D na n kãaba nebã Réveillez-vous ! sẽn pa wõnd a taab sɩpaolg kiuugã!
1 Neb wʋsg sokda ne b sũy fãa n dat n bãng Biiblã yõodo. Kẽer sokda b mens yaa: Sã n yaa ninsaalbã n gʋls-a, bõe yĩng tɩ b yet t’a yaa Wẽnnaam Gomde? Bõe yĩng tɩ m segd n teeg Biiblã t’a wilg-m sore? M sã n dɩk m sẽkã n karemd Biiblã la m zãmsd-a, a yõoda yaa bõe? Biibl dãmb nins b sẽn lebgã sʋka, bʋg la m na n yãk n karemdẽ? B leoka sogs-kãensã kẽer Réveillez-vous ! ning d sẽn na n kãab nebã sɩpaolg kiuugã pʋgẽ. A gom-zugã yaa: “Y tõe n talla bas-yard ne Biiblã bɩ?”
2 D na n pʋɩya Réveillez-vous ! kãngã wʋsg d moonegã zĩigẽ. Y sã n tõe bɩ y modg tɩ sɩpaolg kiuugã, bɩ y lagem y tigingã neb n moon zak-zak sibr fãa. Kãab-y Réveillez-vous ! kãngã y roagdba, y yagse, y tʋmd-n-taase, y karen-saam dãmbã, y karen-bi-taasã, la neb nins y sẽn lebgd n tʋgd n kaagdẽ wã. Y sã n togd sor wall y sã n debd raaga, bɩ y zã kẽer n tɩ pʋɩ. Kãsem dãmbã kosa a taab n paas sẽn na yɩl tɩ sek pʋɩɩbo.
3 D sɩng Biiblã zãmsg ne nebã: Ned sã n sak n deeg zʋrnallã, nand tɩ d looge d tõe n wilg-a lame tɩ d na n lebg n waa nindaar n sɩng Biiblã zãmsg ne-a. Wala makre, d tõe n yeela woto: “‘Wẽnnaam daabã ne tẽngã yaa bõe?’ Nindaare m na n wa wilg-y-la Biiblã sẽn leokd sok-kãngã to-to.” Nindaar bɩ d sɩd lebg n kẽng ne Biiblã yetame sebrã n wilg-a seb-neng a 4 n tɩ tãag a 5 wã, wall d sõs ne-a sak a 3 wã zugu, sull a 1 n tɩ tãag sull a 3 soabã. D tõeeme me n yeel woto: “Nindaare, m na n wa wilg-y-la Biiblã bãngr-gomd a ye sẽn pidsd rũndã-rũndã.” D sã n wa lebg n kẽnge, bɩ d wilg-a sebrã sak a 9 wã, la d sõs sull a 1 n tɩ tãag sull a 3 soabã zugu. Y leb n tõe n yeela y kɛlgdã yaa: “Neb wʋsg sã n karem Biiblã, b pa wʋmd a võor ye. Nindaare, m na n wilg-y-la y sẽn tõe n maan bũmb ning n tõog n wʋm y Biiblã võor sõma.” Y sã n lebg n kẽnge, bɩ y wilg-a Biiblã yetame sebrã la y wilg-a tõnd sẽn zãmsd nebã Biiblã to-to ne sebrã.
4 Yaa Biiblã bal la “gʋlsg sõamyã” sẽn tõe n vẽneg tõnd tɩ d “paam fãagre.” (2 Tɩm. 3:15) Bɩ d fãa modg n pʋɩ zʋrnall kãng ne yẽesem sẽn na yɩl n sõng nebã tɩ b tall bas-yard ne Biiblã.