Rɩ-y tẽegrã yõodo: D tũnug ne tẽegrã sẽn watã n wilg d mi-beoogo
1. D na n paama segb n maan bõe tẽegrã sasa?
1 A Zezi kũumã tẽegr na n yɩɩ tʋʋl-nif kiuugã rasem 14. Yaa segb d sẽn paam n na n bɩɩs mi-beoogo, la d wilg a Zeova d sũ-noog a maan-neerã yĩnga. Luk 17:11-18 kibarã wilgdame t’a Zeova ne a Zezi ratame tɩ d yɩ neb sẽn mi beoogo. Bʋko, wãoob piigã sẽn paam maagrã, nin-yend bal n tẽeg n wa pʋʋs barka. A Zezi maoongã sẽn yɩ rondã yɩɩ sabab tɩ ãdem-biisã na n wa paam b mens ne bãas buud fãa la b tõog n vɩɩmd wakat sẽn kõn sa. Yaa vẽeneg tɩ d sã n wa paam dẽ, d na n pʋʋsda a Zeova bark beoog sẽn vẽeg fãa. La nanda, wãn to la d tõe n wilg-a d mi-beoog semen nins sẽn watã?
2. Bõe n tõe n sõng-d tɩ d bɩɩs mi-beoogo?
2 D bɩɩs mi-beoogo: Yɩl tɩ ned tõog n wilg a mi-beoogo, rẽndame t’a reng n tagse. Sẽn na yɩl n sõng-d tɩ d maan woto, b ninga Biiblã vɛrse nins d sẽn segd n karem tẽegrã yĩngã sɛb toor-toor pʋsẽ. Wala makre, D vaees Gʋlsg Sõamyã daar fãa sebrã ne kalãndirie wã pʋgẽ. Zak rãmb tõe n naagda taab n karemd-ba. Rẽ na n sõng-b lame tɩ b wilg b mi-beoog rondã yĩnga. Sẽn paase, na n kɩtame tɩ d maneg n bɩɩs zʋg-sõma.—2 Kor. 5:14, 15; 1 Zã 4:11.
3. Wãn la d tõe n wilg d mi-beoog tẽegrã kiis sasa?
3 D wilg d mi-beoogo: Ned sã n dat n wilg a mi-beoogo, rẽnda a maan bũmb vẽenega. (Kol. 3:15) Wala makre, wãoorã sẽn na n pʋʋs a Zezi barkã, yɩɩ tɩlae t’a reng n gẽes-a. Sãmbg sẽn ka be, a togsa neb a maagrã sẽn tũ ne yel-solemdã me. (Luk 6:45) Tõnd ned kam fãa me sũur sẽn pid ne mi-beoog a Zezi maoongã sẽn yɩ rondã yĩngã, d segd n wɩsga d meng n bool nebã tɩ b wa tẽegrã. D leb n tõe n wilga a Zeova d mi-beoog tẽegrã kiis sasa n yɩ sõngr so-pakda, wall d moon koɛɛgã n yɩɩg raasenkamã. Sẽn paase, tẽegrã daar zaabre, d tõe n wilga Wẽnnaam d mi-beoogo, n deeg sãambã neere, tɩ b sã n tar sogsg bɩ d leoke.
4. Bõe n na n sõng-d tɩ d ra wa maan d bãngẽ tẽegrã loogr poore?
4 Yaa rõandã tẽegrã n na n yɩ d yaoolem tẽegr bɩ? (1 Kor. 11:26) D pa mi ye. La baasgo, d miime tɩ d sã n bas t’a loog tɩ d pa paam n wilg d mi-beoogo, d bõname. Woto yĩng bɩ y modg n dɩ a yõodo. Bɩ tõnd ned kam fãa mao t’a no-goam la a sũur tagsg noog a Zeova sẽn sak n kõ rondã sũuri.—Yɩɩl 19:15.