Yãmb sogsgã leoore

◼ D sã n dat n kõ kũun tẽns a taab saam-biis sẽn be sõngr daab pʋgẽ yĩnga, manesem bʋg n zems n yɩɩda?

Wakat ninga d wʋmdame tɩ tẽng a to saam-biis n be laog raab pʋgẽ, namsg b tẽebã yĩnga, sabaab sẽn paam-ba, bɩ zu-loees a taab yĩnga. Rẽ kɩtame tɩ saam-biis kẽer tool Sosiete wã tʋʋm wil sẽn be tẽn-kãensã ligdi, n kos tɩ b rɩk ligdã n sõng nina, tiging ninga, bɩ b rɩk-a n maan tʋʋmd takɩ.—2 Kor. 8:1-4.

Yaa sɩd tɩ nonglem wilgr woto ne b tẽed-n-taasã yaa bũmb sẽn zems pẽgre, la raab toɛy-toɛy n be n mi n yaa yãgb yell n yɩɩd b rãmb nins sẽn be kõatã yamẽ wã. Wakat ninga, mikdame tɩ yell takɩ ning kõatã sẽn kõ ligdã tɩ b rɩk n manegã zoe n welgame. Yaa vẽeneg tɩ d tõe n talla bas-m-yam tɩ kũunã b sẽn toond Sosiete wã tʋʋmd willẽ dũni gill tʋʋmdã yĩngã, Rĩungã Rot meeb yĩngã, la sõngrã b sẽn kõt sabaab rãmbã yĩngã, b tʋmda ne ligd-kãens fãa tɩ zemsd ne kõatã sẽn dat to-to wã.

Saam-biis nins sẽn be Sosiete wã tʋʋmd wilã fãa pʋsẽ paama zãmsg sõma sẽn na yɩl tɩ raab sã n wa tiig n wa bɩ b yɩ tao-tao n sõnge. Sẽn sõs n yɩlga, wakat fãa, Sosiete wã tʋʋmd will wilgda Siglgã taoor-lʋɩtb sull bũmb ning fãa sẽn tɩ loe ne yellã. Sã n wa yaa tɩlae tɩ b kõ sõngr n paase, Siglgã taoor lʋɩtb sull tõe n kosa tʋʋmd wil nins sẽn pẽ be wã tɩ b sõnge, ka rẽ bɩ Siglgã taoor lʋɩtb sull kell n zĩnd dũni gill tʋʋmdã yẽgrẽ n tool tʋʋmd wil-kãng ligdã.—2 Kor. 8:14, 15.

Woto yĩnga, yaa tʋʋmd will ning sẽn be yãmb tẽngẽ wã la y segd n tool kũun nins fãa y sẽn kõt dũni gill tʋʋmdã, meeb sẽn met tẽns a taabẽ, bɩ n na n sõng sabaab sẽn maan yĩngã. Yaa ne yãmb tigingã maasem bɩ y toor la y segd n tool kũunã. Woto, ‘tʋm-tʋmd sẽn tũud sɩd la sẽn tar yamã’ na n tũnuga ne Siglgã taoor lʋɩtb sull sẽn sigl yɛlã to-to wã n ges saam-biisã raab yell dũniyã gill zug tɩ ra yɩ yaar ye.—Mat. 24:45-47; 1 Kor. 14:33, 40.