D wilg tɩ nebã yell pak-d lame, n gũusd b yɛlã n getẽ
1 A Zeova ne a Zezi sɩd mii nebã sẽn dat bũmb ninsã takɩ n sõngd-ba. (2 Kib. 16:9; Mark 6:34) Tõnd sẽn segd nebã koe-moonegã sasa wã, d sã n bãng bũmb ning sẽn noom-b la yɛl nins sẽn pak-bã, d tõe n bãnga d sẽn na n sõs ne-b to-to.
2 Gũusd-y n get-y yɛlã: A Zezi ra gũusdame n get nebã manesem. (Mark 12:41-43; Luk 19:1-6) Tõnd me sã n kolg ned zak noor n yã bũmb sẽn wilgd tũudum ning pʋgẽ b sẽn be wã, pa rẽ bɩ d karmã goam mobill bɩ montɛɛr zugu, wall yaa kamb reem teed la d yã-yã, d tõe n tika rẽ n moon koɛɛgã sõma.
3 F sã n gũus n ges ned neng la a manesem, tõe n kɩtame tɩ f bãng a tagsg sẽn yaa a soaba. (Yel. 15:13) Tõe t’a nin-nongr sẽn ki wall zu-loees a taab yĩng kɩtame t’a rat belsgo. D sã n karem verse rãmb sẽn zems ne a yɛlã t’a kelge, tõe n yɩ-a-la noogo. (Yel. 16:24) D sã n mik ned sẽn yãgd n dat n yi a zakẽ wall a belgd a biig sẽn kʋmde, tõe tɩ na n yɩɩ sõma tɩ d wilg-a tɩ d na n lebg n waa nindaare. D sã n yaa wʋmdb n kʋmd nebã, tõe n kɩtame tɩ b kelg-d nindaare.—1 Pɩɛ. 3:8.
4 Tikd-y bũmb nins y sẽn yãtã n gomda: Atɛn tẽnga pʋgẽ, tʋm-tʋmd a Poll gũusame n yã tẽn-kugr b sẽn lugl “Wẽnnaam ned sẽn ka mi yĩnga.” Rẽ kɩtame t’a bãng a sẽn na n sõs ne-b to-to. A yeelame: “Yãmb sẽn waoogd a soab n ka mi wã, mam togsda yãmb bãmb koɛɛga.” A Poll sẽn gom ne yam woto wã, kɩtame tɩ neb nins sẽn da be be wã kẽer kelg Rĩungã koɛɛg n lebg tẽedba.—Tʋʋ. 17:23, 34.
5 Tõnd me sã n gũusd n get yɛlã, tõe n sõng-d lame tɩ d bãng yell ning sẽn pak nebã tɩ kɩt tɩ d bãng d sẽn na n gom to-to. Sok-y sogsg sẽn na n kɩt tɩ y kɛlgdã wilg a sẽn tagsde. Yãk-y verse rãmb sẽn tõe n kɩt t’a kelg koɛɛgã sõma. (Yel. 20:5) D sã n gũusd yɛlã n getẽ la d wilgdẽ tɩ nebã yell sɩd pak-d lame, na n sõng-d lame tɩ d moon koe-noogã sõma.