Tall-y yam ning a Zezi sẽn da tarã
1. Yam bʋg buud la a Zezi ra tara?
1 Baa ne tõnd mengã sẽn zɩ n yã Wẽnnaam Biriblã, ne a Zezi vɩɩmã la a tʋʋmã kɩbar b sẽn gʋlsã maasem, d wa n nong-a-la ne nonglem sɩd-sɩda. (1 Pɩɛ. 1:8) A saka a Ba wã raab n bas ziir zĩig saasẽ n wa tẽng zugu. A sẽn da wa n yaa ninsaalã, a ka ges a meng yell bal ye, a sõnga neb a taabã, la a kõ a meng vɩɩm ãdem-biisã yĩnga. (Mat. 20:28) Wẽnnaam Gomdã sagenda tõnd woto: “Bɩ y paam yam ninga Kirist Zezi sẽn da tarã.” Wãn to la d tõe n dɩk a Zezi togs-n-taar mong-m-mengã wɛɛngẽ.—Fil. 2:5-8.
2. Mak-bʋg la kiris-neb wʋsg segda, la bõe n tõe n sõng-b tɩ b tõog mak-kãnga?
2 D sã n ya: A Zezi ne a sẽn da zems zãngã, a ra yaadame. Vugri, ‘a Zezi ra kẽn n yɛɛme’, la a kõo Samari poak kaset sõma. (Zã 4:6) Rũndã-rũndã, kiris-neb wʋsg segda makr a woto me. B sã n tʋm semenã pʋgẽ n yɛ, tõe n yɩɩ toog ne-b tɩ b leb n paam pãng n moon koɛɛgã. La d sã n yaool n moond koɛɛgã n ka vaandẽ, d na n mikame tɩ rẽ kengda d tẽebã.—Zã 4:32-34.
3. Wãn to la d tõe n maan togs-n-taar ne a Zezi sẽn da sakd n zãmsd neb a taabã?
3 Vugri, a Zezi ne a karen-biisã kẽnga zĩig neb sẽn ka beẽ n na n tɩ vʋʋs bilfu. La kʋʋngã bãnga b sẽn da rabdẽ wã n zoe n deng taoor n tɩ gũud-ba. Rẽ ka sãam a Zezi sũur ye, ‘neba nimbãaneg yõk-a lame’ t’a sɩng n ‘zãmsd bãmb bũmb wʋsgo.’ (Mark 6:30-34) D segd n talla yam a woto buud me n tõog n sɩng la d maan Biibl zãmsg ne nebã. Rẽ baoodame tɩ d ket n modgd wakat fãa, la d tar nonglem hakɩk ne nebã. Yãmb sã n nan ka tar Biibl zãmsg masã, bɩ y ket n baoodẽ.
4. Wãn to la sõngr so-pakrã tõe n sõng-d tɩ d tall yam ning Kirist sẽn da tarã?
4 Ning-y tẽebã yɛl pipi zĩigẽ: Sõngr so-pakrã tʋʋmd tõe n sõng-d lame tɩ d tik d yamã Wẽnnaam tʋʋmã zutu. Saam-bi-poak a ye sẽn yaa bi-bɩɩg yeelame: “Mam zoa a yembr ma n sagl yẽ ne maam tɩ d naag-a n yɩ sõngr so-pakdb kiuug a yembre. M sũur sɩd yɩɩ noog d sẽn naag-a n maan sõngr so-pakrã. Mam paamame n bãng m saam-biisã la m saam-bi-pogsã n paase, la pa kaoos la b lebg wala m zak neb ye. M leb n paamame n sõs ne nebã naoor wʋsg a Zeova wɛɛngẽ, la m zãms-b sɩdã sẽn be yamleoogã Rĩungã wɛɛngẽ. Woto fãa kɩtame tɩ mam neẽ tɩ m pẽnega a Zeova ne a siglgã n paase.”—Yɩɩl 34:9.
5. Bõe yĩng tɩ d segd n ket n modgd n talld yam ning a Zezi sẽn da tarã?
5 Tõnd fãa maooda ne d pa-zems-zãngã la d rat n ta a Zeova yam. (Rom 7:21-23) D tog n kɩɩsa dũniyã laas-laas yamã. (Mat. 16:22, 23) A Zeova tõe n tũnuga ne a vʋʋsem sõngã n sõng-d tɩ d tõog zab-kãngã. (Gal. 5:16, 17) D sẽn gũud tɩ Wẽnnaam wa fãag-d n kẽes a dũni paalg sẽn yaa tɩrgã pʋgẽ wã, bɩ d tall yam ning a Zezi sẽn da tarã, n lʋɩɩsd Rĩungã la neb a taabã yɛl tõnd dẽndã taoore.—Mat. 6:33; Rom 15:1-3.