Wẽnnaam tʋʋmdã zãmsg lekoll yaa kʋɩlen-kãseng sẽn pak tʋʋmd yĩnga
1 A Zeova tũnuga ne no-rɛɛs a Zeremi n deng n togs woto: “Mam na n kõo [m nin-buiidã] nanambs sẽn na n zã-ba tɩ b ra le zoe rabeem n yɛɛs ye, la tɩ b ned ba a ye ra le menem ye.” (Zer. 23:4) B maanda pe-kɩʋʋng tʋʋmd a woto rũndã-rũndã neb sẽn yit tẽnsã fãa pʋsẽ sʋka. Tigims kãsem dãmb tusa n maand pe-kɩʋʋng tʋʋm-kãngã. Sẽn paase, kom-bɩɩs sõor sẽn waoog wa meenem n dɩk b mens n kõ a Zeova n na n maan a tʋʋmdã. (Yɩɩl 110:3) Saam-bi-kãensã sẽn yaa sik-m-mens rãmbã sɩd yaa bark bũmb n kõ Wẽnnaam nin-buiidã tigimsi! Tigisgã tʋʋmd ket n kẽngda taoor tẽebã wɛɛngẽ, rẽ n so tɩ b ket n dat tɩ rap nins sẽn tar zʋg-sõma nins sẽn segdã sak n tʋm n sõng b saam-biisã.
2 Wẽnnaam tʋʋmdã zãmsg lekoll yaa bõn-sõng b sẽn maane, n na n zãms kãsemb la kãsemb sõngdb sẽn yaa rakõap Wẽnnaam tʋʋmdã. B sẽn pak lekoll kãngã yʋʋmd 1987 wã tɛkã, karen-biis sõor sẽn yɩɩd 22 000 sẽn yit tẽns 140 pʋsẽ n paam zãmsg karen-dot 999 pʋsẽ. Lekollã sɩd yɩɩ ‘kʋɩlen-kãseng sẽn pak tʋʋmd yĩng’ n kõ saam-bi-kãensã.—1 Kor. 16:9.
3 Lekollã bõn-datla: Wẽnnaam tʋʋmdã zãmsg lekoll bõn-datl yaa zãms rap nins sẽn tar zʋg-sõma nins sẽn segdã tɩ b wa tõog n maan tʋʋm toɛy-toɛy zĩig ning raab sẽn beẽ siglgã pʋgẽ. Lekollã kɩtdame tɩ b tõe n lʋɩ taoor moonegã tʋʋmd pʋgẽ, pe-kɩʋʋngã tʋʋmd pʋgẽ, la neba zãmsg tigingã pʋgẽ sõma n paase. Karen-biis kẽer sẽn karem n sa poore, b yãk-b lame tɩ b yɩ zall so-pakdb bɩ kaagr yel-gɛtb b mens tẽnsẽ bɩ tẽn-zẽmse. B tʋma karen-biis a taab tɩ b leb n tɩ sõng b mens tigimsi, bɩ tɩ b kẽng zĩis a taab raab sẽn yaẽ kãseng Sosiete wã tʋʋmdã will sẽn get babg ningã pʋgẽ.
4 Karen-biisã zãmsda Biiblã hal sõma semen a nii wã pʋgẽ. B vaeesda Biiblã zãmsg toɛy-toɛy wʋsgo, n paas pe-kɩɩm zɩɩbã toɛy-toɛyã sẽn yaa b rãmba, la noy sẽn wilgd b sẽn tõe n welg yɛl to-to kiris-ned vɩɩmã pʋgẽ. B leb n zãmsda Gʋlsg Sõamyã sẽn wilgd bũmb ning yel-gesgã, bʋ-kaoorã, la yɛlã sẽn sigind to-to wã wɛɛngẽ. B paamda zãmsg takɩ sẽn wilgd b sẽn tõe n sõs ne zãma to-to, la sõngr sẽn na yɩl n bɩ tẽebã wɛɛngẽ tao-tao.
5 Yɛl nins b sẽn baoodã: Yaa vẽeneg tɩ yɛl nins b sẽn baood sẽn dat-b n kẽng lekoll kãngã wã nengẽ yaa wʋsgo. Sẽn dat-b n kẽng lekollã segd n yaa kãsem dãmb bɩ kãsemb sõngdb sẽn na maan yʋʋm a yiib sẽn pʋg taab bɩ sẽn yɩɩd woto. B fãa tog n yaa rakõap sẽn tar yʋʋm 23 n digd 50. Lekollã rabdb tog n gomda lekollã sẽn na n maan buud-gomd ning pʋgẽ wã sõma la b mi a kareng la gʋlsgo. Sẽn paase, b tog n tara laafɩ, n ka baood tɩbsg bɩ rɩɩb buud takɩ wakat fãa ye. B sẽn nong n yɩɩd yaa b rãmb nins sẽn yaa wakat fãa so-pakdbã.
6 Lekollã rabdb tog n sakame la b tõe me n tɩ tʋm zĩig ning b sẽn dat-bã. Rẽ baoodame tɩ b tall yam ning no-rɛɛs a Ezai sẽn tallã, n sak n kõ a meng n na n maan tʋʋmd ning Wẽnnaam sẽn tʋm-a t’a tɩ maanã. A yeelame: “Ad maam, bɩ y tʋm maam.” (Ezai 6:8) A ra yɩɩ sik-m-meng soab me a vɩɩmã tõr fãa pʋgẽ. Bũmb ning sẽn segd n kɩt tɩ ned tʋlg n kẽng Wẽnnaam tʋʋmdã zãmsg lekollã yaa a sẽn nong a saam-biisã n dat n tʋm n sõng-bã yĩnga, pa a sẽn dat naam bɩ taoor yĩng ye. D tẽedame tɩ b sã n karem karen-kãngã sẽn yaa sõma wʋsgã n sa poore, lekoll-kãngã karen-biis na n tũu bũmb ning b sẽn zãmsã tɩ naf neb a taabã.—Luk 12:48.
7 Lekollã nafa: B rɩlga karen-biisã ne ‘tẽeb koɛɛg la karen-sõng’ kiis a nii wã b sẽn paam zãmsg wʋsgã pʋgẽ. (1 Tɩm. 4:6) Rẽ na n kɩtame tɩ b tõog n sõng neb a taabã la b keng b raoodo, tigims bɩ tigims gĩn nins pʋsẽ b sẽn na n tʋm-bã. Zĩis wʋsg b sẽn tʋmẽ sẽn maan-b lekollã, koe-moonegã paasame, neb sãnda lebga so-pakdba, sẽn yɩɩd fãa kom-bɩɩsã sʋka, la nin-paals wʋsg sẽn be Wẽnnaam nin-buiidã sʋkã paama sõngr n paase.
8 Yãmb yaa kãsem soab bɩ kãsemb sõngd sẽn yaa rakõor n tar yʋʋm 23 la 50 sʋk bɩ? Bõe yĩng tɩ y ka na n bao n kẽng Wẽnnaam tʋʋmdã zãmsg lekolle? Yãmb yaa saam-biig sẽn tar bõn-datɩ beoog-daar yĩng a Zeova balengã pʋgẽ bɩ? Bõe yĩng tɩ y ka na n mao tɩ yɛl ra gĩd bɩ tiis y vɩɩmã, sẽn na yɩl n tõog n ‘kẽ kʋɩlen-kãsengã sẽn pak tʋʋmd yĩngã’? Rẽ tõe n kõo yãmb sũ-noog wʋsgo. N-ye, Wẽnnaam tʋʋmdã zãmsg lekoll sɩd nafa karen-biisã, la ka bãmb bal ye, a leb n nafa Wẽnnaam nin-buiidã tigims dũniyã gill zugu.
[Zĩ-gũbri, seb-neng a 3]
Zãmsgã sẽn naf-b to-to
“Zãmsgã m sẽn paamã manega mam koe-moonegã, la kɩt tɩ m tõe n tall yam pe-kɩʋʋngã tʋʋmd pʋgẽ, n tũnugd ne verse rãmbã sõma.”
“Lekollã kɩtame tɩ mam tar bas-m-yam wʋsgo, m sã n maand tʋʋm toɛy-toɛy tigingã pʋgẽ.”
“A toeema mam vɩɩmã nens fãa la bala, wala makre, mam sẽn da tagsd to-to ne Wẽnnaam seglsã la a siglgã.”
“Zãmsgã mam sẽn paamã sõnga maam tɩ m bãng tɩ m segd n sakame n tɩ tʋm zĩig ning b sẽn dat sõngrã.”