Mizik sẽn kengd pɛlga
1 Yɩɩl la mizik tara yõod wʋsg baleng hakɩkã pʋgẽ. Tẽn-kʋdem wẽndẽ Israɛllã pʋgẽ, a Azaf ne a saam-biisã yɩɩla woto: “Bɩ y waoog [a Zeova]. . . . Bɩ y yɩɩl bãmb yĩnga, yɩɩl-y ne yʋʋm teed bãmb yĩng n togs bõn-bãna fãa.” (1 Kɩb. 16:8, 9) Rũndã-rũndã, tõnd yɩɩnd n pẽgda a Zeova tõnd tigissẽ wã semen fãa. (Ef. 5:19) Ad d sɩd tara zu-noog sẽn yaa kãseng n na n pẽg a yʋʋrã.—Yɩɩl 69:31.
2 D sã n kelgd Rĩungã mizik (Mélodies du Royaume), sẽn yaa mizik b sẽn dɩk Rĩungã yɩɩl n maanã tõe n kɩtame tɩ d yamã tik tẽeba yɛl zugu. Saam-bi-poak a ye yeelame: “Mam sã n kelgd mizikã, yɩɩlã goam wata mam yamẽ wã. Ad wã yaa bõn-sõng sẽn kɩt tɩ d tõe n kelgd mizik la d tagsd a Zeova yelle!”—Fil. 4:8.
3 Wakat la zĩis nins d sẽn tõe n kelg-bã: D sã n ningd Rĩungã mizik yiri, kɩtdame tɩ zakã neb tagsd tẽebã yɛl sẽn be yamleoogã zutu, tɩ rẽ kɩt tɩ b yamã gãe bãane. Zak a yembr neb gʋlsame: “D zaka la d mobillã pʋgẽ, d ningda mizig-kãens n yɩlemdẽ, la d yam zɩ n yi ne-b ye, bala b bee yamleoogo. Naoor wʋsgo, Rĩungã mizik kelgr kɩtdame tɩ d tar tagsg sẽn yaa sõma, d sã n wa segend n na n kẽng tigissã, bɩ d sã n wa rabd tigis-kãsengẽ.” Saam-bi-poak a yembr yeelame: “B kelgr sɩd kengda mam pɛlga, m sã n wa tʋmd zakã tʋʋma. Sã n ka rẽ, ned ra ka tõe n tagse, tɩ m sã n wa kʋʋd m futã m na n talla sũ-noog ye. M sã n wa koms raoodo, m ningda mizik kãngã. A sɩd noogda sũur sõma! . . . Yɩɩll fãa kõta sũ-noogo.” Rẽ yĩnga wakat n be tɩ mizik a woto sẽn kengd pɛlgã tõe n naf-y bɩ?
4 Mizik wʋsg sẽn be tõnd wakatã wilgda dũniyã yam. Roagdbã tõe n sõnga b kambã tɩ b nong mizig-sõma, b sã n ningd Rĩungã mizik tɩ b kelgdẽ. Sẽn zãmsdb Biiblã, la neb a taabã me sẽn nong sɩdã sũy na n yɩɩ noogo, b sã n bãng tɩ mizig-nood a woto sẽn pẽgd a Zeova la sẽn kengd pɛlg n be.—Yɩɩl 47:2, 3, 7, 8.