Yãmb sʋgsgã leoore
◼ Wãn to la neb rɛɛgdbã tõe n sõng roagdbã tɩ b sõng b kambã tɩ b ra maan zũnd-zãnd tigissẽ wã?
Kamb tara keelem, n ka minim n tõe n zĩnd zĩ-yend sɩɩ n kaoos wʋsg ye. Kambã tara keelem wʋsg tɩ tusd-b tɩ b zoet n digd kamb a taabã Rĩungã Roogẽ bɩ tigiss zĩis a taaba, parkingã zĩigẽ, bɩ soaya noy tigisgã saab poore. Baasg zãnga, wa yel-bũndã sẽn sɩd yetã, ‘b sã n bas biig t’a maan a yam, a ningda a roagdb yãnde.’—Yel. 29:15.
Zu-bʋko, tõnd saam-biis la saam-bi-pogs kẽer sẽn kʋʋl paama sãmpog-kãsemse, bala kamb n zoe n tɩ fão-b n lubi. Rẽ waa ne namsg la ligd yiisg sẽn da paẽ tɩlae n kõ roagdbã la tigingã neba. Kambã mens la neb a taabã bãan yĩnga, b ka segd n bas kambã tɩ b zoet n deemd Rĩungã Roog pʋgẽ la a yɩng ye.
Biiblã wilgdame tɩ roagdbã segd n zãmsa b kambã tɩ b tall waoogr sẽn zems ne tõnd balengã zĩisi. (Koɛ. 4:17a) Tõnd kiris-neb tigissẽ wã Rĩungã Roogẽ, tigis-kãsemsẽ wã, neb rɛɛgdbã tʋʋmd yaa b ges tɩ “bũmb fãa maan ne manesem sẽn zemse” la tɩ “yɛlã tũ noy sõma.” (1 Kor. 14:40, NW; Kol. 2:5, NW ) Sẽn deng sõssã, sõssã wakate, la b poore, neb rɛɛgdbã segd n maana gũusgu. Biig sã n zoetẽ bɩ a tara kɩr-kɩr n ka tõe n yals sɩɩ, ne bʋgsem, neb rɛɛgdã tõe n yalsa biigã, n wilg-a bũmb ning sẽn kɩt t’a sẽn maandã ka bũmb sẽn sakdã. Ne nonglem, a segd n togsa biigã roagd yellã la a wilg-a t’a segd n gesa biigã yelle. Roagdã segd n saka rẽ.
Ka lingr tɩ kom-peels bɩ kom-bõoneg yãb bɩ b wa ne tiisg wakat ning tigisgã sasa ye. Neb rɛɛgdbã, sẽn nong n wa minit 20 bɩ sẽn yɩɩd woto tɩ tigisgã nan ka sɩngã, tõe n bĩngã goeel-ruls a yiib roagdb nins sẽn na n tʋll n zĩnd be ne b kom-bõonegã yĩnga. Neb a taabã segd n lagem n tʋma ne-ba, n bas goeel-kãens roagdb kãens yĩnga.
Biig sã n wat ne tiisgu, roagdã segd n maana bũmbu. Roagdã sã n ka maan dẽ tɩ tiisgã lebg wʋsg n sãamd nebã kelgre, neb rɛɛgd segd n kosa roagdã ne bʋgsem t’a yi ne biigã. B ka sagend tɩ neb rɛɛgdã reeg roagdã zĩig n yi ne biigã ye. Tõnd sã n bool nin-paals sẽn tar kom-bõones tɩ b wa tigisgã, d segdame n zĩnd n yɛgl-b n kãab tɩ d na n sõng-b-la ne b kambã, b sã n wa yãbd bɩ b maanda bũmb a to sẽn tiisdi.
Tõnd sũy nooma d sẽn ne kamb sẽn tar yʋʋm toɛ-toɛ Rĩungã Roogẽ la sẽn zãad b mens sõma Wẽnnaam doogã pʋgẽ wã. (1 Tɩm. 3:15) Kambã sã n waoogd segls nins a Zeova sẽn dɩk balengã yĩngã, ya a Zeova la b waoogda, la tigingã neb fãa me nand-b lame.