Dũniyã gill zugu, d na n modgame n bool nebã tɩ b wa “Tũ-y Kiristã!” rasem a tãab tigis-kãsengã
Koe-moondbã na n le pʋɩya seb-vãado
1 Rɩẽ, d sẽn pʋɩ seb-vãadã n bool nebã tɩ b wa “D fãagrã ta n saame!” tigis-kãsengã sõnga sẽn sak n wa-bã wʋsgo. Neb kẽer ra na n zɩ n kẽng a Zeova Kaset rãmbã tigis-kãsengẽ ye. La b sẽn wa wã, b naaga a Zeova Kaset rãmbã n paam zãmsg sẽn yit Wẽnnaam nengẽ. (Ezai 65:13) B sẽn zĩnd tõnd sʋk n yã zems-n-taar ning sẽn be-d sʋkã yɩ-b-la noog wʋsgo. (Yɩɩl 133:1) Sẽn na yɩl n sõng neb wʋsg tɩ b wa “Tu-y Kiristã!” tigis-kãsengã, d na n le pʋɩya seb-vãad dũniyã gill zugu.
2 Seb-vãadã pʋɩɩb sẽn wom biis nins rɩẽ: Kibay nins d sẽn paam dũniyã gill zug seb-vãadã pʋɩɩb wɛɛngẽ wã wilgdame tɩ d tõog n boola neb wʋsg tɩ b wa “D fãagrã ta n saame!” tigis-kãsengã. Zĩis wʋsgo, kiba-kɩtbã goma sɛbã pʋɩɩb yell tɩ nebã wʋme. Wala makre zʋrnall a ye pʋgẽ, b goma seb-vãadã pʋɩɩb yell n yeel woto: “Sẽn na yɩl n tõog n kõ ned fãa seb-vãoog nand tɩ tigis-kãsengã ta, a Zeova Kaset rãmbã modgda wʋsgo: b moonda lɛɛr dãmb wʋsgo, n kẽnd zĩis sẽn zãre, la b sõsd ne nebã n pa kaoosdẽ ye.” Tẽng a to pʋgẽ, saam-biisã sẽn lagem taab n pʋɩɩ seb-vãadã tɩ zũnd-zãnd pa zĩndã yɩɩ kiba-kɩtbã noog tɩ b gom rẽ yell televiziõ wã. Nand tɩ tigis-kãsengã raar ta, sẽn na ta zʋrno rãmb a tãab n gom seb-vãadã pʋɩɩb yell sõma. Zʋrnall a ye pʋgẽ, kiba-kɩt n gʋls n gom a Zeova Kaset rãmbã yell tɩ pid sẽn yɩɩd seb-nens a yiibu. A goma tõnd sẽn tẽed bũmb ninsã yelle, d saam-biirã, seb-vãadã pʋɩɩb la tigis-kãsengã me yelle. Koe-moond a ye sẽn wa n kõt ned a yembr seb-vãoogo, a soabã yeela woto: “Mam da karemda zʋrnallã sẽn gomd yãmb seb-vãadã pʋɩɩb yellã mas-masã bala!” Ned a to me yeela woto: “Mam da karemdã zʋrnallã sẽn gomd yãmb yell mas-masã la yãmb sẽn wẽneg n be ka wã! Yaa sẽn na yɩl n bool ma-me bɩ?” A paasame t’a Zeova Kaset rãmbã sẽn maand bũmb ningã yaa sõma wʋsgo.
3 Neb wʋsg zãa b seb-vãadã n wa tigis-kãsengẽ wã. Kẽer me yii zĩ-zãrsẽ n wa kelg sõssã. D sẽn modg n kõ nebã seb-vãadã kɩtame tɩ neb wʋsg wa tigis-kãsengã. Wala makre, tẽng a ye pʋgẽ, neb koabg zugu yɩɩ neb 27 n wa n paase, tɩ nebã sõor yɩɩg rɩẽ tigis-kãsengã nebã.
4 D pʋɩ seb-vãadã d moonegã zĩig fãa: Tigis-kãsengã raar sã n wa ket semen a tãabo, y tõe n sɩnga seb-vãadã pʋɩɩbo. Y segd n maana modgr n pʋɩ seb-vãadã tigingã mooneg zĩig fãa. Yãmb moonegã zĩig sã n yalmẽ tɩ tigis-kãsengã wa ket semene, y tõe n maana yam ne yam n bas seb-vãadã neb nins y sẽn pa mikã rot noya. Tiging fãa segd n modgame n pʋɩ seb-vãadã fãa tɩ ta b moonegã zĩig neb fãa. Sã n wa mik tɩ b pa tõog n pʋɩ fãa n sa, tigingã so-pakdbã tõe n tʋma ne rẽ.
5 Y sẽn tõe n yeel bũmb ninga: Y tõe n yeela woto: “D pʋɩta seb-vãad n boond nebã tɩ b wa naag-d n maan tigis-kãseng sẽn na n zĩnd dũniyã gill zugu. Yãmb dẽnd la woto. Seb-vãoogã pʋgẽ, y na n yãa kibay a taab n paase.” Y sã n sõsd ne nebã n pa kaoosdẽ, y na n tõog n pʋɩya seb-vãadã tɩ ta neb wʋsgo. Ned sã n tar sokr n dat n sok-yã, bɩ y rɩk sẽk n leok a soabã. Ned sã n wilg t’a rat n bãng n paasame, bɩ y rɩk note, la y lebg n tɩ kaag a soabã tao-tao.
6 Tara yõod wʋsg tɩ d modg n tũ Kiristã! (Zã 3:36) Rasem a tãab tigis-kãsengã na n sõnga neb nins sẽn na n wa wã tɩ b tõog n tũ Kiristã. Yaa vẽeneg tɩ d na n tõog n le tũnuga ne seb-vãadã n bool neb wʋsg tɩ b wa “Tu-y Kiristã!” tigis-kãsengã. Bɩ y modg n bool neb wʋsg tɩ b wa. Y sẽn na n naag n moon tigis-kãsengã dũniyã gill zugã yĩnga, bɩ a Zeova ning y fãa modgrã barka.