Zakã neb tẽeb tʋʋm na-kẽndre—Daar verse wã

¹ Roagdb sẽn tar nonglem modgda daar fãa n kõt b kamb rɩ-sõma. La yaa b sẽn na n dɩlgd b kambã ne tẽebã rɩɩb sẽn be Wẽnnaam Gomdã pʋgã n tar yõod n yɩɩda. (Mat. 4:4) Bũmb a ye y sẽn tõe n maan n kɩt tɩ y kambã wa nong tẽebã rɩɩb la kɩt tɩ b ‘bɩ fãagra yĩnga,’ yaa y sẽn na n dɩkd sẽk daar fãa ne y zaka rãmb n vaeesd daar verse wã ne a wɛgsgã. (1 Pɩɛ. 2:2) Yaa sasa bʋg la y tõe n gʋls-a y zakã neb tẽeb tʋʋm na-kẽndr zugu?

² Rɩɩbã wakate: Y sã n naagd y zakã rãmb fãa n sɩngd y raarã ne daar verse wã vaeesgo, tõe n kɩtame tɩ b tags a Zeova yell daarã tõre. (Yɩɩl 16:8) Ma a yembr dɩka sard n na n karemdẽ la a sõsd verse wã la a wɛgsgã zug ne a biig b no-soakã sasa, la a pʋʋs tɩ biigã yaool n kẽng lekollã. Woto sõnga biigã t’a tõog n pa kẽes a toog tẽn-nonglem yɛlẽ, n tõdg yoobo, la a kõ a karen-bi-taas la a karen-saam dãmb kasetã ne raoodo. Baa sẽn yaa yẽ a ye n da yaa Kaset soab a lekollẽ wã a zɩ n tags t’a yaa a yembr ye.

³ Y sã n mik tɩ y pa tõe n vaees verse wã ne y zakã rãmb yibeoogo, y tõe n naaga taab n vaees-a wakat a to. Tõe tɩ na n yɩɩ midi bɩ zaabr dɩɩbã sasa. Wakat kãnga, kẽer leb n sõsda koe-moonegã kibay la zĩis sẽn yɩ b noog b Biiblã kareng pʋgẽ zutu. Wʋsg tẽega bãmb ne b zakã rãmb sẽn da sõsd ne taab b rɩɩbã sasa wã yelle, n yeel tɩ yɩɩ sũ-noog wakate.

⁴ Yʋngo: Ne zags sãnda neba, yaa yʋng nand tɩ b kẽ gãag n zems ne-b n yɩɩd sẽn na n yɩl n vaees daar verse wã. Leb n tõe n yɩɩ sasa sẽn zems tɩ b naag taab n pʋʋse. Daar fãa, y kambã sã n wʋmd y sẽn gomd a Zeova yell la y pʋʋsd-a, b na n kɩsa sɩd tɩ Wẽnnaam sɩd beeme.

⁵ Bɩ a Zeova ning modgr ning y sẽn maand n na n zãms y kambã sɩdã neerã barka, y sẽn tʋmd sõma ne D vaees Gʋlsg Sõamyã daar fãa seb-bilã.