D wilg tɩ nebã yell pak-d lame, n moond n pa bakd ned ye
1 Wẽnd vẽnegr pʋgẽ, tʋm-tʋmd a Zã yãa malɛk sẽn yɩk n laand sa-gãnẽ wã, n tar koe-noog sẽn-kõn-sa n moond “dũniyã soolem fãa la buud fãa la goam toɛy-toɛya fãa la neba fãa.” (Wil. 14:6) Rẽ yĩnga tõnd tũuda mak-sõng ning malɛkã sẽn kõ wã n moond n pa bakd ned bɩ? D sã n pa gũusi, d tõeeme n wa maan welsg n pa bãng ye. Tõnd sẽn tar manesem ning ne nebã tõeeme n kɩt tɩ b sak koe-noogã wall kɩt tɩ b pa sak-a ye. Woto yĩngã, tõnd sã n wa moond buud a to neba, d segd n wilgame tɩ d sɩd nong-b lame, la tɩ b yell pak-d lame.
2 Ges-y y moonegã zĩig sẽn yaa to-to wã: Sãamb n be yãmb moonegã zĩigẽ bɩ? D tõe n yĩma b yell nana-nana. Yak-y yam n kẽng n tɩ bao-ba, la y modg n bao n bãng-b sõma. Bõe yell n pak-ba, bõe la b nonga, bõe la b pa nonge, la bõe rabeem n tar-ba? Modg-y n moon-y-b Rĩungã koɛɛg tɩ zems ne b yɛlã sẽn yaa to-to wã. (1 Kor. 9:19-23) Wala tʋm-tʋmd a Polle, tõnd me segd n getame tɩ yaa tɩlae ne-d tɩ d taas koe-noogã d moonegã zĩig neb fãa, n paas sãambã, neb nins minung sẽn yaa toor ne tõnd rẽndã, sẽn gomd-b buud gom-zẽmsã, la arzegs rãmbã.—Rom. 1:14.
3 La wãn to la d tõe n kõ kasetã ned sẽn gomd buud gomd d sẽn pa wʋmde? D tũnug ne Une bonne nouvelle pour des gens de toutes nations sebrã. D leb n tõeeme n zã seb-vãad bɩ seb-bi ne buud goam nins neb wʋsg sẽn gomd tõnd moonegã zĩigẽ wã. (Ges-y yʋʋmd 2003 sẽoog kiuugã Rĩungã Tʋʋmd seb-neng a 4, sull a 2-3.) Sẽn paase, koe-moondb kẽer modgame n zãms b sẽn na n pʋʋs ned to-to, la b sẽn na n togs koɛɛgã bilf to-to ne buud goam a taabã. Nebã sã n yã ned sẽn modgd n dat n gom b buudã gomde, baa sã n yaa mamsgo, b sũur noomame, la rẽ tõe n kɩtame tɩ b kelg koe-noogã.
4 D rɩk a Zeova togs-n-taare: D sẽn modgd n taasd koɛɛgã neb buud toor-toorã, yaa tõnd Wẽnnaam a Zeova togs-n-taar la d rɩkda, bala yẽ ‘ratame tɩ neb buud fãa paam fãagre, la b bãng sẽn yaa sɩda.’—1 Tɩm. 2:3, 4.