D tall minung sẽn yaa sõma, n paam bark wʋsgo
1. Bõe yĩng tɩ tar yõod tɩ d tags bũmb nins d sẽn minim n maand tẽebã wɛɛngẽ wã zugu?
1 D sẽn wa n lebg kiris-ned paalmã, tõe tɩ d ra modgame n sigl tẽeb tʋʋm na-kẽndr sẽn yaa sõma n tũudẽ. Wala makre Biiblã kareng daar fãa, tigissã kẽnde, koe-noogã mooneg la pʋʋsgã. D sẽn maan modgr woto wã kɩtame t’a Zeova ning-d barka, tɩ d tẽebã pãng paase. La tõe tɩ d lisgã reegr yʋʋm zãagame masã. Sã n yaa woto, rẽ yĩnga d ket n tara minung sẽn yaa sõma tẽebã yɛl maaneg wɛɛngẽ wala d sẽn da wa n lebg kiris-ned paalmã bɩ?
2. Wãn to la Biiblã kareng daar fãa nafd tõndo?
2 D tags n ges d sẽn tʋmd tẽebã tʋʋmã to-to wã: D minim n karemda Wẽnnaam Gomdã bilf daar fãa bɩ? Ad woto maaneg sɩd wata ne bark wʋsgo! (Zoz. 1:8; Yɩɩl 1:2, 3) Pĩnd wẽndẽ wã, Israɛll rĩm fãa ra segd n gʋlsa Tõogã “n karemd-a daar fãa a yõor tɛka.” Woto maaneg yõod ra yaa bõe? Ra na n kɩtame t’a yɩ sik-m-meng soab la a zoe a Zeova n da wa kɩɩs a noyã ye. (Tõo. 17:18-20) Woto, rũndã-rũndã me, Biiblã kareng daar fãa sõngda tõnd tɩ d kell n zãag d mens ne wẽnga, n da paam taal dũni-wẽn-kãngã pʋgẽ ye. Leb n kɩtdame tɩ d tõe n bãng n moon koɛɛgã sõma.—Fil. 2:15; 2 Tɩm. 3:17.
3. Tigissã kẽnd daar fãa tara nafa bʋse?
3 A Zezi ra minim n kẽngda karen-doogẽ wã b sẽn karemdẽ Gʋlsg Sõamyã la b sõsd a zugã. (Luk 4:16) Sãmbg sẽn ka be, woto kenga a raood t’a wa tõog n deeg namsg ning sẽn da gũud-a wã. Tõnd me tẽebã paamda kengre, d sẽn paamd zãmsg tẽebã yɛl zut tigissẽ wã, la ne d sẽn kengd taab raoodã. (Rom 1:12) D sã n tigimd ne d saam-biisã sõngd-d lame tɩ d tõogd n maood ne yaoolem da-kãensã zu-loeesã. (Heb. 10:24, 25) Rẽ yĩnga yãmb ket n minim n kẽnda tigissã fãa bɩ?
4. Wãn-wãn la koe-noogã mooneg semen fãa wã nafd-do?
4 Biiblã wilgdame tɩ tʋm-tʋmdbã ra moonda koe-noogã “daar fãa Wẽnnaam dooga pʋgẽ ne rot pʋsẽ.” (Tʋʋ. 5:42) La baa sã n mik tɩ d pa tõe n moon daar fãa, rẽ yĩnga d pa tõe n mao tɩ semen fãa bɩ d tʋm koe-moonegã neng ning pʋgẽ sɩda? D sã n maand woto, d na n paama minim Wẽnnaam Gomdã tall n tʋm wɛɛngẽ, la tõe tɩ d paam kibay koe-moonegã pʋgẽ sẽn kengd raoodo.
5. Bõe yĩng tɩ d segd n pʋʋsd a Zeova wakat fãa?
5 No-rɛɛs a Daniɛll paama bark wʋsg a sẽn maan a Zeova raabã “daar fãa” a vɩɩmã pʋgẽ wã, n paas a sẽn da pa viigd a pʋʋsgã yĩnga. (Dan. 6:11, 17, 21) Tõnd me sã n pʋʋsd a Zeova ne d sũy fãa n pa vaandẽ, a na n kõ-d-la a vʋʋsem sõngã. (Luk 11:9-13) Sẽn paase, a na n deega d pʋʋsgã n pẽneg-do, la d na n paama zood hakɩk ne-a. (Yɩɩl 25:14; Zak 4:8) Ad bark tek woto! Bɩ d modg n kell n tall minung sẽn yaa sõma tẽebã yɛl maaneg wɛɛngẽ n paam t’a Zeova ning-d bark wʋsgo.