Rĩungã Roog yell gesg tara yõod Wẽnnaam balengã pʋgẽ
1. Tʋʋm-bʋg sẽn yaa kãseng wʋsg la b tʋm yʋʋm a yopoeyã sẽn loogã, la tʋʋm-bʋg n kete?
1 Yʋʋm a yopoeyã sẽn loogã, Afiriki, sẽn na ta Rĩung Rot 7137 la b me bɩ n manege. La tẽns nins sẽn paamd Rĩungã Tʋʋmd seb-kãngã wã pʋsẽ, yɩɩ Rĩung Rot 420 la b me bɩ n manege. D tara mi-beoog wʋsg ne Rĩungã Rot metb sulli, n paas neb nins fãa sẽn sõng ne meebã tʋʋmdã. Sẽn mik tɩ b tʋma wʋsg la b yiis ligd wʋsg sẽn na yɩl tɩ d paam zĩ-sõma d tigissã yĩngã, bɩ d ges Rĩungã Roog yell sõma n wilg d mi-beoogo. Wãn to la d tõe n teel tʋʋm-kãng sẽn tar yõod wʋsg a Zeova balengã pʋgẽ wã? —Wil. 7:15.
2. Tõnd tagsg segd n yɩɩ wãn to ne Rĩungã Roogo, la tõnd fãa segd n nana zu-no-bʋgo?
2 Tõnd tagsg sẽn segd n yɩ to-to ne Rĩungã Roogo: Tõnd tagsg segd n yɩɩ wãn to ne Rĩungã Roogo? D segd n ges-a-la wala Kiristã “paoong” tʋm-tʋmd sẽn tũud sɩd la sẽn tar yamã sẽn bobl-do. (Mat. 24:42-47) Woto yĩnga, d sẽn tõe n kõ ligd bɩ n rɩk d sẽkã n sõng tɩ Rĩungã Roog kell n yɩ yɩlemde, neer la sõma wã, d segd n gesame tɩ rẽ yaa zu-noog bũmbu. Yaa a yɩng tɩ yaa a pʋgẽ woo, Rĩungã Roog segd n waooga a Zeova siglgã yʋʋre. Woto yĩnga, d kota tigingã neb fãa tɩ b rɩk b bãngrã la b tarmã n kẽes Rĩungã Roog yell gesg pʋgẽ ne yamleoogo. (Yɩɩl 110:3) Nebã fãa segd n yɩɩ neb sẽn tʋmd ne yamleoogo, la sẽn sakd n naagd taab n tʋmdẽ. (Yɩɩl 133:1) Kiristã “paoong” yell ges segd n paka kambã la kãsembã fãa. Yaa kãsem dãmbã n segd n kõ nebã mak-sõng Rĩungã Roog yell gesg wɛɛngẽ ne b goamã la ne b tʋʋmã.—1 Pɩɛ. 5:3.
3, 4. Bõe ne bõe la d segd n maane: a) semen fãa? b) kiuug fãa? d) la yʋʋmd fãa?
3 D sẽn na n sigl Rĩungã Roog yell ges to-to: Tʋm-tʋmd sẽn tũud sɩd la sẽn tar yamã kõta kãsem dãmbã la yel-gɛtbã sagls la zãmsg Rĩungã Rot yell gesg wɛɛngẽ. B wilg-b lame tɩ b segd n pɩɩsa roogã tigisg fãa poore, la kiuug fãa ne yʋʋmd fãa b segd n pɩɩs-a-la sõma la b ges n manes a zĩis a taabã fãa tɩ yɩ yɩlemde. Roogã pɩɩsg tigisg fãa poorã rat n yeelame tɩ d pɩɩs roogã ne zĩis a taabã, ko-solssã, n yẽes zaoosã, sɛbã kõntoaar dãmbã la tablo rãmbã, la d nog sagdã bɩ kartõ vɩɩdã fãa. Semen fãa, tigingã sebr zãmsg sull a ye bɩ a yiib n segd n ges Rĩungã Roog pɩɩsg yelle. Sẽoog wakate, b segd n modgame n yɩɩda, sẽn na yɩl n tõog tɩ Rĩungã Roog kell n yɩ yɩlemde.
4 Sẽn paase, kiuug fãa d segd n gesa bõn-kãensã yelle: Tɩɩsã, lalsã, kʋɩlensã la feneta rãmbã, bugmã, aparɛy rãmbã ne b koofr dãmbã, sɛbã kõntoaar dãmbã, ko-solsgã la kabinɛ rãmbã, kũunã kogendo, n paas teed a taaba. Tʋʋmdã sã n wa sa, kãsem soab n segd n gʋls sebr sẽn wilgd b sẽn tʋm tʋʋmdã to-to, la a wilg tʋʋm teed nins sẽn paooge, la zĩis nins sẽn dat manegr tao-tao wã, n kɩs kãsem dãmbã sull bɩ sull ning sẽn get Rĩungã Roog yellã. Sẽn paase, yʋʋmd fãa, pɩɩs-kãseng n segd n maane. Pɩɩs-kãng sasa, b segd n tʋma tʋʋm nins fãa b sẽn tʋmd kiuug fãa wã, la sẽn yɩɩd rẽnda menga, wala pẽntiir ningri, teed kẽer manegre, la tʋʋm a taaba. Tigims nins fãa sẽn maand tigissã Rĩung Roog a ye pʋgẽ wã tõe n naaga taab n pɩɩs Rĩungã Roog tɩ Tẽegrã nan pa ta ye.
5, 6. a) Bõe la 2 Rĩm dãmba 22:5, 6 la Koɛɛg Soaba 10:18 zãmsd tõndo? b) Rĩungã Roog yell gesg wɛɛngẽ, wãn to la d tõe n tũ noor ning sẽn be 2 Kibay 24:5 pʋgẽ wã?
5 Bũmb a to sẽn tar yõod Rĩungã Roog yell gesg wɛɛngẽ yaa d sẽn na n yɩt tao-tao n manegd zĩig nins sẽn sãamã, sẽn na yɩl tɩ sãangã ra yɩ wʋsg tɩ wa lebg tɩlae tɩ b yiis ligd wʋsg n manege, la sẽn na yɩl n gil sabaabo. Sɩd-sɩda, baa ned sã n me roog t’a yaa kɛgeng to-to, kaoosg poore, a na n wa rata manegre. Zerizalɛm wẽnd-doogã ra mee ne kug-bɛd sẽn tar pãnga, la kaoosg poore, lalsã wa n sɩnga pusb tɩ b ra segd n manege. (2 Rĩm 22:5, 6) Israɛll rĩmã yeela maan-kʋʋdbã woto: ‘Bɩ y saag Zida tẽnsã n deeg ligd Israɛll neba fãa nengẽ yʋʋmd fãa n maneg Wẽnnaam doogã. La y maan tao-tao.’ (2 Kib. 24:5) Wãn to la d tõe n tũ sagl-kãngã rũndã-rũndã?
6 Rĩungã Roog yell gesg wɛɛngẽ, b segd n manega bũmb nins b sẽn yã tɩ segd ne manegrã tao-tao. Kãsem dãmbã ne tigims sull yel-gɛtã geta roogã zĩis nins sẽn segd ne manegr fãa la b ges n bãng bũmb nins sẽn paooge. D segd n gesa Rĩungã Roog yell tao-tao, d pa segd n bas tɩ Tẽegrã wakat kolg tɩ d yaool n dat n ges a yell ye. D tẽeg tɩ “ned sã n yaa kʋɩɩma, a roog lʋɩtame. La ned sã n bas a nus n ka tʋmdẽ, a roog yũundame.” (Koɛ. 10:18) Wala tall sãnfãnd koom n pek rẽgd sẽn bol lalg b sẽn ning pẽntiir tɩ yi sẽn yaa nana n yɩɩd b sẽn na n lebg n ning lalgã fãa pẽntiirã, woto me, lalg sẽn pãrg bilf manegr yaa nana n yɩɩd a sẽn na n lʋɩ tɩ b na n lebg n me-a.—Ges-y km 8/03, seb-neng a 3, 4.
7. Ãnd dãmb n segd n lʋɩ taoor Rĩungã Roog yell gesgẽ, la rẽ na n waa ne bõe?
7 Tõnd mengã sẽn tõe n maan bũmb ningã: Kãsem dãmbã la kãsemb sõngdbã fãa segd n naaga Rĩungã Roog pɩɩsg la a manegrẽ. B sã n maand woto tigingã neb fãa na n tũu b mak-sõngã. (Heb. 13:7) Na n kɩtame tɩ tigingã neb fãa sak n dɩk b sẽkã, b pãngã, b bãngrã, la b tarmã n kẽes Rĩungã Roog yell gesg pʋgẽ. B na n gesa rẽnda wa tʋʋmd sẽn naag a Zeova balengã pʋgẽ. (Mat. 22:39; 1 Kor. 16:1, 2) D tara bas-yard tɩ Rĩungã Rot na n ket n waoogda a Zeova masã ne beoog daare.