D sẽn tõe n sõng sẽn pa mi-b kareng sõma wã to-to
1. Bõe n kɩt tɩ yɩl n zãms sẽn pa mi-b kareng sõma wã Biiblã pa nana?
1 Neb kẽer tõnd sẽn segd koe-moonegã sasa pa mi kareng sõma ye. Tõe tɩ b tʋll n bãnga Wẽnnaam la a raabã, la b yɛɛsda Biiblã wall sɛb kẽer karengo. Woto wã, wãn-wãn la d tõe n sõng-b tɩ b bãng Wẽnnaam?
2. Seb-bʋs la d tõe n tall n sõng ned sẽn pa mi karengo?
2 D sã n zãmsd ned Biiblã t’a pa mi kareng sõma wall a pʋd n pa tõe n karem baa bilfu, d tõe n dɩka Kelg-y Wẽnnaam sebrã wall Kelg-y Wẽnnaam n paam n vɩɩmd wakat sẽn kõn sa sebrã n sõng-a. Etazĩni so-pakd a ye yeelame tɩ yẽ wae n yiisa seb-kãensã b yiibã n wilg a soabã t’a yãk a sẽn dat-a. D sã n na n zãms ned Biiblã t’a mi sebr karengo, a tõe n sakame n karemdẽ tɩ d sokd-a sogsgã. La a sã n pa mi sebr sõma, tɩ d rat t’a maan woto, tõeeme n pa yɩ nana ne-a ye. Ned sẽn sak n na n zãms Biiblã sã n mii karengo, koe-moondb wʋsg nong n sɩngda ne Koe-noog sẽn yit Wẽnnaam nengẽ! sebrã, wall Y tõe n yɩɩ Wẽnnaam zoa! wã, pa rẽ bɩ Biiblã kibay sebre.
3. Ned sã n pa mi kareng tɩ d rat n zãms-a Biiblã, bõe la d segd n bãnge?
3 Pẽgd-y karen-biigã: Neb wʋsg sẽn pa mi kareng pʋ-tẽer vɩɩme, tɩ b tõe n zãms bũmbu. Woto wã, waoog-y-b sõma, la y wilg tɩ y nand-b lame. (1 Pɩɛ. 3:15) Y sã n pẽgd-b b modgrã yĩnga, tɩ b ne b sẽn bãngd Wẽnnaam n paasdẽ wã nafa me, tõe n kenga b raood tɩ b kell n wɩng ne zãmsgã. Rẽ wã, pẽgd-y-ba.
4. Wãn to la d tõe n sõng sẽn pa mi-b kareng sõma wã tɩ b segl zãmsgã?
4 Baa karen-biigã pa mi kareng sõma bɩ y sagl-a t’a segend zãmsgã. Afirikdisiid koe-moondb kẽer sagenda b karen-biisã tɩ b kos b roagd wall b zoa sẽn mi kareng sõma t’a sõngd-ba. Gãrãnd Bertayn koe-moond a ye yeelame tɩ zãmsgã sasa, yẽ mi n kõta a karen-biisã a sebrã tɩ b naag taab n vaees sul a wãna. Woto sõngd-b lame tɩ b bãng tɩ leoorã sã n dẽege, a yãabã yaa nana. Ẽnd saam-biig a ye yeelame tɩ yẽ mi n sagenda a karen-biisã tɩ b ges semen ning sẽn pʋgdã zãmsg fot-rãmbã n bʋgsdẽ.
5. Wãn to la d tõe n maan sũ-mar ne ned d sẽn zãmsd Biiblã?
5 Tall-y sũ-mare: Sẽn yaa sebr ning fãa la y tar n zãmsd ned Biiblã, segdame tɩ y wilg-a bũmb ning b sẽn dat t’a bãng zãmsgã pʋgẽ wã bala, la y mao n sõng-a t’a wʋm dẽ sõma. Ra n bao-y n vaees-y sul wʋsg ye. Sul a wãn bal sekame. Karen-biigã sã n karemd maasg-maasg bɩ y tall sũ-mar ne-a. Bala, a sã n bãngd a Zeova bilf-bilf tɩ noom-a, a na n modg n bɩɩsa karengã. Y sã n dat n sõng-a t’a paas a karengã minim, yɩta sõma tɩ y boond-a t’a wat tigissã.
6. Wãn-wãn la d tõe n zãms ned karengo?
6 Biiblã karen-biig sã n bãng karengo, na n sõng-a lame t’a bãng Wẽnnaam la a raabã tao-tao. (Yɩɩl 1:1-3) Karen-biigã sã n koms raood tɩ y tẽeg-a bũmb karengã sẽn sõng-a t’a bãnge, tõe n kenga a pɛlga. Wilg-y-yã-a t’a Zeova na n ninga a modgrã barka, la y sagl-a t’a pʋʋsd n kot-a sõngre. (Yel. 16:3; 1 Zã 5:14, 15) Naoor wʋsgo, d sã n dat n zãms ned karengo, d pa segd n wilg-a karengã bal ye. D segd n maoome t’a soabã yam kẽ karengã.
7. Bõe yĩng tɩ d segd n sõng sẽn pa mi-b kareng sõma wã tɩ b zãms Biiblã?
7 A Zeova nanda neb nins sẽn pa karem n zãagã. (Zoob 34:19) Yaa ned sẽn sɩd yaa a soab a sũur pʋgẽ wã la a Zeova geta. (1 Kib. 28:9) Woto yĩnga, d modg n sõng sẽn pa mi-b kareng sõma wã tɩ b bãng Wẽnnaam la a raabã. D tara tʋʋm-teed wʋsg d sẽn tõe n tall n sõng-ba. Bilf-bilfã, tõe tɩ y wa tõog n zãms-b Biiblã yetame sebrã tɩ b bãng Biiblã sõma.