Zakã neb tẽeb tʋʋm na-kẽndre—Koe-moonegã
1 A Zeova sũur yaa noogo, a sã n ne kom-bɩɩsã sẽn pẽgd a yʋʋrã. (Yɩɩl 148:12, 13) A Zezi wakatẽ wã, baa ‘kom-bõoneg la kamb sẽn ket n yẽsemdẽ’ pẽga Wẽnnaam. (Mat. 21:15, 16) Ket n yaa woto rũndã-rũndã. Roagdba, wãn-wãn la y tõe n sõng y kambã tɩ b yɩ neb sẽn pẽgd a Zeova ne yẽesem koe-moonegã pʋgẽ? Ka me, wala d sẽn wilg vẽeneg zugẽ sõsgã sẽn gomd tigingã tigiss yellã pʋgã, yaa mak-sõng ning yãmb meng sẽn kõtã n na n sõng n yɩɩge. Roagd a ye goma goam sẽn wilgd roagdbã fãa sẽn tagsd bũmb ning rẽ wɛɛngẽ n yeele: “Kambã pa maand yãmb sẽn yet ne noorã ye, yaa y sẽn maandã la b maanda!”
2 Saam-bi-poak a yembr sẽn paam wubr doagdb sẽn yaa wẽn-zoɛtb nusẽ yeelame: “Tõnd ra zɩ n yik sibr daar yibeoog n sok n ges d sã n na n yii koe-moonegã ye. D ra miime tɩ d na n yiime.” Wala woto, y tõe n kɩtame tɩ y kambã bãng koe-moonegã yõodo, n yãk ray takɩ semen fãa pʋgẽ zakã neb fãa sẽn na n yi n naag taab n moone. Rẽ na n kɩtame tɩ y kambã rɩk yam ne yãmb sẽn moond to-to wã, la kɩt me tɩ y tõog n gũus n ges b yel-manesmã la b koe-moonegã minim sẽn paasd to-to wã.
3 Zãmsd-y-b bilf-bilfu: Sẽn na yɩl tɩ kambã wa nong koe-moonegã, rẽndame tɩ b segl-b tɩ b moonegã yɩ sõma. Saam-bi-poak ning yell d sẽn da gomdã leb n yeelame: “Tõnd ra pa yit n yãagd d roagdbã b tʋʋmdã pʋgẽ n pʋgd n getẽ bal ye. D ra miime tɩ tõnd me segd n kẽesa d toogo, baa yaa soneri la d na n dĩ zak noor wall d kõ ned seb-vãoogo. B sẽn da segend tõnd neer tɩ d yaool n yi wɩkɛndã koe-moonegã yĩnga, kɩtame tɩ tõnd ra mi bũmb ning d sẽn segd n yeele.” Y tõe n dɩkda minit a wãn bal semen fãa zak pʋgẽ zãmsgã sasa wall wakat a to n segend y kambã koe-moonegã yiib yĩnga.
4 Y sã n naagd y zakã neb fãa n moondẽ, y tõe n tũnuga ne rẽ me n zãms y kambã sɩdã neere. Saam-biig a ye ne a bipugl ra kẽnda nao n kẽngd tẽng sẽn be kɩlometr 10 zĩigẽ n pʋɩt nebã seb-vãad la b lebgdẽ. Bipuglã wa n tẽega rẽ yell ne sũ-noog n yeel woto: “Yaa tõnd kẽn-kãens sasa la m baaba zãms mam sɩdã tɩ kẽ m sũur sõma.” (Tõo. 6:7) Wẽnd na kɩt tɩ yãmb me paam bark woto, y sẽn sigl n naagd y zakã rãmb semen fãa n moondẽ wã.