Tũ-y a Zezi mak-sõngã
1. Mak-sõng bʋg la a Zezi kõ-yã?
1 D sã n wa moond koɛɛgã, d segd n ninga d yamẽ tɩ d mak-sõngã tõe n nafa neb nins sẽn get tõndã. A Zezi zãmsa nebã ne a no-goam la ne a manesmã. Neb nins sẽn da get-a wã yãame t’a tara yẽesem, t’a nonga nebã, la t’a tʋll n waooga a Ba wã yʋʋr la a maan a raabã ne a sũur fãa.—1 Pɩɛ. 2:21.
2. Zĩ-bʋs la neb nins sẽn moond koɛɛgã ne tõndã tõe n dɩk tõnd togs-n-taare?
2 D sã n wa moond zak-zaka: Wala a Zezi, tõnd me mak-sõngã nafda neb nins sẽn moond koɛɛgã ne tõndã. Koe-moondb nins sẽn nan sɩngdã la koe-moondb nins sẽn pa tar minim sõma wã sã n yã tõnd sẽn moond koɛɛgã ne yẽesem, bãmb me na n tagsame n ges b sẽn na n moon koɛɛgã sõma to-to. B sã n yã tɩ tõnd tara sũ-noog la tɩ nebã yell pak-d lame, b na n bãngame tɩ tara yõod tɩ bãmb me rɩk tõnd togs-n-taar koe-moonegã pʋgẽ. B sã n yã tõnd sẽn modgd n lakd Biiblã n karemd n wilgd nebã, d sẽn maand lebg-n-tɩ-ges rãmb la d zãmsd nebã Biiblã, na n kɩtame tɩ b me maan wa tõnd sẽn maandã.
3. Wãn to la tõnd mak-sõngã tõe n sõng d Biibl karen-biisã, la rẽ na kɩtame tɩ b maan bõe?
3 D sã n wa zãmsd Biiblã ne neda: D Biibl karen-biisã na n gesa tõnd manesmã sẽn yaa to-to. Wala makre, baa tõnd sã n wilg-b tɩ zãmsgã seglg tara yõodo, la tɩ b segd n baoa verse rãmbã la b rẽesd sebrã tags kãsemsã, b na n gũus n gesa tõnd mengã sã n maanda rẽ. (Rom 2:21) Tõnd sã n modgd n wat wakat ning d sẽn yãk n na n zãms Biiblã ne-bã n pa wat retaare, b pa na n dɩk wakat kãng n tʋm tʋʋm a taab ye. Yaa vẽeneg me tɩ b na n gesa modgr ning tõnd sẽn maand koe-moonegã pʋgẽ wã, la d tẽebã me sẽn tar pãngã. Yaa rẽ n so tɩ naoor wʋsgo, neb nins sẽn modgd n tũud a Zezi mak-sõngã sã n zãms ned Biiblã, nin-kãng me lebgda koe-moond sẽn tar yẽesem t’a koe-moonegã womd biisi.
4. D sã n wa kẽng tigissã, d mak-sõngã zãmsda nebã bõe?
4 D sã n wa kẽnd tigissã: A Zeova Kaset rãmbã fãa segd n kõo mak-sõng tigingã pʋgẽ. Mak-sõng ning tigingã nebã sẽn kõta nafda neb nins sẽn nan sɩngd tigissã waoogã. Nin-kãensã geta tõnd sẽn nong taabã, la d sẽn manegd-d mens sõma to-to wã. (Yɩɩl 133:1) B na n gesa tõnd sẽn wat tigissã wakat fãa la d kõt loeer n wilgd d tẽebã me. Ned a ye n zĩnd tõnd tigsg a ye pʋgẽ n yã bi-pugl kɩdg sẽn yɩ tao-tao n lak Biiblã verse ning b sẽn yeel tɩ b lakã, hal n tũ karengã sõmã. Bi-puglã mak-sõngã kɩtame tɩ nin-kãngã kos Biibl zãmsgo.
5. Bõe yĩng tɩ d pa segd n tags tɩ tõnd mak-sõngã pa tar yõodo?
5 Biiblã sagenda tõnd tɩ d rɩk d taabã mak-sõngo. (Fil. 3:17; Heb. 13:7) Woto yĩng bɩ d ra yĩm tɩ d sã n tũ a Zezi mak-sõngã kɛpɩ, neb a taabã na n geta tõndo, n dɩk d togs-n-taare. D sẽn bãng woto wã, bɩ d ra tol n yĩm goam nins sẽn be 1 Tɩmote 4:16 pʋgẽ wã ye. Be b yeta woto: “Gũus f meng ne koɛɛg ning fo sẽn zãmsd nebã.”