D minim n maand bũmb fãa a wakate
1. Mak-sõng bʋg la a Zeova kõt-do?
1 A Zeova maanda a bũmb fãa a wakate. Wala makre, a sõngda a nin-buiidã b sẽn “dat sõngr wakate.” (Heb. 4:16) A leb n getame tɩ sẽn tũud-b yẽ wã paamd sẽn yaa tɩlae ne-b b tẽebã bɩɩsg yĩngã “wakat sẽn zems pʋgẽ.” (Mat. 24:45, MN) Woto yĩnga, d tõe n kɩsa sɩd t’a sũ-puugrã daar pa na n “kaoos ye.” (Hab. 2:3, Sebr Sõngo) Ad a Zeova sẽn maand bũmb fãa a wakatã sɩd nafd-d-la wʋsgo! (Yɩɩl 70:6) La d sẽn yaa neb sẽn pa zems zãnga, tɩ d tʋʋmã me yaa wʋsgã yĩnga, yɩl n tõog n maand bũmb fãa a wakat tõe n yɩɩ toog ne-do. La bõe yĩng tɩ d segd n modgd n maand bũmb fãa a wakate?
2. Bõe yĩng tɩ d sã n maand bũmb fãa a wakat bɩ waoogd a Zeova?
2 Rũndã nebã wʋsg toor sẽn kae ne b taab la b pa tar yõk-m-mengã, b pa wae n maand b yell a wakat ye. (2 Tɩm. 3:1-3) Woto yĩnga, kiris-nebã sã n kẽnd tʋʋmã, tigissã wall b sã n tar sɛk n kẽng lɛɛre, nebã pẽgdame tɩ waoogd a Zeova. (1 Pɩɛ. 2:12) Rẽ yĩnga d minim n tʋmda d tʋʋm-zaalã b wakate, n yaool n neẽ tɩ d pa kẽnd d tigiss toor-toorã pĩnd bɩ? D sã n kẽnd d tigissã pĩnd n paamd n kelgd sɩngr yɩɩllã la pʋʋsgã, d wilgdame tɩ d tʋll n dɩka d saasẽ Ba wã togs-n-taare, n pa zũnd-zãnd soab ye.—1 Kor. 14:33, 40, Sebr Sõngo.
3. Bõe yĩng tɩ d sã n maand bũmb fãa a wakat bɩ wilgdẽ tɩ d nanda d taabã?
3 D sã n maand bũmb fãa a wakat me, d wilgdame tɩ d nanda d taabã. (Fil. 2:3, 4) Wala makre, d sã n kẽnd tigingã tigissã wall koe-moonegã yiib tigsgã lɛɛre, d pa na n tiisd d tẽed-n-taasã ye. Sẽn paase, d sã n pa kẽnd pĩnda, na n yaa wa tõnd sẽkã yõod yɩɩda d taabã rẽnda. D wae n nonga ned sẽn maand a bũmb fãa a wakate. Bala, wilgdame t’a yaa pʋ-peelem soaba, nin-yẽesenga, la ned b sẽn tõe n teege.
4. Y sã n pa wae n maand bũmb fãa a wakate, bõe la y segd n maane?
4 Y sã n pa wae n maand y bũmba fãa a wakat bɩ y bao n bãng a võore. Sigl-y y yɛlã sõma n tõogd n maand y bũmb fãa a wakate. (Koɛ. 3:1; Fil. 1:10) Kos-y-yã a Zeova sõngre. (1 Zã 5:14) Y sã n maand bũmb fãa a wakate, y tũuda tõogã no-kãsemsã a yiibã sẽn yet tɩ d nong Wẽnnaam la d nong d taabã.—Mat. 22:37-39.