Zĩ-likr 20 n tɩ tãag sɩpaolg 16, d na n pʋɩya seb-vãado!

¹ Sẽn na n sɩng ne zĩ-likr kiuugã rasem 20 tẽne wã daar n tɩ tãag sɩpaolg kiuugã rasem 16 tẽne wã daare, d na n pʋɩya seb-vãad dũniyã gill zugu. A gom-zugã la woto: Yãmb dat n bãnga sɩdã bɩ? D saagdame tɩ seb-vãadã na n sõnga neb wʋsg tɩ b tall naneb ne Biiblã sẽn yaa sɩdã yẽgrã.—Zã 17:17.

² Seb-vãoogã tikda Biiblã zug n leokd sogsg a yoob sẽn tar yõod wʋsgo. Bãmb la woto: “Tõnd yell sɩd paka Wẽnnaam bɩ?” “Zabã la namsgã na n wa saame bɩ?” “Ned kũum poore, bõe n maande?” “Sẽn ki-bã tõe n wa vʋʋgame bɩ?” “Wãn to la m segd n pʋʋs tɩ Wẽnnaam deege?” la “M na n maana wãn n paam sũ-noog hakɩka?” Kiris-neb ne yʋʋrã tũudmã taoor dãmb zɩ n tõog n leok sogs-kãensã sõma ye. Neb wʋsg sẽn yet tɩ b pa kiris-neb meng mi n sokda b mens sogs-kãensã, la tõe tɩ b pa mi tɩ Biiblã leokda rẽ vẽeneg ye. Dẽnd seb-vãoogã sẽn wilgd bũmb ningã na n yɩɩ nebã noog wʋsgo.

³ Gilg-y y moonegã zĩig fãa: Maan-y y sẽn tõe tɛk n kẽ zagsã fãa n kãab nebã seb-vãadã. Yãmb moonegã zĩig sã n yalmame, tõe tɩ kãsem dãmbã na n sagl-y lame tɩ y sã n kẽ zak pʋgẽ n pa mik ned bɩ y bas seb-vãoogo. Tẽeg-y n kãab seb-vãoogã y yagsã, y buudã neba, y mitinsã, y tʋmd-n-taasã, y karen-bi-taasã, la neb nins yãmb sẽn sõsd ne wakat fãa wã. Y tõe n manega y sẽkã sẽn na yɩl n yɩ sõngr so-pakd zĩ-likr la sɩpaolg kiisã. Y sã n tara biig bɩ Biibl karen-biig sẽn maand modgr wʋsgo, tɩ y tagsdẽ t’a tõe n naagame n pʋɩ seb-vãadã wa koe-moond sẽn pa reeg lisgu, bɩ y tɩ wilg kãsem dãmbã.

⁴ D sẽn na n yeel bũmb ninga: Sẽn na yɩl n paam n taas koɛɛgã neb wʋsgo, yɩta sõmã tɩ d gom koɛɛg-koɛɛga. Yãk-y sokr a ye seb-vãoogã zug n soke, n yaool n wilg a soabã leoorã sẽn be a pʋgẽ wã. Woto na n kɩtame tɩ koe-moondbã fãa tõog tɩ b sɩngr goamã zems ne b moonegã zĩigẽ nebã. Ned sã n wilg t’a rat n bãng n paasame, bɩ y rɩk not rãmb la y kɩt t’a yãk daar tɩ y lebg n wa sõs ne-a. Wɩkɛn dãmbã me, d na n naagda seb-vãadã ne zʋrno rãmbã n pʋɩta. Sɩpaolg kiuugã rasem 16 loogr poore, d na n kãabã nebã Biiblã yetame sebrã. Seb-vãadã sã n ketẽ, d na n tʋma ne-b wa d sẽn tʋmd ne a taabã to-to wã.

⁵ D sɩng Biibl zãmsg ne nebã: Sẽn yɩɩd fãa, b yiisã seb-vãoogã sẽn na yɩl n sõng tõnd tɩ d sɩng Biiblã zãmsg ne nebã. Y sã n wa lebg n kẽng n na n tɩ sõs ne ned sẽn wilg t’a rat n bãng n paasame, y tõe n sok-a lame n bãng leoor ning sẽn keng a raood la sẽn bels-a n yɩɩda. Wilg-y-yã-a tõnd sẽn zãmsd Biiblã ne nebã to-to tɩ be seb-vãoogã poorã, la y kõ-a Biiblã yetame sebrã. Sã n tõeeme, bɩ y ges sak ning sẽn wɛgsd gom-zug ning a sẽn yãkã pʋgẽ, n yãk sull a ye bɩ a yiib sẽn kõt kibay wʋsg n zãms-a koɛɛg-koɛɛga.

⁶ A Zeova baooda neb sẽn na n waoog yẽ “ne b sɩɩse la ne sɩda.” (Zã 4:23) Bɩ d fãa modg n pʋɩ seb-vãadã wʋsgo, n sõng nebã tɩ b bãng sɩdã!