“D paamda rɩlgr ne tẽeb goama”
1 D sã n dat n tall wẽn-sakr vɩɩm rẽndame tɩ d maan modgr wʋsgo. (1 Tɩm. 4:7-10) La d sã n teeg d meng pãng n na n tall wẽn-sakr vɩɩm a woto buudu, d wat n yaame n gɩmbe. (Ezai 40:29-31) Bũmb d sẽn maand n paamd pãng a Zeova nengẽ yaa d ‘sẽn paamd rɩlgr ne tẽeb goamã.’—1 Tɩm. 4:6, Kãab-paalgã Koe-noogo.
2 Tẽeb rɩɩb wʋsgo: A Zeova tũnugda ne a Gomdã la ne ‘tʋm-tʋmd sẽn tũud sɩd la sẽn tar yamã’ n kõt-d tẽeb rɩɩb wʋsgo. (Mat. 24:45) Tõnd maanda d sẽn segd n maanã sẽn na yɩl n dɩ a nafa bɩ? Tõnd karemda Biiblã daar fãa bɩ? D yãka wakat d meng zãmsgã la bʋgsgã yĩng bɩ? (Yɩɩl 1:2, 3) D sã n dɩlgd d meng sõma woto tẽebã wɛɛngẽ, paasda tõnd pãng la kogend tõnd ne a Sʋɩtãan dũniyã yɛl nins sẽn tõe n koms d tẽebã. (1 Zã 5:19) Tõnd sã n pids d yamã ne bõn-sõma la d tũ-b d vɩɩmã pʋgẽ, a Zeova na n zĩnda ne tõndo.—Fil. 4:8, 9.
3 A Zeova leb n paasda tõnd pãng ne tigingã tigiss maasem. (Heb. 10:24, 25) Tẽebã zãmsg la tũud-n-taar sẽn yaa sõma wã d sẽn paamd tigis-kãens sasa wã paasda tõnd pãng tɩ d yalsd kãn-kãe makr toɛy-toɛyã taoore. (1 Pɩɛ. 5:9, 10) Bi-bɩɩg a ye sẽn yaa kiris-ned yeelame: “Daarã tõr m sẽn be lekollẽ wã kõt-m-la yaams wʋsgo. La tigissã yaa wala koom la tɩɩs zĩig sẽn be rasempʋɩɩgẽ, zĩig m sẽn tõe n tɩ paam pɛlg kengr n paas tɩ daar ning sẽn pʋgdã bɩ m le tõog n yals kãn-kãe lekollẽ wã.” Ad d sɩd paamda barka, d sẽn modgd n dabd tigissã!
4 Sɩdã moonego: A Zezi ra geta sɩdã mooneg wa rɩɩbo. Rẽ ra kõt-a-la pãnga. (Zã 4:32-34) Wala woto, tõnd me sã n sõsd Wẽnnaam kãabsã sẽn be yamleoogã zug ne neb a taabã, d paamda pãng n paasdẽ. Koe-moonegã me leb n kɩtdame tɩ d sũurã la d yamã tik Rĩungã la bark nins sẽn na n wa ka la bilfã zugu. Rẽ sɩd kengda tõndo.—Mat. 11:28-30.
5 Ad yaa bark bũmb n kõ-do, d sẽn paam tẽeb rɩɩb wʋsg ning a Zeova sẽn kõt a nin-buiidã rũndã-rũndã wã! Bɩ d ket n yɩɩnd ne sũ-noog n pẽgd a Zeova.—Ezai 65:13, 14.