Yãmb sogsgã leoore

◼ Yaa ãnd n segd n gʋls d sɛbã zĩ-gũbã zĩisẽ la d sit wɛɛbã pʋgẽ n tool Betɛllã?

Tõnd sɛbã tara zĩ-gũbr ned sẽn tõe n gʋls n kos sebre, bɩ n kos tɩ b wa kaag-a. Ned sã n gʋls zĩ-kãense, a wõrgdame n tool Betɛllã. Sẽn paase, ẽntɛrnetã pʋgẽ me, ned tõe n tũnuga ne tõnd sit wɛɛbã (www.watchtower.org) n kos tɩ b wa zãms-a Biiblã. Woto sõngda neb wʋsg tɩ b bãngd Biiblã sẽn sɩd yetã. La koe-moondb kẽer sẽn tũnug ne bõn-kãensã n na n kɩt tɩ b roagdb bɩ b zo-rãmb paam sebr bɩ b paam tɩ b zãms-b Biiblã, waa ne zu-loeese.

Bala kɩtame tɩ Betɛllã tool neb sɛb tɩ b pa mi tiiri, tɩ bãmb kẽer sũy yiki, b sẽn tagsd tɩ tõnd siglgã rɩka bãmb n naag neb nins b sẽn toond sɛbã, sẽn na yɩl n modg bãmb tɩ b rees d sɛbã. Betɛllã kɩtame tɩ koe-moondb kẽng neb sẽn ka mi tiir nengẽ n na n tɩ kaag-ba, tɩ b rãmbã sũy yik ne-ba. Dẽnd pa segd tɩ koe-moond tũnug ne bõn-kãensã n na n kɩt t’a roagd bɩ a zoa paam sebr bɩ a paam tɩ b zãms-a Biiblã ye. Yaa a soabã meng n segd n kos a toore. Naoor wʋsgo, Betɛllã sã n mik tɩ yaa koe-moond n gʋls ned a to yʋʋr yĩnga, b pa maand a sẽn kosã ye.

Wãn to la d tõe n sõng d roagd bɩ d zoa t’a bãng Wẽnnaam daabã? Sã n yaa d sebr la y rat t’a paame, y tõe n tɩ kõ-a-la y toore. A sã n yeel t’a ratame t’a Zeova Kaset soab wa kaag-a, tɩ y pa mi y sẽn na n maan to-to t’a sẽn be zĩig ningã tigingã kãsem dãmb bãng rẽ, y segd n gʋlsa Veuillez suivre l’intérêt (S-43) seb-vãoogã n kõ yãmb tigingã sekertɛɛrã. Yẽ n na n ges y sẽn gʋlsã sã n zemsame la a tool-a Betɛllã. La sã n yaa ned sẽn be bãens-roog wall tɩbsg zĩigẽ, y pa segd n gʋls Betɛllã n kos tɩ b tɩ kaag-a ye. Y segd n yeel-a lame t’a modg n yã koe-moondb nins sẽn mi n wat be n moond koɛɛgã, wall a gʋls Betɛllã a toore.