Filiyallã lɛtrã

Rĩungã koe-moondba,

Yʋʋmd 2007 tʋʋmdã yʋʋmd sasa, d sũy yɩɩ noog ne tʋʋmdã sẽn kẽng taoor tẽns nins fãa sẽn karemd Rĩungã Tʋʋmd kãngã wã pʋsẽ! Tẽns wʋsg pʋsẽ, koe-moondbã sõor paasa wʋsgo. D ges so-pakdbã sõor sẽn paas to-to. Kamerun b sõorã taa 2085, Gine Bisao b sõorã taa 20, Senegall b sõorã taa 83, Togo b sõorã taa 930. Tẽnsã fãa la bal koe-moondb sõor paasa wʋsgo. Wala makre, Burkĩna Faso ne Gãmbi koe-moondbã sõor paasame. Tʋʋlg kiuugã sasa, Burkĩna koe-moondbã sõor taa 1239 tɩ Gãmbi koe-moondbã sõor ta 190. B kɩtame tɩ neb wʋsg sẽn da tʋmd Betɛllẽ bɩ meebã tʋʋmd pʋgẽ lebg zall so-pakdb la wakat fãa so-pakdba. Bãmb sʋkã, kẽer maana Wẽnnaam tʋʋmdã zãmsg lekolle, tɩ kɩt tɩ b tõe n sõng neb wʋsg koɛɛgã mooneg pʋgẽ n paase.

Tẽns 13 wã pʋsẽ, b pʋɩya Rĩungã kibay No. 37 soabã gom-zug sẽn yaa “Ziri tũudmã saab kolgame!” wã sẽn na ta milyõ a tãab tɩ wom biis sõma. Wala makre, Repiblik Sãntrafrikɛn bala, b pʋɩya seb-vãad 92039. Benẽ, koe-moondbã pʋɩya seb-vãad 470214. Pag a ye sẽn vɩ Porto-Novo n paam seb-vãoog a ye, la a sẽn karem-a n sa, a bãngame tɩ rẽ la sɩdã. A sẽn wa n ta a yirã, a baoa a Zeova Kaset rãmbã zĩig n tɩ yã zak n tẽed tɩ b tigisda taab be. A yalsa zĩ-kãng n tẽed tɩ ned n na n wa. Saam-biig n da pɩʋʋgd n yãa-a n tall-a tɩ b kẽng Rĩungã Roogẽ. Rẽ tɛka, a na zɩɩ n vaal tigissã ye. Baa ne sɩngrẽ wã a sɩdã sẽn da pa sakã, masã yẽ meng kẽngda tigissã. Pʋg-kãngã kẽnga yʋʋmd 2006 rasem a tãab tigis-kãsengã menga.

Seb-vãadã pʋɩɩb yaa sẽn na yɩl n sõng pʋ-peelem dãmbã tɩ b bãng Biiblã sẽn sɩd yet bũmb ninsã. (Matɩe 28:19, 20) Y sã n wa moondẽ, bɩ y tẽeg n gʋls neb nins fãa sẽn wilg tɩ b rat n bãng n paasame wã yʋya, la y lebg n tɩ ges-b n sɩng Biiblã zãmsg ne-ba. D sũy nooma wʋsg d sẽn lagem yãmb n tʋmd tʋʋm kãngã sẽn yaa kãsengã, la bãng-y tɩ d nong-y la wʋsgo.

Yãmb saam-biisã,

Tʋʋmdã will biru