Bɩ Wẽnnaam yʋʋrã paam waoogre
1. Yʋʋmd 2012 rasem a yiib tigis-kãsengã gom-zugã yaa bõe, la yita yɛ?
1 Tõnd sẽn paam n yaa a Zeova sẽn yaa yĩngr la tẽng Naabã kaset rãmbã, sɩd yaa zu-zẽkr n kõ-do! Yaa a Zeova meng n yeel tɩ d yɩ a kaset rãmba. La yʋʋmd 1931 wã tɛka, d rɩka yʋʋr sẽn yaa a Zeova Kaset rãmbã, sẽn na yɩl tɩ nebã bãng-d n welge. (Ezai 43:10) A Zezi sẽn yaa Wẽnnaam Biig sẽn ka to wã sɩd waooga Wẽnnaam yʋʋrã. Pʋʋsg ning a sẽn wilg a karen-biisã pʋgẽ, yaa rẽ yell la a gom pipi. (Mat. 6:9) Yaa a Zezi goam nins sẽn be Matɩe 6:9 wã pʋgẽ la d yãk yʋʋmd 2012 rasem a yiib tigis-kãsengã gom-zugu. A gom-zugã la woto: “Bɩ Wẽnnaam yʋʋrã paam waoogre.”
2. Sõss nins d sẽn na n kelgã kẽer la bʋse?
2 Sõss nins d sẽn na n kelgã kẽere: Sibrã, sõsg ning gom-zug sẽn yet tɩ “D yɩ so-pakdba, n kɩt tɩ nebã bãng Wẽnnaam yʋʋrã” na n wilga bũmb ning sẽn kɩt tɩ so-pakrã yaa tʋʋmd sẽn kõt sũ-noogã. D na n kelga gom-n-dees-taab me sẽn na n sõng tõnd tɩ d gil bẽds a naase. A gom-zugã la woto: “D gũus n da wa sãam a Zeova yʋʋr ye.” Sõsg ning gom-zug sẽn yet tɩ “Bũmb ning sẽn kɩt tɩ Wẽnnaam yʋʋrã tog n paam waoogrã” pʋgẽ, b na n leoka sogsg nins sẽn pʋgdã: Bõe n na n sõng tõnd tɩ d kell n moon ne yẽesem, baa neb wʋsg sã n pa kelgd tõndo? Bõe n na n sõng tõnd tɩ d moonegã wom biisi? Hatã, d na n kelga gom-n-dees-taab sẽn na n wilg tõnd yɛl a naas pʋgẽ d sẽn tõe n kɩt tɩ Wẽnnaam yʋʋrã paam waoogre: d tagsgã, d goamã, d yam-yãkrã, la d manesmã. Zãma sõsgã na n sɩd nafa neb nins d sẽn na n bool tɩ b wa wã. A gom-zugã la woto: “A Zeova na n kɩtame t’a yʋʋrã paam waoogr Armagedõ.”
3. Bõe n yaa zu-zẽkr bũmb n kõ tõndo, la wãn to la rasem a yiib tigis-kãsengã na n sõng-do?
3 Ka la bilfu, a Zeova na n kɩtame t’a yʋʋrã paam waoogre. (Eze. 36:23) La nananda, tõnd sẽn paam n zãad a Zeova yʋʋrã sɩd yaa zu-zẽkr n kõ-do, la d segd n kɩtame t’a paam waoogr wakat fãa. D kɩsa sɩd tɩ rasem a yiib tigis-kãsengã na n sõnga ned kam fãa t’a tõog n zã Wẽnnaam yʋʋrã wa sẽn segde.