D gʋʋl ratem ning Rĩungã Kɩbay N° 36 sẽn nekã
1 Yãmb zoe n pʋɩɩ Rĩungã Kɩbay N° 36 sɛb nins b sẽn kõ yãmbã n sa bɩ? A maana sʋkr sẽn zems a wakat sẽn na yɩl tɩ neba fãa tags a zugu: “Yʋʋm tusr paalgã: Yaa beoog-daar bʋg la a tar y yĩnga?” Yʋʋmd 2000 wã sẽn da wa n kolgdẽ wã, bũmb nins neba sẽn da gẽegd tɩ yʋʋm tusr paalgã wa ne wã ra yaa toɛ-toɛy wʋsgo. Rĩungã Kɩbay N° 36 goma yel-kãens b sẽn da gẽegdã kẽer yelle, la a tẽegd tõnd tɩ dũniyã yɛl sẽn yaa to-to wã pa kõt tõnd tikr tɩ d tõe n tall bas-m-yam ne beoog-daar ye. Yʋʋm tusr ning bal sẽn na n wa ne laafɩ la bãan neb wʋsg sẽn baoodã ya a Zezi Kirist Yʋʋm tusr naamã. Tõnd sẽn tar bas-yard t’a Rĩungã yaa yel-sɩdã tusa tõnd tɩ d pʋɩ Rĩungã Kɩbay N° 36 neb nins d sẽn tõog n segã.
2 Neba manesem sẽn yɩ to-to ne Rĩungã Kɩbay: Rĩungã Kɩbay pʋɩɩb ning sẽn loogã yɩɩ bũmb sẽn keng tõnd sõma d tʋʋmdã pʋgẽ. Rĩungã Kɩbay N° 35 wã pʋɩɩb wɛɛngẽ, Kanada filiallã gʋlsa woto: “Koe-moondbã la so-pakdbã teela pʋɩɩb tʋʋm-kãngã sẽn yaa zallã ne yẽesem pʋʋgã pʋgẽ, sẽn paase, b vɩɩmda yɛl wʋsg sẽn kengd raoodo.” Sik kae tɩ y wilga yẽesem a woto buud ne Rĩungã Kɩbay N° 36 pʋɩɩbo.
3 Rĩungã Kɩbay pʋɩɩb tʋʋmd ning b sẽn maand masã wã segd n saa yʋʋmd 2000, sɩpaolg kiuug rasem 17. Yãmb saaga y tigingã mooneg zĩig n sa bɩ? Y sã n pa saag-a n sa, kẽem dãmbã tõe n kos-y lame tɩ y kell n kẽng taoor ne pʋɩɩbã tʋʋmd hal tɩ ta sɩpaolg kiuugã baasgo.
4 Manesem bʋg la nebã zoe n tall Rĩungã Kɩbay N° 36 pʋɩɩb taoor yãmb babgẽ wã? Neb sõor sẽn paood bal n na n pids kupõ wã n kos Baood seb-bilã la/bɩ yirẽ Biibl zãmsgo. Baasg zãnga, neb wʋsg sẽn yɩɩd sẽn deng n wilg ratem yʋʋm tusrã wɛɛngẽ wã, ka na n maan bũmb tɩ sã n ka a Zeova Kaset soab n lebg n tɩ ges-b ye. Y segd n lebg n tɩ gesa neb nins fãa sẽn wilg ratmã. Wakat bʋg la yaa sõma tɩ y maan dẽ? Y segd n lebg n tɩ gesa a soabã tao-tao wʋsg wa y sẽn tõe tɛka.
5 Ges-y yel-kãensã b sẽn vɩɩmdã, lebg-n-tɩ-ges rãmb b sẽn maan Rĩungã Kɩbay N° 35 wã basb poorã sẽn wa ne wã. Irlãnd so-pakd a ye basa Rĩungã Kɩbay sebr ne rɩɩb koosg roog soaba. Pagã sũur yɩɩ noog wʋsg ne sebrã hal t’a yeel saam-bi-poakã t’a lebg n wa. Rasem a yiib poore saam-bi-poakã lebg n kẽngame, tɩ Biibl zãmsg sɩnge. Danemarke, b basa Rĩungã Kɩbay sebr zak a yembrẽ neb sẽn da ka be yir wakate. Baraar bala, pag ning sẽn da vɩ zag-kãng pʋgẽ wã toola kupõ wã filiallẽ wã, tɩ filiallã me taas-a bab-kãng tiginga. Sẽn deng semen kãng saab menga, saam-bi-pogs a yiib n kẽng pagã nengẽ, n dɩk segls n sɩng Biibl zãmsgo, sẽn paase pagã kẽnga a pipi tigisg Rĩungã Roogẽ!
6 Bũmb ning y sẽn na n yeel y sã n wa lebg n kẽngã: Lebg-n-tɩ-ges rãmb maaneg Rĩungã Kɩbay basb poor yaa nana la bala, la a yaa bũmb sẽn be yamleoog tõnd ministɛɛrã pʋgẽ. Y sã n na n wa lebg n kẽnge, yɩtẽ-la sõma tɩ y zɩ Rĩungã Kɩbay N° 36 sebr a yembre, bala nedã tõeeme n ka tar a mengã rẽnd ye. Y tõe n mak n tũu sagl-kãensã.
7 Y sã n tẽeg nedã y sẽn ya a soab poore, y tõe yeelame:
◼ “Mam basa sebr t’a gom-zugã yaa ‘Yʋʋm tusr paalgã: Yaa beoog-daar bʋg la a tar y yĩnga?’ Ka yɩ bũmb sẽn kengd raood tɩ y karem tɩ ka la bilfu a Zezi Kirist Yʋʋm tusr Naamã na n sɩngame, n wa ne arzãn tẽngã zug sɩda? [Wilg-y Arzãna fot rãmb sẽn be Rĩungã Kɩbay N° 36 pʋgẽ.] Sebrã poorẽ b raoond-y lame tɩ y kos Bõe la Wẽnnaam baood tɩ tõnd maane? seb-bilã. Wilg-y seb-bilã, lak-y zãmsg a 5 wã zĩigẽ, n karem pipi sʋkrã ne sul a 1 ne a 2, la y kos nedã t’a togs a tagsa. Karm-y la y sõs verse a yembr bɩ a yiib zutu. Sã n tõe, bɩ y maan sʋkr a to la y karem sullã, tɩ rẽ poor bɩ y rɩk segls n lebg n wa kẽng taoor ne sõasgã.
8 Sẽn mik tɩ yaa “Baood” seb-bilã bɩ “Bãngr” sebrã la d na n kãab nebã ratmã pʋgb wɛɛngẽ sɩpaolg kiuugã, y tõe n yeelame:
◼ “Mam sẽn wa yãmb nengẽ sẽn pa kaoosã, m basa sebr gom-zug sẽn yaa ‘Yʋʋm tusr paalgã: Yaa beoog-daar bʋg la a tar y yĩnga?’ Sebrã pʋgẽ b kãabda neba yirẽ Biibl zãmsg zaalem. Mam lebgame n na n wa wilg-y zãmsg sebr tõnd sẽn tʋmd ne. [Wilg-y Baood seb-bilã, la y wẽnemd a poorã n wilgi, bɩ y wilg Bãngr sebrã, n lak seb-nens 188-9.] Yʋʋm tusr ning yell b sẽn gom Biiblã pʋgẽ wã na n waa ne yel-sõma sẽn wõnd wa b rãmb nins yãmb sẽn ne fotã zugã. Sẽn na yɩl n tõog n vɩɩmd Arzãnã pʋgẽ, d segd n bao n paama Wẽnnaam bãngrã. M bõos sor n wilg-y tõnd sẽn zãmsd Biiblã to-to ne nebã koɛɛg-koɛɛga.”
9 Rĩungã Kɩbay N° 36 wã pʋɩɩb tusa tõnd tɩ d moon koe-noogã n paase, tɩ rẽ wa ne kaset kũun sẽn yɩ kãsenga. Yaa vẽeneg tɩ rẽ neka neb wʋsg ratem moonegã zĩigẽ. Tõnd sẽn lagemd taab n modgd n gʋʋnd ratem kãngã, ne a Zeova sõngre rẽ na n kɩtame tɩ d tõog ne sũ-noog n yã neb a taab sẽn wõnd piis zĩiga.—Mat. 10:11; Tʋʋ. 13:48, 49, 52.