Yãmb sogsgã leoore

◼ Bõe la ned kam fãa tõe n maan n sõng tɩ tiisg ra zĩnd tigissã sasa? (Tõo. 31:12)

D sẽn waoogd a Zeova la d nand tigissã a sẽn segend d yĩngã, d fãa segd n modgame n wat pĩnda, la d segend d mens sõma n kelgd zãmsgã. Yɩta sõma tɩ d tɩ zĩnd taoore, la d bas tɩ neb nins sẽn tar kom-bõonesã, la sẽn pa tõog-b n wa pĩndã zĩnd poorẽ. Tigisgã sã n sɩnge, d pa segd n bas tɩ d selilɛɛr dãmbã tiis nebã ye. Tigissã sasa, d fãa sã n kell n tall manesem sẽn wilgd tɩ tigissã waoogda a Zeova, tiisgã pa na n yɩ wʋsg ye.—Koɛ. 4:17; Fil. 2:4.

Sãan sã n wa tigisgã, b tõe n kɩtame tɩ saam-biig bɩ saam-bi-poak sẽn mi-a tɩ zĩnd ne-a. Woto sõngda wʋsgo, sẽn yɩɩd fãa a sã n tara kamba. La sã n yaa zak rãmba, tõe tɩ b nan pa mi manesem ning b sẽn segd n tall tigissã sasa ye. B sã n paam n na n zĩnd poorẽ, na n sõng-b lame n yɩɩda, bala b sã n dat n tall b biig n yi yɩng n ges a yelle, na n yɩɩ nana ne-ba, la pa na n tiis nebã wʋsg ye. (Yel. 22:6, 15) Y pa segd n tall y kambã n tɩ be zĩig a to tɩ b paam n maand b yam ye. Yɩta sõma tɩ roagdbã talld b kambã n yit yɩng n kibind-ba, bɩ n get-b yelle. La rẽ poore b segd n tall-b-la tao-tao n kẽ n zĩnd n kelg sõssã.

Neb nins sẽn deegd sãambã sõngdame tɩ tiisg ra zĩnd tigissã sasa ye. B sõngda zagsã rãmba, la sẽn pa wa-b pĩndã tɩ b paam zĩis n zĩndi. Sãamb rɛɛgdbã tagsda nebã yelle, la b sõngd ned fãa t’a paamd zĩig sẽn zems n zĩndi. B tʋmda ne yam b sã n wa yã bũmb sẽn na n tiis kɛlgdbã. Wala makre, biig sã n wa tar manesem sẽn tiisd nebã, sãamb rɛɛgdbã tõe n sõnga a roagdbã.

Neb nins fãa sẽn wat tigissã tõe n sõngame tɩ d fãa tõog n kelg sõssã tɩ tiisg ra zĩnd ye. Woto na n kɩtame tɩ d bãng yɛl wʋsg a Zeova zug n paase, la d bãng a raabã sẽn yaa a kɩt tɩ d paam dũni paalga, laafɩ la tɩrlem sẽn na n zĩnd a zugã me n paase.—Heb. 10:24, 25.