D na n pʋɩya seb-vãad n bool nebã

1. Wakat bʋg la d na n sɩng tigis-kãsengã seb-vãadã pʋɩɩbo?

¹ Rẽ yĩnga, y sã n yiis ligd wʋsg la y rɩk sẽk sõma n segl rɩɩb sẽn yaa toor zalle, n na n dɩ ne y zo-rãmb wall y zak rãmba, y kõn bool-b ne yẽesem sɩda? Woto me, saam-biisã modga wʋsgo, n segl yʋʋmd 2015 tigis-kãsengã. A ket tɩ semen a tãabo, d na n pʋɩya seb-vãoog n bool nebã. Bõe n na n sõng-d tɩ d bool-b ne yẽesem la sũ-noogo?

2. Bõe n na n sõng-d tɩ d pʋɩ seb-vãoogã ne yẽesem?

² D sã n tags tigis-kãsengã sẽn nafd tõnd to-to wã yelle, na n sõng-d lame tɩ d pʋɩ seb-vãoogã ne yẽesem n bool nebã. (Ezai 65:13, 14) Segdame me tɩ d tẽeg tɩ seb-vãadã d sẽn pʋɩtã womda biisi. (Ges-y zĩ-gũbrã gom-zug sẽn yaa “Tʋʋmdã womda biisi.”) D sẽn bool-b rãmbã kẽer na n waame, la sãnda pa na n wa ye. Nebã sã n wa wʋsg wall b pa wa me, d sẽn modg n pʋɩ seb-vãoogã na n kɩtame t’a Zeova yʋʋrã paam pẽgre, la wilg nebã a sõmblmã.—Yɩɩl 145:3, 7; Wil. 22:17.

3. Wãn to la d na n pʋɩ seb-vãoogã?

³ Tiging fãa kãsem-dãmb sull segd n bao n bãnga b tigingã sẽn na n pʋɩ seb-vãadã to-to tɩ ta zĩig zãnga. Bãmb n na n wilg tigingã neb sã n tõe n dɩgla seb-vãoogã zags nins pʋsẽ b sẽn pa yã nebã, wall b pʋɩ-a zãma sẽn beẽ. Wɩkɛn fãa, sã n tõe bɩ y naag periodik-rãmbã ne seb-vãoogã n kãab nebã. Seb-vãadã pʋɩɩb poore, d sã n tẽeg d sẽn bool nebã ne yẽesem to-to tɩ b wa tigis-kãsengã a Zeova sẽn segl n kõ-dã, d sũy na n yɩɩ noogo.

Tʋʋmdã womda biisi

Yʋʋm a wãn sẽn looge, saam-bi-poak n da pʋɩt tigis-kãsengã seb-vãoogã, n da sãmbd d modgrã fãa sã n na n woma biisi. A ra sokda a meng woto: ‘Rẽ yĩnga nebã sɩd na n waa tigis-kãsengã?’ La tigis-kãsengã sibrã yibeoogo, a sẽn ta n zĩndã, a wẽnemdame n yã rao a yembr sẽn yaa Ẽnd tũudum neda, sẽn maneg a meng sõma n zĩ a sɛɛgẽ. Saam-bi-poakã pʋʋs-a lame, n togs-a a yʋʋre. Sõsgã sẽn kẽng taoorã, raoã wa n yeel-a lame t’a paama tigis-kãsengã seb-vãoogã, n wa n na n kelge. A soka saam-bi-poakã sogsg toor-toore, t’a leoke. A yeelame t’a sũur yaa noog ne sõssã a sẽn kelgã, kɛlgdbã sẽn maneg b mens to-to, la b sẽn zãad b mens sõma wã. Baraare, saam-bi-poakã sõsa ne rao a to ne a pag sẽn zĩ n yɛg-a. Bãmb me yeelame tɩ b paama seb-vãoogã, la tɩ b kẽe biis n wa. B wilgame tɩ b sũy nooma ne sõssã fãa, la tɩ b magdame n na n wa hatã. Woto fãa kɩtame tɩ saam-bi-poakã maneg n kɩs sɩd tɩ d seb-vãadã pʋɩɩb tara yõodo.
Tigis-kãseng sẽn zĩnd sẽn nan pa kaoose, saam-biig ne a pag sẽn yaa so-pakdb n pʋʋs rao ne a pag sẽn kʋʋle. B yeelame tɩ yaa pipi la woto bãmb sẽn wa tigis-kãsenga. Saam-biigã ne a pagã sok-b lame tɩ ãnd n kõ-b seb-vãoogã, tɩ b leok tɩ daar a ye, bãmb yiime n wa mik seb-vãoog b kʋɩlengã tẽngre. B paasame tɩ b karma seb-vãoogã, la b gʋls a poorẽ wã zĩig ning b sẽn wilg tɩ sẽn dat-a sebrã bɩ a gʋls n toolã. Saam-biis kẽer bool-b lame tɩ b naag-b n dɩ vʋʋsgã sasa. B kelga sõssã fãa tɩ yɩ-b noogo, hal tɩ b tʋlg n na n lebg n wa vẽkembeoogã. Saam-biisã baoa neb tɩ b na n tɩ kaag-ba, n sõng-b tɩ b wʋm koɛɛgã n paase.