Yãmb sogsgã leoore

◼ Rẽ yĩnga, koe-moond segd n tũnuga ne ẽntɛrnetã n moon koɛɛgã, bɩ n zãms ned sẽn be tẽn-zẽng Biiblã bɩ?

Koe-moondb kẽer tũnuga ne ẽntɛrnetã n paam Biibl karen-biis tẽns nins b sẽn gɩdg tõnd tʋʋmdã, pa rẽ bɩ zĩis koe-moondb sẽn pa waooge. Wakat ninga, womda biisi. La koe-moondb sã n toond neb b sẽn pa mi mesaaz-rãmb bɩ n sõsd ne-b ne ẽntɛrnetã maasem, tõe n waa ne yelle. (Ges-y yʋʋmd 2007 sẽoog kiuug Rĩungã Tʋʋmd sebrã neng a 7 wã.) Yaa sɩd tɩ koe-moon-kãens sẽn dat yaa b sõng sũ-tɩrs rãmb tɩ b wʋm koɛɛgã, la b sã n pa gũusi, b tõe n wa sõsda ne nin-wẽnse, pa rẽ bɩ ne sɩdã kɩɩsdb menga. (1 Kor. 1:19-25; Kol. 2:8) Sẽn paase, tẽns nins b sẽn gɩdg tõnd tʋʋmdã pʋsẽ taoor-dãmbã tõe n karma mesaaz-kãense. Dẽnd d sã n tũnug ne ẽntɛrnetã n sõsd ne ned sẽn be tẽn-zẽnga, tõe n kɩtame tɩ d tẽed-n-taasã sẽn vɩ be wã paam yelle. Woto wã, koe-moond pa segd n bao tẽn-zẽng ned ẽntɛrnetã pʋgẽ, sẽn na yɩl n moon-a koɛɛgã ye.

D sã n taas ned sẽn wa n na n kaag tõnd tẽngã koɛɛgã t’a wilg t’a rat n wʋmame n paase, bɩ d ra tool-a mesaaz-rãmb ne ẽntɛrnetã n na n sõng-a ye, sã n pa filiyallã n kõ sor tɩ d maan dẽ. D wilg-a a sẽn tõe n paam kibay to-to tõnd sɩtã pʋgẽ (jw.org), pa rẽ bɩ a sẽn tõe n yã a Zeova Kaset rãmbã sẽn be yẽ tẽngẽ wã to-to. D tõeeme me n wilg-a t’a kẽng a Zeova Kaset rãmbã Rĩungã roog sẽn pa zãr ne a yirã. Yaa sɩd tɩ pa tẽnsã fãa pʋs la d tar Rĩung rot ye. La a sã n dat t’a Zeova Kaset soab wa kaag-a, d segd n gʋlsa Veuillez suivre l’intérêt (S-43) sebrã, n kõ tõnd tigingã sekertɛɛre, t’a tũnug ne sɩtã (jw.org) n toole. Filiyall ning sẽn get tõnd tʋʋmdã yell tẽng ning pʋgẽ d kɛlgdã sẽn vɩ wã mii yɛlã sẽn yaa to-to beenẽ, la yaa filiyallã n sɩd tõe n sõng nedã n yɩɩda. Ges-y yʋʋmd 2014 sigr kiuug Rĩungã Tʋʋmd sebrã neng a 7, ne yʋʋmd 2011 sɩpaolg kiuug Rĩungã Tʋʋmd sebrã neng a 2.

D sã n da zoe n kẽnd n kaagd ned t’a wa toeem tẽnga, bɩ sã n yaa tẽn-zẽng ned la d ra yã ẽntɛrnetã pʋgẽ n zãmsd-a Biiblã, d segd n tũu sagls nins sẽn be sõs-kãngã sull a yiib-n-soabã pʋgẽ wã. Baasgo, d tõe n ket n taasd-a-la koɛɛgã, hal tɩ koe-moond sẽn be a babgẽ wã wa sɩng n kaagd-a. Sẽn yaa a soab fãa, ned sã n vɩ tẽngẽ b sẽn gɩdg tõnd tʋʋmdã tɩ d rat n gʋls-a lɛtre, bɩ n tũnug ne telefõnne, ẽntɛrnetã wall bũmb a to n sõs ne-a Biiblã zugu, d segd n gũusa wʋsgo.—Mat. 10:16.