D maand gũusg koɛɛgã mooneg sasa
1. Bõe yĩng tɩ d segd n maand gũusg koɛɛgã mooneg sasa?
1 Wẽnnaam nin-buiidã moonda koɛɛgã ‘nin-kɩɩsdb la nin-wẽns sʋka,’ tɩ yaa ‘wa piis sẽn be digd-n-yĩids sʋka.’ (Mat. 10:16; Fil. 2:15) Nen-kɛglem tʋʋmã, gudgrã, la neb sẽn suud taab n tʋmd tʋʋm-beedã sẽn pid zĩig fãa wã wilgdame tɩ ‘nin-wẽnsã sɩd maanda wẽng n paasdẽ.’ (2 Tɩm. 3:13) Biiblã sagls bʋs tũub n tõe n sõng tõnd tɩ d maand gũusg koɛɛgã mooneg sasa?—Mat. 10:16.
2. Bõe n tõe n wa kɩt tɩ d segd n toeem mooneg zĩig tao-tao?
2 D tʋmd ne yam: Yelbũn 22:3 wilgdame tɩ ned ning sẽn tar yam yãta yell n “gil n looge.” Bɩ d maand gũusgu! Baa bãan sẽn be zĩig ningã, yɛlã tõe n wa tiig n toeemame. Y tõe n wa yãa polɩɩs rãmb sẽn gilgd wʋsg-wʋsgo, bɩ neb sẽn sɩng n tigimd taab sorã zugu. Sasa ninga, ned d sẽn taasd koɛɛgã tõe n keooga tõnd ne yell sẽn wate. Wall tɩ d yɩ nif na yã soaba, yɩta sõma tɩ d toeem zĩig tao-tao n tɩ moone.—Yel. 17:14; Zã 8:59; 1 Tes. 4:11.
3. Wãn-wãn la d tõe n tũ Koɛɛg Soab 4:9 sẽn yetã d moonegã zĩigẽ?
3 D da moond d yembr ye: Koɛɛg Soab 4:9 yetame tɩ “neb a yiib n são nin-yende.” Tõe tɩ y minim n moonda koɛɛgã y yembr tɩ bũmb pa maand-y ye. La rẽ yĩnga, y tõe n ket n maanda woto bɩ? Zĩis kẽere, y tõeeme. La zĩis a taaba, pa zems tɩ saam-bi-poak bɩ bi-bɩɩg moond zak-zak yẽ a yembre, sẽn yɩɩd fãa wĩndgã sã n kẽ. Yɛl sẽn paam koe-moondb wilgdame tɩ yaa sõma tɩ d ra moond d yembr ye. (Koɛ. 4:10, 12) Y sã n wa be moonegã zĩigẽ, ned kam fãa segd n gũusd n getame tɩ yell da wa paam a taabã ye. La wakat fãa y sã n na n looge, bɩ y kɩt tɩ neb a taab bãnge.
4. Bõe la d tõe n maane, n sõng n kogl tigingã nebã?
4 Kãsem-dãmbã sẽn ‘gũud tõnd sɩɩsã’ yĩnga, bãmb n tog n kõt sor-wilgr sẽn zems ne yɛlã sẽn yaa to-to moonegã zĩigẽ wã. (Heb. 13:17) D sã n sikd d mens n tũud kãsem-dãmbã saglsã, d na n paama a Zeova barka. (Mii. 6:8; 1 Kor. 10:12) Bɩ d fãa modgd n kõt kasetã sõma d moonegã zĩigẽ, la d maand gũusg wakat fãa.