Ra maan-y y menga, n tagsdẽ tɩ y pa tõe n zãms ned Biiblã ye
1. Bõe yĩng tɩ kẽer pa baood n na n zãms ned Biiblã?
1 Yãmb tagsdame tɩ y pa tõe n zãms ned Biiblã, tɩ rẽ kɩt tɩ y sɩd pa baood Biibl karen-biig bɩ? Pĩnd wẽndẽ wẽn-tũudb kẽer wa a Moiiz la a Zeremi tagsame tɩ b ka tõe n tʋm tʋʋmd ning Wẽnnaam sẽn bobl-bã ye. (Yik. 3:10, 11; 4:10; Zer. 1:4-6) Dẽnd pa yãmb bal n tagsd woto ye. La bõe n tõe n sõng-yã?
2. Bõe yĩng tɩ d pa tog n tek zak-zak moonegã bala, n tagsdẽ tɩ zãms nebã Biiblã yaa koe-moondb a taabã tʋʋmde?
2 D da yĩm t’a Zeova zɩ n kos tõnd tɩ d maan bũmb sẽn yɩɩd d pãng ye. (Yɩɩl 103:14) Dẽnd a sẽn yeel tɩ d sõng nebã tɩ b lebg “karen-biisã,” la d “zãms bãmbã” yaa tʋʋmd tõnd sẽn tõe. (Mat. 28:19, 20) A Zeova pa tũus tõnd sʋkã neb nins sẽn tar minimã bal n bobl tʋʋm-kãngã ye. (1 Kor. 1:26, 27) Yaa rẽ n so tɩ d pa tog n tek zak-zak moonegã bala, n tagsdẽ tɩ zãms nebã Biiblã yaa koe-moondb a taabã tʋʋmd ye.
3. Wãn to la a Zeova kõt tõnd minim tɩ d tõe n zãms nebã Biiblã?
3 A Zeova n kõt tõnd minim: A Zeova n kõt tõnd minim tɩ d tõe n sõng nebã tɩ b lebg karen-biisi. (2 Kor. 3:5) Ne a siglgã maasem, a sõnga tõnd tɩ d mi bũmb nins sẽn be Biiblã pʋgẽ wã sõma, tɩ baa sẽn tar-b dũni-kãngã bãngrã pa miẽ ye. (1 Kor. 2:7, 8) A kɩtame tɩ b gʋls karen-saam-kãseng a Zezi sẽn da zãmsd nebã to-to wã n bĩngi, tɩ d tõe n bãng n dɩk a togs-n-taare. A tũnugda ne tigingã me n zãmsd tõnd wakat fãa. Sẽn paase, a kɩtame tɩ d paamd sɛb buud toor-toor d sẽn tõe n tall n zãms ned Biiblã. Wala makre, Biiblã yetame sebrã. Seb-kãngã goamã yaa vẽenega, n sõngd nebã tɩ b wʋmd Biiblã võor nana-nana. Dẽnd Biiblã zãmsg ne ned tõeeme n pa yɩ toog wa d sẽn tagsdã ye.
4. Bõe yĩng tɩ d tõe n kɩs sɩd t’a Zeova na n sõng-d lame?
4 A Zeova sõnga a Moiiz ne a Zeremi tɩ b tõog n tʋm tʋʋmd ning a sẽn bobl-bã. (Yik. 4:11, 12; Zer. 1:7, 8) Tõnd me tõe n kos-a lame t’a sõng-do. D sã n zãmsd ned Biiblã, d sõngd-a lame t’a na n bãng a Zeova sõma, la rẽ pʋd n nooma a Zeova. (1 Zã 3:22) Woto yĩnga, bɩ d modg n kẽes d meng zãng n sõng nebã tɩ b zãms Biiblã, tɩ yaa koɛɛgã mooneg buk a ye sẽn tar bark la kõt sũ-noog n yɩɩda.