D sã n sakd n tʋmd ne yamleoogo, d paamda barka
1. Wãn to la a Davɩɩd ne a Nehemi wilg tɩ b sakd n tʋmda ne yamleoogo?
1 A Goliat sẽn da wa n bao Israɛll sodaasã noorã, sodaag baa a ye pa sak n na n tɩ zab ne-a ye. Yaa bi-bɩɩg sẽn yaa pe-kɩɩm sẽn pa zãms zabr n sak ne yamleoog n tɩ zab ne-a. (1 Sãm. 17:32) Zʋɩf rãmbã sẽn yi yembd n lebg n kul Zerizalɛmmã, b pa tõog n me lalsã ye. Yaa a Nehemi sẽn yaa Pɛrs rĩmã sõgnã n bas a tʋʋmdã sẽn da yaa zu-zẽkr tʋʋmdã, n sak n kẽng Zerizalɛm n na n tɩ sigl lalsã meebo. (Neh. 2:5) A Zeova ninga a Davɩɩd ne a Nehemi barka, b sẽn sak n tʋm ne yamleoogã yĩngã.—1 Sãm. 17:45, 50; Neh. 6:15, 16.
2. Bõe yĩng tɩ kiris-nebã segd n tʋm ne yamleoogo?
2 Rũndã-rũndã, nebã ye pa sakd n tʋmd ne yamleoog ye. Tood wakat kãensã sasa, nebã vɩɩm pida ne tʋʋm wʋsgo, tɩ wʋsg lebg neb sẽn nong b mens bɩ beed dãmba. (2 Tɩm. 3:1, 2) Yaa nana tɩ ned wa baood sẽn na n naf a meng bala, n yĩm t’a tõe n sõnga neb a taabã ne yamleoogo. La tõnd sẽn yaa kiris-nebã, d segd n dɩka a Zezi togs-n-taar n sõngd nebã ne yamleoogo. (Zã 5:5-9; 13:12-15; 1 Pɩɛ. 2:21) Wãn to la d tõe n wilg tɩ d sakd n tʋmda ne yamleoogo, la bark bʋs la d na n paame?
3. D sã n sakd n kẽesd d toog ne yamleoog tigissã sasa, wãn to la nafd tigingã neba?
3 D tʋm ne yamleoog d saam-biisã yĩnga: D sã n kõt leoor tigissã sasa, d sõngda d saam-biisã tẽebã wɛɛngẽ. (Rom 1:11) D leoorã pẽgda a Zeova, n kɩtdẽ tɩ sɩdã paad d yamẽ wã la d sũurẽ wã, la kɩtdẽ tɩ tigissã kõt d sũ-noog n paasdẽ. (Yɩɩl 26:12) D tõeeme me n sak ne yamleoog n ledg karen-biig Wẽnnaam tʋʋmdã lekollẽ. Woto na n sõnga tõnd tɩ d sõsgã minim yɩ sõma n paase.
4. Bõe la d tõe n maan tɩ wilgdẽ tɩ d sakd n tʋmda ne yamleoogo?
4 Rapã sã n baood tigingã pʋgẽ zu-nood tʋʋmã, b wilgdame tɩ b sakd n tʋmda ne yamleoogo. (Ezai 32:2; 1 Tɩm. 3:1) Nebã fãa sã n sakd n tʋmd ne yamleoog tigis-kãsemsã sɛrvɩɩs rãmb toɛy-toɛy pʋsẽ, tõe n sõngame tɩ tigis-kãsemsã yɩ sõma. D sã n sakd ne yamleoog n moond ne tigims sull yel-gɛtã wall d bool-a ta wa rɩ, kɩtdame tɩ d paamd n kengd taab raoodo. (Rom 1:12) D sã n sakd n sõngd kɩɩbsã, pʋg-kõapã, bãad rãmbã, koms rãmbã, pagb nins sẽn zãad kambã, la neb a taab sẽn be tigingã pʋgẽ, d paamda sũ-noog la a Zeova barka.—Yel. 19:17; Tʋʋ. 20:35.
5. Rĩungã Rot wɛɛngẽ, tʋʋm-bʋs la d segd n tʋm ne yamleoogo?
5 Bũmb a to me d sẽn tõe n maan n wilg tɩ d tʋmda ne yamleoog yaa d sẽn na n dɩk d sẽkã la d pãngã n sõng ne Rĩungã Roog yell gesgo. Sẽn paase, neb wʋsg sẽn wat sɩdã pʋgẽ n paasdẽ wã yĩng kɩtame tɩ d rat Rĩung Roto, la neb sẽn na n sak ne yamleoog n me ro-kãensã. Rao a ye ne a pag n sak n na n sõng comité de construction régional n me Rĩung Roto, baa ne b sẽn da pa zãms meebã. Kaoosg poore, b zams-b-la meebã, tɩ b bãng n metẽ masã. Pagã yeela woto: “D sẽn tʋmd ne neb a taabã wakat fãa wã, kɩtame tɩ d zoodã ne-b tar paasgo. D sã n wa sig tʋʋm zaabre, mikdame tɩ d yaame, la tẽebã wɛɛngẽ d raood kengame.”
6. Bõe yĩng tɩ koe-moonegã yaa tʋʋmd d sẽn segd n tʋm ne yamleoog n yɩɩda?
6 D tʋm ne yamleoog koɛɛgã mooneg pʋgẽ: Rũndã-rũndã, tʋʋmd ning sẽn tar yõod n yɩɩd tɩ d tõe n tʋm ne yamleoog yaa koe-noogã moonego. D sã n sõngd nebã tɩ b wʋmd sagls nins sẽn be Biiblã pʋgẽ wã võor la b tũud-ba, b bãngda b vɩɩmã yõodo, la kɩtdẽ tɩ b tõogd n basd bũmb nins b sẽn da minim n maandẽ tɩ yaa wẽnsã. B bãngda bũmb ning Biiblã sẽn wilgd tɩ Wẽnnaam na n wa kõ-d-la beoog daarã. D sã n zãmsd nebã Biiblã, d tʋmda yamleoog tʋʋm sẽn kõt sũ-noogo, la sẽn nafd ned wakat sẽn-kõn-sa yĩnga. (Zã 17:3; 1 Tɩm. 4:16) Tõe tɩ tõnd mengã tõe n yɩɩ sõngr so-pakd bɩ wakat fãa so-pakda, pa rẽ bɩ n kẽng zĩis nins sẽn dat koe-moondb wʋsg n yɩɩdã pʋsẽ, wall d zãms buud gomd a to sẽn na yɩl n kẽes d toog n moon koɛɛgã ne yamleoog n paase.
7. Bõe yĩng tɩ tar yõod wʋsg rũndã-rũndã tɩ d sak n tʋmd ne yamleoogo?
7 Rĩm a Davɩɩd pĩnd n togsame tɩ Mesi wã sã n wa sɩng a naamã rɩɩbo, Wẽnnaam nin-buiidã na n sak n tʋma ne yamleoogo. (Yɩɩl 110:3) A Zeova sẽn dat tɩ d moon koɛɛgã tao-tao n baasã yĩngã, tʋʋm wʋsg n ket tɩ d segd n kẽes-d mens ne yamleoogo. (Ezai 60:22) Rẽ yĩnga, yãmb sak n yeelame tɩ “ad maam, bɩ y tʋm maam” bɩ? (Ezai 6:8) Sɩd-sɩda, d sã n sakd n tʋmd ne yamleoogo, d tata a Zeova yam la d paamd bark wʋsgo.