Kom-bɩɩse, maan-y yẽbgr sẽn tar pãng beoog yĩnga
1. Bõe yĩng tɩ kom-bɩɩs nins sẽn yaa kiris-nebã segd n bao tẽeb sẽn tar pãnga?
1 Yãmb tagsdame tɩ bõe n tar yõod n yɩɩda? Yãmb tagsda bõe yelle? Bũmb nins sẽn pak yãmb n yɩɩdã yaa masã yɛlã bɩ, bɩ yaa bũmb nins Wẽnnaam sẽn kãab tɩ wat beoog-daarã? (Mat. 6:24, 31-33; Luk 8:14) Wala a Abrahaam ne a Moiiz makrã sẽn wilg bũmb ningã, ned segd n talla tẽeb sẽn tar pãng n tõog n vɩɩmd tɩ zems ne Wẽnnaam kãabsã. (Heb. 11:8-10, 24-26) Wãn to la y tõe n paam tẽeb kãng buud la y maan ‘yẽbgr sẽn tar pãng beoog yĩnga’?—1 Tɩm. 6:19.
2. Bõe la Rĩm a Zozɩas makrã zãmsd tõndo?
2 Bao-y a Zeova: Yãmb sã n naagda y zaka rãmb n maand tẽebã yɛla, y zemsa ne pẽgre. Ra kʋmb-y n tags bal tɩ y sẽn naagd y zakã rãmb n maand tẽebã yɛl woto wã na n kɩtame tɩ y tall tẽeb sẽn yaa kãn-kãe nana-nana ye. Yãmb mengã togame n bao a Zeova n tõog n paam ‘a Zeova bãngre.’ (Yel. 2:3-5; 1 Kɩb. 28:9) Rĩm poll a Zozɩas maana woto. Baa a sẽn da be ne neb tɩ b manesmã pa sõngd-a t’a bɩt tẽebã wɛɛngẽ wã, a ‘sɩngame n baood a yaab a Davɩɩd Wẽnnaam,’ a sẽn da wa n tar yʋʋm 15.—2 Kɩb. 34:3.
3. Wãn-wãn la kiris-neb nins sẽn yaa kom-bɩɩsã tõe n bao a Zeova rũndã-rũndã?
3 Wãn to la y tõe n bao a Zeova? Yaa y sẽn na n vaees yãmb sẽn tẽedã neere, n sɩd ‘bãng’ tɩ yaa sɩdã la woto. (Rom 12:2) Wala makre, y tõe n wilga Biiblã sẽn yet bũmb ning zɩɩmã wɛɛngẽ, bɩ y kõ kaset sẽn wilgd tɩ Wẽnnaam Rĩungã naam sɩnga yʋʋmd 1914 saasẽ bɩ? ‘Sɩdã bãngr paoong’ tara yõod wʋsg sẽn na yɩl n tõog n maan yẽbgr sẽn yaa sõma beoog yĩnga.—1 Tɩm. 2:3, 4.
4. Wãn to la koe-moondb sẽn ka reeg lisg tõe n maan tɩ nebã yã tɩ b bɩtame?
4 A Zozɩas Wẽnnaam baoobã naf-a-la sõma. A sẽn da nan ka ta yʋʋm 20 menga, ne raoodo a yiisa ziri balengã tẽngã pʋgẽ. (2 Kɩb. 34:3-7) Woto me, yãmb sã n bɩt tẽebã wɛɛngẽ, rẽ na n puka y tʋʋmẽ wã. (1 Tɩm. 4:15) Yãmb sã n yaa koe-moond sẽn ka reeg lisgu, bɩ y modg n paas y koe-moonegã sõmblem. Ra kãabd-y nebã sɛb bal ye. Bao-y n tʋmd ne Biiblã, n kɩtdẽ tɩ nebã tagsd sõma y sã n wa yẽsd ne-ba, n sõngd nebã y sẽn moondã tɩ b ket n dat n bãng n paase. (Rom 12:7) Rẽ na n sõnga yãmb tɩ y bɩ tẽebã wɛɛngẽ.
5. So-bʋs n pags n kõ kiris-neb nins sẽn deeg lisgã tɩ b tõe n tʋm n paas b Wẽnnaam tʋʋmdã pʋgẽ?
5 Maan-y y sẽn tõe fãa a Zeova yĩnga: Yãmb sẽn deeg lisg n wilg tɩ y rɩka y meng n kõ a Zeova wã, y lebga Wẽnnaam sõgen b sẽn kõ sore. (2 Kor. 3:5, 6) Rẽ pagsa soay n kõ-y tɩ y tõe n kẽ Wẽnnaam a Zeova wakat fãa tʋʋmdã pʋgẽ, wala so-pakrã tʋʋmde, Betɛllã tʋʋmde, misioneer tʋʋmde, la tẽn-tẽns sõgen dãmbã tʋʋmde. Sẽn paase, y ket n tõe n paasa y tʋʋmdã koe-moonegã pʋgẽ, y sã n zãms buud-gomd a to, bɩ y sã n tɩ maan Wẽnnaam tʋʋmdã zĩig ning raab sẽn yaẽ kãseng n yɩɩdã.
6. Wãn-wãn la tõnd fãa tõe n maan yẽbgr sẽn yaa sõma beoog-daar yĩnga?
6 Yaa sɩd tɩ ka neba fãa n tõe n maan zu-nood tʋʋm-kãensã ye, la tõnd ned kam tõe n maana a sẽn tõe fãa a Zeova yĩnga. (Mat. 22:37) Baa yãmb yɛlã sẽn yaa to-to fãa, tik-y y vɩɩmã a Zeova raabã maaneg zugu. (Yɩɩl 16:5) Y sã n maand woto, y na n maana yẽbgr sẽn yaa sõma beoog yĩnga.