Sɩpaolg kiuugã, d na n pʋɩya Rĩungã kibay N^o 38 seb-vãoogã!

1. Sogs-bʋs la nebã nong n sokd sẽn ki-bã wɛɛngẽ, la wãn to la b na n leok sogs-kãens sɩpaolg kiuugã?

¹ Baa d sẽn yaa tũudum ning neda, kũum yaa nebã fãa bɛ. (1 Kor. 15:26) Neb wʋsg sokda b mens sẽn ki-bã sẽn beẽ, la b sã n na n le yã-b lame. Rẽ n so tɩ tõnd tigimsã sẽn be dũniyã gill zugã na n dɩk kiuug tõr n pʋɩ Rĩungã kibay N^o 38 soabã. A gom-zugã la woto: Sẽn ki-bã tõe n sɩd vʋʋgame bɩ? Pʋɩɩbã na n sɩnga sɩpaolg kiuug pipi raarã. D sã n pʋɩ-a ki-kãng n sa, d na n wa tar-a lame n moond koɛɛgã wa d sẽn maand ne seb-vãad a taabã.

2. Rĩungã kibay N^o 38 seb-vãoogã yaa wãn-wãna?

² Seb-vãoogã sẽn yaa to-to: B maana Rĩungã kibay N^o 38 seb-vãoogã tɩ d sã n põd-a bɩ a gom-zugã sẽn yaa sokrã be a pipi nengã zugu, n paas gom-kãensã: “Yãmb leokdame tɩ . . . n-ye bɩ?, ayo bɩ?, bɩ y leokdame tɩ tõe tɩ b vʋʋge?” Ned sã n deeg seb-vãoogã n lak-a, a na n yãa Biiblã sẽn leokd gom-zugã sokrã to-to, la leoorã sẽn tõe n naf-a to-to wã me. A leb n na n bãnga bũmb ning sẽn kɩt t’a segd n tẽ Biiblã sẽn yetã. Sokr n be seb-vãoogã poore, t’a sã n karem bɩ na n kɩt t’a tagse, la a tʋlg n paam a leoorã.

3. Wãn-wãn la d na n pʋɩ Rĩungã kibay N^o 38 seb-vãoogã?

³ D sẽn na n pʋɩ-a to-to: D na n pʋɩ-a-la wa d sẽn pʋɩt a Zezi kũumã tẽegr booll seb-vãadã ne rasem a tãab tigis-kãsengã booll seb-vãadã to-to wã. Kãsem-dãmbã na n wa wilg-y-la y sẽn na n pʋɩ-a to-to y moonegã zĩig fãa, wa lɛtr ning b sẽn paam yʋʋmd 2013 tʋʋl-nif kiuugã pʋgẽ wã sẽn togsã. Tigims nins mooneg zĩig sẽn paoodã tõe n sõnga tigims nins sẽn pẽ bãmb tɩ b moonegã zĩig yalmẽ wã, n pʋɩ seb-vãoogã. Y sã n wa na n deeg Rĩungã kibay N^o 38 seb-vãoogã, bɩ y reeg sẽn na sek semen pʋgẽ pʋɩɩb bala. D sã n wa pʋɩ-a zak-zak moonegã zĩisẽ tɩ seke, d tõe n pʋɩ-a-la zãma sẽn beẽ fãa. Seb-vãoogã sã n sa tɩ kiuugã nan pa ki, d tog n talla sɛb nins d sẽn segd n kãab kiuugã pʋgẽ wã n moone. Sɩpaolg kiuug pipi sibrã, d pa na n kãab neb Biiblã zãmsg ye. Yaa seb-vãoogã la d na n kell n pʋɩ. Wɩkɛn-dãmbã me, ned sã n dat periodik rãmba, d tõe n kõ-a lame. Segl-y y meng pĩnda, n wa naag n pʋɩ seb-vãoogã sõma.