Tʋʋm-kãseng n na n zĩnd zĩ-likr dasem 16 n tɩ tãag sɩpaolg rasem 12 wã!
1 Kiuug ning sẽn watã, dũniyã gill zugu, b na n pʋɩya Rĩungã Kibay No 37 soaba. A gom-zugã la woto: “Ziri tũudmã saab kolgame!” Zĩ-likr kiuugã pipi raar n tãag a rasem 15 wã, d na n pʋɩya Gũusg Gasgã la Réveillez-vous ! wã. La zĩ-likr kiuugã rasem 16 tẽnẽ wã daar tɛkã n tãag sɩpaolg kiuugã rasem 12 hatã, d na n pʋɩya Rĩungã Kibay No 37 soabã wʋsgo. La pʋɩ-kãngã sasa, wɩkɛn dãmbã, d na n paasda sɛb nins d sẽn kãabd nebã raasenkamã n pʋɩta.
2 Neb nins sẽn tõe n naag tʋʋmdẽ wã: Neb nins fãa sẽn zoe n moond koɛɛgã wakat fãa wã segd n kẽesa b mens tʋʋmdã pʋgẽ sõma. Kẽer na n tõog n dɩka sõngr so-pakrã sasa kãnga. Y sã n tara kamb wall Biibl karen-biis sẽn bɩt tẽebã wɛɛngẽ, bɩ y sõng-b tɩ b tʋg n yã kãsem dãmbã, tɩ b ges b sã n tõe n kõ-b-la sor tɩ b lebg koe-moondb sẽn pa reeg lisgu. Kãsem dãmbã segd n tɩ sõsa ne koe-moondb nins sẽn bas koɛɛgã moonegã n sagl-b tɩ b kẽes b mens tʋʋmdẽ wã. B tõe n sagl-b lame tɩ b naag koe-moondb nins sẽn tar minimã n tʋme.
3 B na n toola Rĩungã Kibay No 37 soabã seb-vãad wʋsg tigimsã fãa, sẽn na yɩl tɩ koe-moondbã la so-pakdbã ned kam fãa tõog n paam sẽn na ta bãmb 50. Neb nins sẽn zãmsd Biiblã n yaool n nan pa koe-moondbã ned kam fãa tõe n paama seb-vãad a nu, n pʋɩ a roagdb la a zo-rãmba. Koe-moondbã fãa segd n sõta seb-vãadã b sẽn pʋɩtã sõore, n wa gʋls b zĩ-likr la b sɩpaolg kiisã rapoor dãmbã kudsẽ n kɩse. Sekertɛɛrã na n wa sõda tigingã neb sẽn pʋɩ seb-vãad sõore, n gʋls rapoor n tool tʋʋmdã will biru zĩ-likr la sɩpaolg kiisã kũumẽ. Rẽ loogr poor tɩ seb-vãadã sã n ketẽ, b tõe n kell n tall-b lame n tʋm koe-moonegã pʋgẽ.
4 Y sẽn tõe n yeel bũmb ninga: Y sã n na n kãab ned seb-vãoogã bɩ y gom koɛɛg-koɛɛga. Boto na n kɩtame tɩ d tõog n taas koɛɛgã neb wʋsgo. Wala makre, y tõe n yeela woto bala: “Mam pʋɩta seb-vãad b sẽn pʋɩt nebã zaalem dũniyã gill zug n na n sõng-ba. Koɛɛg sẽn tar yõod wʋsg n be a pʋgẽ wã. Yãmb dẽnd la woto. Reeg-y n karm-yã.” Yɩta sõma tɩ d ra yit ne d koe-moonegã kord ye. D segd n gʋlsda neb nins fãa sẽn wilg tɩ b rat n bãnga koɛɛgã n paasã yʋya.
5 D sẽn tõe n gilg d moonegã zĩig to-to n soge: Wall tɩ d pʋɩ Rĩungã Kibay seb-vãadã soayã noyã, d na n deng n pʋɩ-b-la zak-zak la koosmã zĩisẽ n gilg n soge. D segd n gʋlsda zags nins d sẽn pa yãẽ nebã nimero rãmba, n wa lebg n kẽng baraar wall raar a to semennã pʋgẽ. Sɩpaolg kiuugã rasem a 6 tɛkã, d sã n ta ned zakẽ n pa mik-a, d tõe n basa seb-vãoogo. La tigingã mooneg zĩig sã n yalmẽ tɩ sẽk ning b sẽn kõ wã pa sekd a gilg n soge, seb-vãadã pʋɩɩb sɩngrẽ bala, kãsem dãmbã na n kõo sor tɩ d sã n ta zak n pa mik ned bɩ d bas seb-vãoog la d sãage.
6 “Babilon Kãsengã” sãoong kolgda tao-tao. Nand tɩ b sãam-a fasɩ, nebã segd n yii a pʋgẽ. (Wil. 14:8; 18:8) Segl-y y mens n wa tõog n naag n tʋm tʋʋm kãngã b sẽn na n tʋm dũniyã gill zug n sõng nebã tɩ b bãng tɩ ziri tũudmã sãoong kolgame wã!