Babg a 9 soaba: D sẽn na n zãms nebã Biiblã to-to tɩ b bɩ tẽebã pʋgẽ
D segl karen-biisã tɩ b kõ kaset sẽn pa yãk wakatã
1 A Ãnder ne a Filip sẽn wa n bãng t’a Zezi la Mesi ning b sẽn kãabã, b ra pa tõe n pa togs neb a taab koe-kãng sẽn kõt sũ-noog wʋsgã ye. (Zã 1:40-45) Woto me, rũndã-rũndã, Biiblã karen-biis sã n wa tẽed bũmb nins b sẽn zãmsdã, b rat n goma rẽ yell ne neb a taabã. (2 Kor. 4:13) Wãn-wãn la d tõe n sõng-b tɩ b kõ kaset sẽn pa yãk wakatã, la wãn to la d tõe n segl-b tɩ b maan rẽ sõma?
2 Y tõeeme bal n sok karen-biigã a sã n zoe n goma bũmb ning a sẽn zãms Biiblã pʋgẽ wã yell ne neb a taaba. Tõe t’a tara zo-rãmb la neb a zakã pʋgẽ a sẽn tõe n bool tɩ b wa naag-a a zãmsgã sasa. Sok-y-yã n ges a sã n tara tʋmd-n-taase, karen-bi-taas wall neb a taab sẽn tʋll n wʋm koe-noogã. Sã n yaa woto, a tõe n sɩnga bãmb kasetã kũuni. Sõng-y-yã t’a bãng t’a sã n na n gom a Zeova la a raabã yell ne nebã, a tog n talla yam la sũ-mare, la a waoog-ba.—Kol. 4:6; 2 Tɩm. 2:24, 25.
3 B sẽn na n taas neb a tãabã b tẽebã to-to: Tara yõod wʋsg tɩ d zãms Biiblã karen-biis tɩ b tikd Wẽnnaam Gomdã zug n taasd neb a taabã b tẽebã. Tũus-y tagsa kẽer tɩ zãmsgã sasa bɩ y sok karen-biigã woto: “Wãn-wãn la fo na n tik Biiblã n wilg sɩd kãngã f zakã neda?” Wall “Biiblã verse bʋg zug la fo tõe n tik n wilg bõn-kãngã f zoa?” Kelg-y a sẽn na n leok to-to wã, la y wilg-a a sẽn segd n tik a zãmsgã Gʋlsg Sõamyã zug to-to. (2 Tɩm. 2:15) Y sã n maand woto, y segenda karen-biigã koe-mooneg sẽn pa yãk wakatã yĩnga, t’a sã n wa pids yɛl nins sẽn segdã, bɩ a tõog n naag tigingã neb n moone.
4 Yaa yam bũmb tɩ d segl Biiblã karen-biis tɩ b wa tõog kɩɩsgã b sẽn na n segã. (Mat. 10:36; Luk 8:13; 2 Tɩm. 3:12) Neb a taabã sã n sokdẽ wall b gomd a Zeova Kaset rãmba yelle, rẽ tõe n kõo Biiblã karen-biis segb tɩ b kõ kaseto. Seb-bil ning gom-zug sẽn yaa: A Zeova Kaset rãmbã: B yaa ãnd rãmba? Yaa bõe la b tẽeda? tõe n sõng-b lame tɩ b ‘bãng n leok ned ninga fãa sẽn sokd bãmb b tẽebã yelle.’ (1 Pɩɛ. 3:15) A tara kibay sẽn yaa takɩ neb nins sẽn nan zãmsd Biiblã sẽn tõe n tall n sõng b zo-rãmb la b zags neb sẽn gɩdgd-b n tẽed tɩ b maand-b-la neere, tɩ b bãng tõnd tẽebã la d tʋʋmã sẽn tar tikr Biiblã pʋgẽ wã.