“Yʋʋm tusr paalgã: Yaa beoog-daar bʋg la a tar y yĩnga?”

¹ Tẽngã gill zugu, sʋk-kãngã zĩnda nebã yamẽ. Baa ãdem-biisã sẽn maan yɛl wʋsg yʋʋm kob-gĩna sẽn loogã, nebã tẽeb ka paam pidsg ye. Bala zu-loe-kãsems nins sẽn nams ninsaalbã yʋʋm tusa wã ket n beeme. (Zoob 14:⁠1; Yɩɩl 90:⁠10) Yɛ la ãdem-biisã tõe n paam yolsgo?

² Zĩ-likr la sɩpaolg kiisã, d na n paama zu-noog zall n kõ neb a taabã sʋk kãngã leoore. Wãn-wãn to? Ne Rĩungã Kɩbay N° 36 pʋɩɩb maasem. A gom-zugã yaa: “Yʋʋm tusr paalgã: Yaa beoog-daar bʋg la a tar y yĩnga?” Zĩ-likr kiuugã pipi pʋɩ-sʋkã, d na n kãaba Gũusg Gasgã la Réveillez-vous! zʋrno rãmba. Rẽ poore, sẽn sɩng ne tẽne wã raar zĩ-likr kiuug rasem 16 n tɩ ta arzũma raar sɩpaolg kiuug rasem 17, d na n maana Rĩungã Kɩbay N° 36 pʋɩɩb sẽn yaa kãsenga. Pʋɩɩb tʋʋmd kãngã wakate, d na n modgame n bas Rĩungã Kɩbay N° 36 ne neb ra-zaan daya. Wɩkɛn dãmbã sasa, d na n wilg-a lame n naag ne yaoolem periodik rãmbã.

³ Y na n kẽesa y meng zãng-zãng bɩ? Kẽem dãmbã, ministɛɛr sõgen dãmbã, la so-pakdbã na n tʋlgame n lʋɩ pʋɩɩb tʋʋm kãngã taoore, tɩ bõe, yaa bãmb la taoor dãmb tʋʋmdã pʋgẽ. Koe-moondb wʋsg demsa b yɛlã n yɩ sõngr so-pakb pʋɩɩbã kiis pʋgẽ, a yembr bɩ b yiiba fãa sasa. Koe-moondb a taab rɩkda segls n dɩk sẽk sẽn yɩɩd raasenkamã n kẽes koe-moonegã pʋgẽ.

⁴ Tigingã Sebr zãmsg taoor lʋɩtb tõe n daoola b sullã ned fãa t’a kẽes a meng zãng-zãng Rĩungã Kɩbay N° 36 pʋɩɩb pʋgẽ. Tõeeme tɩ koe-moondb kẽer n lebg neb sẽn ka le moonda. Kẽem dãmbã segd n tɩ gesa nin-kãensã n bãng b sẽn tõe n maan bũmb ning n sõng-ba. Tõeeme tɩ b tõog n dɩk segls tɩ koe-moond sẽn tar minim naag ned ning sẽn da ka le moondã n moon ki-kãensã. Tõe n yaa Rĩungã Kɩbay N° 36 wilgr sẽn yaa nana bal la b baood sẽn na yɩl n kɩt tɩ koe-moondb kãensã lebg n moon yɛsa.

⁵ Rẽ me leb n yaa zu-noog n kõ Biiblã karen-biis nins sẽn zãms Bãngr sebrã n kolg saabã, la sẽn tar zʋg nins b sẽn baoodã n na n yɩ koe-moondb sẽn ka reeg lisgã tɩ b sɩng koe-moonegã. Baa kom-bõonegã tõe n kẽesa b mens sõma-sõma tʋʋm kãngã sẽn be yamleoogã pʋgẽ.

⁶ D sẽn dat bal yaa wilgr sẽn yaa nana. Y tõe n yeelame:

◼ “Mam dɩka m sẽka ne yamleoog n na n sõng n taas koe-kãngã sẽn tar yõod wʋsgã zak fãa sẽn be [wilg-y galʋ-tẽngã bɩ tẽn-bilã yʋʋre] neba. Ad yãmb rẽnda. D bõos tɩ y karm-a.” Y sã n wa pʋɩt Rĩungã Kɩbay N° 36, yitẽ-la sõma tɩ y ra zã korg ye.

⁷ Yiib tigiss moonegã yĩng b sẽn deng n sigl sõma: Kẽem dãmbã segd n gesame tɩ seglsã b sẽn dɩk kasetã kũun wɛɛngẽ wã yɩ segls sẽn zems b sẽn tõe n tũ. Sẽn yɩɩd fãa tʋʋmdã yel-gɛt segd n kɩsa sɩd tɩ zags la koosem zĩis b sẽn tõe n moonẽ bee wʋsg tɩ ned kam fãa tõe n kẽes a meng zãng-zãng tʋʋmdã pʋgẽ. Zĩig ning b sẽn tõe n maan dẽ fãa, b segd n sigla yiib tigiss moonegã yĩng ra-zaan daar fãa, wɩkɛn dãmbã, la zaaba wã. B tõe n dɩka segls tɩ yiib zĩnd wĩnd-kaoorã baasgẽ lekoll karen-biisã, neb nins sẽn tʋmd n ledgd taabã, la neb a taab yĩnga.

⁸ Bũmb ning d sẽn na n maan sẽn ka-b yiyã wɛɛngẽ: Tõnd bõn-datla yaa gom ne neb wʋsg wa d sẽn tõe tɛka. Ned sã n ka be yiri, gʋls-y adɛrsã n lebg n kẽng daarã lɛɛr a to pʋgẽ. Pʋɩɩbã yaoolem semen tɩ y sã n nan ka tõog n yã nin-kãensã, y tõe n basa b yĩng Rĩungã Kɩbay N° 36 sebr a yembr zĩig ning loaagdb sẽn pa na n yã. Tigingã kẽem dãmb tõeeme n sagl tigingã neb tɩ b bas Rĩungã Kɩbay N° 36 sebr a yembr sẽn ka-b yiyã yĩnga b pipi kẽngrẽ wã, b sã n wa tʋmd tẽn-kɩremsẽ wã la babs nins mooneg zĩis sẽn be wʋsg tɩ b ka tõe n maan-b n sa pʋɩɩbã tʋʋmd wakatã.

⁹ Bɩ d tʋm wʋsgo! Tigimsã segd n modgame n tʋm b moonegã zĩig n sa tɩ pʋɩɩbã nan da ta a tɛk sɩpaolg kiuugã rasem 17 wã ye. Yãmb moonegã zĩig sã n yalma wʋsgo, koe-moondb kẽer tõe n moona b yen-yen zĩis sẽn zems la sẽn ka tar yellã pʋsẽ. Segls a woto na n kɩtame tɩ yɩ nana n yɩɩd tɩ d tõog n yã sẽn zems-b ne koe-noogã wʋsg wa d sẽn tõe tɛka. Modg-y n gʋls ratem ning fãa y sẽn yã wã, n bĩngi.

¹⁰ Ka tɩlae tɩ b maan Rĩungã Kɩbay N° 36 komand ye, bala b na n toola tiging fãa sɛb sõor b sẽn yãk a yĩnga. B na n kõo zall so-pakdbã, wakat fãa so-pakdbã, la sõngr so-pakdbã ned kam fãa sɛb 250 t’a pʋɩ, la b kõ tigingã koe-moond fãa sɛb 50 t’a pʋɩ. Dẽ y seglame n sa, la y tʋll ne yãgb n maan tʋʋm kãngã sẽn yaa zallã bɩ? Ad yaa zu-noog meng la d tar n na n kɩt tɩ d taabã fãa bãng bũmb ning Wẽnnaam sẽn kãab tɩ na n waa ka la bilfã!