pʋɩ tɩ zems tʋʋl-nif kiuugã pʋgẽ. Gine Bisao paama koe-moondb 114 tʋʋl-nif kiuugã pʋgẽ. B sã n mak rẽ ne b sẽn paam rɩẽ wã, neb koabg zugu, yaa neb 21 n paase. Kamerun koe-moondb 30241 wã pʋɩya zʋrno rãmb 615505 sig-noy kiuugã pʋgẽ tɩ rẽ yaa sõor b sẽn da nan zɩ n paame.

Rĩungã Rot meeb tʋʋmd me paama barka. Togo, b paka Rĩungã Roog a ye tʋʋl-nif kiuugã pʋgẽ tɩ yaa rẽ n tõkd 100, tɩ b sẽn pak a soab Kamerun sig-noy kiuugã pʋgẽ wã kɩt tɩ yaa be Rĩungã Rot 163 soaba. Sull a ye yãka yam n na n zãms saam-bi-pogsã rotã meeb tʋʋm toor-toore. Neb kẽer sẽn yã pagbã tɩ b be b tʋʋmdã zugã, b yeela woto: “Ad pʋg-kãensã sẽn yaa a Zeova Kaset rãmbã yaa ro-metb sẽn sɩd tar minim tɛkẽ.”

D sɩd tara mi-beoog wʋsg ne a Zeova, a sẽn ning d bark wʋsg rɩẽ tʋʋmdã yʋʋmd pʋgẽ wã. Y zemsa ne pẽgr y sẽn tʋm ne yẽesem n kɩt tɩ Rĩungã tʋʋm kẽng taoorã. D sẽn sɩngd tʋʋmd yʋʋm-paallã, bɩ a Zeova ning-d barka, d sẽn na n naag taab n tʋm a ‘naamã waoogr’ yĩngã.—Ef. 1:12.

Y saam-biisã,

Tʋʋmdã will biru