Koe-mooneg sẽn womd biisi

D rasem a tãab tigs-kãsengã sã n wa ket semen a tãabo, d na n le yiime n bool nebã. Bõe yĩnga? Bʋʋmã waoogame. Naoor wʋsgo, sẽn sakd-b boollã n wa wã sã n kelg sõssã sẽn tik Biiblã zugã, b sũy yaa noogo. B sã n yã saam-biisã sẽn tʋmd ne yamleoog tɩ bũmba fãa sigl sõma wã, la b ne nebã fãa sẽn zãad b mens neer tɩ zems-n-taar be b sʋkã, noom-b lame. (Yɩɩl 110:3; 133:1; Ezai 65:13, 14) La rẽ yĩnga d sẽn moon n bool nebã woma biisi, tɩ baa neb sẽn yit zĩ-zãrsẽ sak n wa bɩ?

Yʋʋmd 2011 rasem a tãab tigs-kãsengã loogr poore, pag sẽn yã booll sebr a roogã noor n dɩk gʋlsa lɛtr n tool tõnd filiyall a yembre. A Zeova Kaset rãmb sã n da wa na n taas-a koɛɛgã, a zoet n solgame. A yeela woto a lɛtrã pʋgẽ: “M da tara ro-neere, tɩ m sɩdã get m yell sõma. Woto kɩtame tɩ m da tagsdẽ tɩ m paama bũmb nins fãa sẽn na n kõ-m sũ-noogã. La bʋko, m da ket n pa tar sũ-noogo, m pa wʋmd m vɩɩmã võor ye. Rẽ n so tɩ m dɩk m mobillã n kẽn kilo 320 n na n tɩ kelg tigs-kãsengã sibrã daar sõssã.” A sũur yɩɩ noog wʋsgo, hal t’a bool a sɩdã n yeel t’a na n paame n kelg hatã daar sõssã me. Pagã paasa woto: “M kelga sõssã fãa, la m sõs ne a Zeova Kaset rãmb wʋsgo. Mam yãka yam tɩ m na n kell n bao n bãng-b lame n paase.” A sẽn lebg n kulã, a sɩnga Biiblã zãmsgo, la kiis a naas poore, a lebga koe-moond sẽn nan pa reeg lisgu. Ad sẽn yeele: “Mam sũur nooma wʋsg m sẽn yã boollã sebr m doogã noorã, bala masã m vɩɩmã tara võore.”

Kẽer sẽn na n paam boollã sebrã na n waa tigs-kãsengã. Bɩ d moon ne yẽesem n bool nebã. D sã n wa rabd tigs-kãsengã bɩ d sui boollã sebre, tɩ d sã n paam segb bɩ d moon koɛɛgã.

[Zĩ-gũbri, seb-neng a 5]

Bõe la d tõe n yeel n kõ ned sebrã?

Sẽn na yɩl n tõog n pʋɩ sebrã d moonegã zĩigẽ zãnga, yɩta sõma tɩ d ra gomd wʋsgo ye. D sã n pʋʋs ned n sa, d tõe n yeela woto: “Dũniyã gill zugu, d pʋɩta booll seb-kãngã. Yãmb rẽnd la woto. A pʋgẽ wã, y na n paama vẽnegr n paase.” Tall-y yẽesem. D sã n wa pʋɩt sebrã wɩkɛn-dãmbã, d tog n wilga periodik rãmbã me.