D zãms Biiblã neb nins sẽn pa mi kareng sõma wã
1. Zu-loe-bʋg la d nong n segd koɛɛgã mooneg sasa?
1 D sã n wa moond koɛɛgã, d nong n segda neb sẽn pa mi karengo, tɩ yaa toog tɩ d tõog n zãms-b Biiblã. Bõe la d tõe n maan rẽ wɛɛngẽ?
2. Bõe yĩng tɩ d segd n wilg tɩ d nanda sẽn pa mi-b kareng sõma wã, la wãn to la d tõe n maan dẽ?
2 D wilg tɩ d nand-b lame: Yaa nebã sũy la a Zeova get lakae pa b sẽn tõe n karmã n pak-a ye. (1 Sãm. 16:7; Yel. 21:2) Dẽ yĩnga, d pa segd n paoog sẽn pa mi-b kareng sõma wã ye. D sã n maagd d yĩns ne-b la d wilgdẽ tɩ d nand-b lame, tõe tɩ b sak tɩ d zãms-b Biiblã. (1 Pɩɛ. 3:15) Woto baoodame tɩ d ra modg-b tɩ b karem verse bɩ sull ye. A sã n bãngd Biiblã sẽn yet bũmb ninsã bilf-bilfu, tõe t’a na n wa ratame n bãng kareng sõma sẽn na yɩl n tõog n karem Wẽnnaam Gomdã “wĩntoog ne yʋngo,” n paam sũ-noogo.—Yɩɩl 1:2, 3.
3. Wãn to la d tõe n zãms Biiblã neb nins sẽn pa mi kareng sõma wã?
3 D sẽn tõe n zãms-b Biiblã to-to: Fot rãmbã sõngda tõnd tɩ d zãmsd nebã Biiblã sõma, la kɩtdẽ tɩ b pa yĩmd bũmb nins b sẽn zãmsã ye. Yãmb tõe n wilga karen-biigã foto sẽn be sebr ning y sẽn tar n zãmsd-a wã pʋgẽ la y kɩt t’a bilg bũmb nins a sẽn ne foto wã zugã. Rẽ poore, bɩ y tũnug ne sogsg takɩ n sõng-a t’a wʋm foto wã sẽn wilgd bũmb ninsã võore. Karm-y verse rãmb nins sẽn tõe n sõng-a t’a bãng bũmb nins foto wã sẽn zãmsd-a takɩ. Y le tõe n talla foto rãmbã n lebg n tẽeg-a bũmb nins a sẽn zãmsã. Y pa segd n bao n zãms-a bũmb wʋsg wakat yɛng ye. Gom-y n tadg-y sõsgã gom-zug zugu, la bũmb nins sẽn tar yõod n yɩɩd sõsgã pʋgẽ tɩ y rat t’a ra yĩma. Y pa segd n paas yɛl a taab sẽn pa be sõsgã pʋgẽ ye. Karem-y verse rãmbã Biiblã pʋgẽ la y tũnug ne sogsg n bãng karen-biigã sã n wʋmda b võore. Woto tõe n kɩtame t’a tʋl n bãng kareng n paase, sẽn na yɩl n bao n bãng yɛl a taab sẽn be Biiblã pʋgẽ a toore.
4. Wãn to la tõe n sõng karen-biig t’a bãng kareng sõma?
4 Bũmb nins sẽn tõe n sõng-ba: Neb nins sẽn pa mi karengã bɩ neb nins sẽn pa tõe n karem sõma wã tõe n wʋma goam kẽer võor n pa yĩmdẽ ye. Y tõe n sagla nin-kãensã tɩ b kelgd tõnd sɛbã b sẽn karem tɩ b rɩk ne kasɛt rãmbã. B sã n kelgdẽ la b tũud karengã sebrã zugu, bɩ n lebgd n yet bũmb nins b sẽn wʋmdã, na n sõng-b lame tɩ b bãng kareng sõma. Modg-y n tõog kareng la gʋlsgo seb-bilã me tõe n sõng-b lame. Zĩis kẽere, kãsem dãmbã tõe n sigla kareng zãmsg b tigingẽ wã. Sagls kãensã tõe n sõnga neb nins sẽn pa mi karengã tɩ b wʋm “Gʋlsg Sõamyã” sẽn tõe n vẽneg-b tɩ b paam fãagrã võore.—2 Tɩm. 3:15.