Dũniyã gill zugu, d na n boola nebã tɩ b wa “Tõnd fãagrã ta n saame!” tigis-kãsengã

Tiging fãa koe-moondb na n pʋɩya seb-vãad b sẽn yiis rẽ yĩnga

¹ D na n moona koe-noogã ne seb-vãad n wilg nebã d tigis-kãsengã d sẽn na n maan tẽns 155 pʋsẽ wã. Tẽns kẽer pʋsẽ, tʋʋm kãngã na n sɩnga yʋʋmd 2006 sig-noy kiuugã n tall n tãag tigis-kãsemsã saabo.

² Tõnd sẽn vɩ yaoolem dayã pʋsẽ tɩ saabã sɩd kolgã yĩnga, tigis-kãsem-kãensã na n gom n tadga Wẽnnaam sẽn kãab t’a na n fãag-d-la ne dũni-wẽng kãngã wã zugu. Rẽ na n daoola neb nins sẽn zems ne vɩɩm sẽn-kõn-sa wã. Koɛɛgã na n kɩtame tɩ b tags bũmb nins sẽn wat beoog daarã yelle. Sẽn na yɩl tɩ neb milyõ rãmb paam n wʋm kãab-kãngã sẽn kengd raood la kõt saagrã, b sagenda a Zeova Kaset rãmbã tigims sõor sẽn yɩɩd 98000 dũniyã zugã tɩ b modg n bool nebã tɩ b wa tigis-kãsengã.

³ B na n kõo tigimsã seb-vãadã tɩ sek tɩ koe-moond fãa paam sẽn na ta bãmb 50. Sã n kelle, tigingã so-pakdb tõe n dɩk n pʋyame. Tiging fãa pʋgẽ, seb-vãadã pʋɩɩb na n sɩnga semen a tãab sẽn deng tigis-kãsengã. Rẽ na n kɩtame tɩ b paam sẽk wʋsg n tõog n pʋɩ seb-vãadã tigingã mooneg zĩig fãa la bala.

⁴ Sã n tõeyã, zak fãa pʋgẽ d na n kõo ned kam fãa seb-vãoogo. La d sã n pa mik neb kẽer b zagsẽ, d tõe n basa seb-vãoog zakã noore. D segd n maana d sẽn tõe fãa n pʋɩ seb-vãadã gill semen a tãabã pʋgẽ.

⁵ D kɩsa sɩd tɩ wala b sẽn wilg sõs-kãngã pʋgẽ wã, d sã n pʋɩ seb-vãadã zĩig zãnga, neb wʋsg na n waa “Tõnd fãagrã ta n saame!” tigis-kãsengã. D pʋʋsdame t’a Zeova ning modgr ning y ned kam fãa sẽn na n maan n pʋɩ nebã seb-vãadã dũniyã gill zugã bark wʋsgo.