‘Ned sã n yɛ, Wẽnnaam kõt-a-la pãnga’
1 D mi n yaada wakat ninga. Pa tʋʋmã bal n kɩtd tɩ d yaadẽ ye. Tõe n yɩɩ zu-loees nins d sẽn segd wakat kãngã sẽn yaa toog wakatã yĩngã. (2 Tɩm. 3:1) Tõnd sẽn yaa a Zeova Kaset rãmbã, wãn to la d tõe n paam pãng sẽn na yɩl n da wa maag koe-moonegã pʋgẽ? Yaa d sẽn na n teeg a Zeova sẽn yaa “pãn-kãseng” soabã. (Ezai 40:26) A mii tõnd sẽn dat bũmb ninsã, la a sɩd rat n sõnga tõndo.—1 Pɩɛ. 5:7.
2 A Zeova sẽn kõt-d pãng to-to: A Zeova tũnugda ne a vʋʋsem sõngã n kõt-d pãnga. Yaa pãn-kãng me la a tall n naan dũniyã. D sã n yɛ bɩ d sã n koms raoodo, Wẽnnaam vʋʋsem sõngã kõt-d-la pãngã. (Ezai 40:31) Sok-y y meng woto: ‘Wakat bʋg la m pʋʋs Wẽnnaam n kos-a vʋʋsem sõngã n paam pãng n tõog n tʋm tʋʋmd ning a sẽn bobl-ma?’—Luk 11:11-13.
3 D sã n karemd Wẽnnaam Gomdã ne sɛb nins tʋm-tʋmd sẽn tũud sɩd la sẽn tar yamã sẽn yiisdã la d bʋgsd b zutu, d na n lebga wa ‘tɩɩg sẽn be kʋɩlg noor n womd a biis a womb wakate, t’a vãadã ka kʋɩtẽ ye.’—Yɩɩl 1:2, 3.
4 A Zeova tũnugda ne d saam-biisã me n kõt-d belsgo. (Kol. 4:10, 11) Saam-biisã sẽn sõsd ne tõndã, n kõt leoor la b kõt diskuur dãmb tigissã sasa wã kengda d raoodo. (Tʋʋ. 15:32) Sẽn yɩɩd fãa, kãsem dãmbã sõng-d-la tẽebã wɛɛngẽ la b kengd d raoodo.—Ezai 32:1, 2.
5 Koe-noogã moonegẽ: Baa y sã n wa ne tɩ y yɛɛme, wall y komsa raood bɩ y ra bas koɛɛgã mooneg ye! Koɛɛgã mooneg wakat fãa kõt-d-la pãnga. A pa wala tʋʋmã a taabã ye. (Mat. 11:28-30) D sã n moond koe-noogã, na n sõng-d lame tɩ d teeg Wẽnnaam Rĩungã la d ra yĩm vɩɩm sẽn-kõn-sa wã, la bark nins d sẽn na n wa paamã yell ye.
6 Nand tɩ dũni kãngã sãame, tʋʋm wʋsg n ket tɩ d segd n tʋme. D sẽn teeg pãng ning Wẽnnaam sẽn kõtã yĩnga, d tara bʋʋm wʋsg n na n yals kan-kãe Wẽnnaam tʋʋmdã pʋgẽ. (1 Pɩɛ. 4:11) Ne a Zeova sõngre, d na n tõog n baasa d tʋʋmdã, bala ‘ned sã n yɛ, a kõt-a-la pãnga.’—Ezai 40:29.