Réveillez-vous ! sẽn pa wõnd a taaba, d sẽn na n pʋɩ bõn-bɩʋʋng kiuugã
1 Neb wʋsg nonga liuuli wã yɩɩlã, la wĩntoogã rasãndã a sã n wa lʋɩtẽ wã. La wʋsg yaool n pa rat n sak n deeg tɩ yaa Ba sẽn be saasẽ n tar nonglem n naan bõn-kãensã ye. D na n paama zu-noog sẽn pa wõnd a taab n wilg nebã t’a Zeova yaa Naanda, d sẽn na n pʋɩ bõn-bɩʋʋng kiuugã Réveillez-vous ! wã. (Ezai 40:28; 43:10) Bõn-bɩʋʋng kiuugã Réveillez-vous ! wã na n gom n tadga gom-zu-kãngã zugu: “Naand n be bɩ?”
2 D moonegã zĩigẽ: Sã n tõeyã, bɩ y segl y mens n tõog n moon zak-zak ne tigingã neb sibr daar fãa. La y sã n data y tõe n kãaba zʋrnall kãngã sasa a taab me. Sẽn yɩɩd fãa, Réveillez-vous ! kãngã na n yɩɩ karen-saam dãmbã la porfesɛɛr dãmbã noogo. Woto yĩnga, bɩ d segl d mens sõma n tall-a n tɩ wilg karen-saam dãmbã la porfesɛɛr dãmb nins sẽn be tõnd moonegã zĩigẽ wã.
3 Ned sã n kelg-y sõma, bɩ y maan sokr n bas n wa leok nindaare. Wala makre, y tõe n sokame n gese, bõe yĩng tɩ Naand sẽn tar nonglem bas tɩ namsgã be wʋsg woto? Y sã n wa lebg n kẽnge, y tõe n wilga a soabã Biiblã yetame sebrã pipi sakã, wall sak 11 wã. Y leb n tõe n tika Naandã sẽn da rat bũmb ning ne tẽngã zug n maan sokre, tɩ y nindaar kẽngrã bɩ y sõs sak a 3 wã zugu.
4 Lekollẽ wã*: Yãmb sã n yaa karen-biiga, y tõe n talla Réveillez-vous ! kãngã n tɩ kõ y karen-saam dãmbã la y karen-bi-taasã. Y sã n yãk a ye n dɩgl y taablã zug bala, tõe n kɩtame tɩ neb maan-y sokr y tẽebã zugu. Tõe tɩ y wa paam sor me n tũnug ne b sẽn wilg Réveillez-vous ! wã pʋgẽ wã n gom n teel y tẽebã, devoaare, redagsiyõ, bɩ ɛgspooze pʋgẽ. Sẽn na yɩl n sõng-y rẽ wɛɛngẽ, “Kom-bɩɩsã sokda b mensã” zĩigẽ, zʋrnall kãngã tara gom-zug sẽn yet tɩ: “Wãn to la m tõe n wilg m sẽn tẽed tɩ Naand n wã võore?”
5 A Zeova segda ne pẽgr la waoogre, bũmb nins a sẽn naanã yĩnga. (Wil. 4:11) D tõe n waooga d Naandã la d sõng neb a taabã me tɩ b maan woto, ne d sẽn na n kãab nebã bõn-bɩʋʋng kiuugã Réveillez-vous ! wã ne yẽesem.
[Tẽngr not]
Tẽns kẽer pʋsẽ, b gɩdgame tɩ b ra gom tũudum yell goosneemã lekoll dãmbẽ wã ye. B miime tɩ kiris-neb hakɩkã sakda goosneema rãmbã noyã. (Matɩe 22:21) Woto yĩnga, yaa ned kam fãa n segd n ges a sẽn na n maan to-to yɛl kẽer taoore, wala makre, karen-biig wall karen-saamb sã n wa maan sokre.